Jobo o re o hloiloe ke Molimo le batho
1Eaba Jobo oa araba, o re:
2“Tse kang tsena
ke li utloile hangata;
lōna bohle le batšelisi
ba tenang motho!
3Na u sa tla khaotsa
ho shoahla mafeela?
Sesosa sa nganga ea hao ke sefe?
4Hoja boemo ba ka e n'e le ba lōna,
ke ne nka 'na ka bua joaloka lōna,
ka puo tse ngata ka le tlameletsa,
ka ba ka thukuthela
hlooho ea ka ho lōna.
5Empa polelo tsa ka
li ne li tla le khothatsa,
ho bebenya melomo ha ka
ho le bebōlèlè tlokotsi.
6“Leha nka bua,
bohlōkō ba ka ha bo kokobele;
leha ke khutsitse,
bona ha bo ntlohele.
7Oho, Molimo, u fela u ntšotlile,
lapa la ka lohle
le timelitsoe ke uena;
8u ile ua ntlhasinya,
'me u sera sa ka;
bokojoane ba ka
ke paki e nqosang ke e shebile.
9Ea ntlhoileng,
ka khalefo oa ntlepolaka,
o ntsikitlanyetsa meno a hae;
sera sa ka se ncheba
ka mahlo a nchocho!
10Batho ha ba kopetse melomo
ha ba ntšoma,
ba ntjabela lerameng
ba bile ba 'nyefola,
ba entse setha-se-oele holim'a ka.
11Molimo o 'neeletse ka balotsana,
o ntahletse matsohong
a batho ba khopo.
12Ke ne ke iketlile,
ke mona o ntšuhlamantse,
a mphamola ka molalana,
eaba oa mpilila,
a ntlhoma ho ba sekhōpi
sa metsu ea hae.
13Metsu ea hae e nketselitse lethala,
o harōla likahare tsa ka
a se na mohau,
nyooko ea ka eona
o e qhalanyetsa fatše.
14O ntlhaba a sa tsoa ntlhaba,
o nkhōrōhela joaloka seqhobane.
15“'Meleng oa ka
ke apere tse mahoashe,
ka phatla ea ka
lerōleng ka sunyama;
16mahlo a ka a fubetse ke menyepetsi,
botšo bo entse selika-mahloana
ntšing tsa ka;
17leha matsoho a ka
a sa fuparela bokhopo,
le thapelo ea ka ho Molimo
e hloekile.”
Jobo o ipiletsa ho Molimo hape
18“Oho, uena lefatše,
mali a ka u se ke ua a mōnya,
boipiletso ba ka
bo se ke ba khaotsa!
19Le joale paki ea ka
e leholimong,
'muelli oa ka
le eena o holimo-limo.
20Ha e le metsoalle ea ka
ea ntšoma,
keleli tsa ka
li keleketlela ho Molimo.
21Ke mang
ea ka mpuellang ho Molimo
joalokaha ho buelloa motho
ho motsoalle?
22“Ho tla feta lemo
li le 'maloana,
ebe 'na ke nka tsela
e eang bo-ea-batho.”
