JOBO 20

₂“Ka baka la lehala

le ka pelong ea ka,

menahano ea ka e re ke u arabe.

₃Ke utloa khalemelo

e ntšoenyang maikutlo,

moea oa ka o nthuta

hore ke e arabe.

₄“Ha ke re ua tseba,

ho tloha boholo-holo,

ho tloha ha lefatšeng mona

ho beoa motho:

₅Molilietsane oa ba khopo

o sekhoahla, mokoka ha o eo,

thabo ea baetsalibe

ke ea motsotsoana feela!

₆Leha boikhantšo ba hae

bo ka fihla maholimong,

hlooho ea hae

ea ithoesa tlōkōla ea maru,

₇o tla timella ruri

joaloka thètè la hae,

ba 'moneng ba re:

‘Ekaba o nyametse kae?’

₈O tla fela sa toro,

a se hlole a fumanoa;

joaloka pono ea bosiu a nyamèlè.

₉Leihlo le mo itseng heli!

le ke se 'mone hape;

le tulo tsa hae

li ke ke tsa hlola li sa 'mona.

₁₀Bara ba hae

ba qekisa ho ratoa ke mafutsana,

ba buseletsa mafutsana qhoqha

ea ntat'a bona.

₁₁Bokoakoariri ba bocha

bo tletse masapo a hae,

ha a khutlela lerōleng

bo tla lala le eena teng.

₁₂“Le hoja bokhopo

bo mo natefela lehano,

a bile a bo pata tlas'a leleme la hae;

₁₃a sa ikutloe

ho ka khaohana le bona,

a bo mōma,

a bo bōlōka ka hanong la hae;

₁₄lijo tseo lia hlasa

ha li fihla ka moholung,

li iphetole mahlōkō a bo-marabe.

₁₅Menono oa e metsa,

o bile oa e hlatsa,

Molimo oa mo hlatsisa,

o khōfa moholu oa hae.

₁₆O tla mōkōnyetsa bohlōkō

ba bo-marabe,

likoètsèpè tsa qōoane tsona

li 'molaee.

₁₇Linōka a ke ke a hlola a sa li bona,

le phororo tse phallang

tsa linotši le tsa lebese.

₁₈Tsa matsoho a hae

o li busetsa a s'o li latsoe,

tse tsoaloang ke khoebo

le tsona ha li mo thabise.

₁₉O tubile mafutsana,

a a siea a itlhōphere,

a ikhapela matlo

e se a matsoho a hae.

₂₀“Ha a na ho fuoa tšoeea

ke takatso tsa hae,

a ke ke a ipholosa

le ka maruo a hae.

₂₁Meharo ea hae ha ea siea le pala,

boiketlo ba hae ke ba nakoana;

₂₂o tla tsieleha

a nts'a hafa ka nkatana,

mafutsana a oele ka sekhahla,

a oele holim'a hae.

₂₃Etlare hoja a khotše

sa mpana-phatloha,

khalefo ea Molimo

e mo tlōkōmele malakabe,

thala la metsu

le mo lethehele holimo.

₂₄Leha a ka b'a phonyoha

lerumo la tšepe,

seqha sa lethose sona se tla mo fula,

₂₅motsu oa sona

o e'o phunyeletsa mokokotlo,

ntlha ea oona e phatsimang

e qhale nyooko,

matšabeho a lefu

a mo aparele kahohle.

₂₆Fifi la bo-nka-tjana le mo laletse,

o tla timetsoa ke mollo

o se na sebutsoelo,

ba setseng lapeng la hae

ba tamukane.

₂₇Maholimo a tla talōla

bokhopo ba hae,

lefatše le eme ka maoto

ho mo qosa.

₂₈Ntlo ea hae

e tla hōhōloa ke sekhōhōla,

ke phororo tsa khalefo ea Molimo

ha e tlōkōma.

₂₉Ona ke oona moputso oa ea khopo,

lefa leo a le abetsoeng ke Molimo.”