JOBO 31

₁“Ke entse tumellano

le mahlo a ka,

hore ha a ka ke

a chachehela kharebe.

₂“Kabelo e tsoang ho Molimo

ke efe?

Lefa le tsoang ho Ea Matla 'ohle

ke lefe?

₃Na hase timelo ho baetsalibe,

le koluoa ho ba etsang bokhopo?

₄Molimo tsela tsa ka oa li bona,

le mehato ea ka eohle oa e bala.

₅“Haeba ke sebelitse ka bolotsana,

eba oto la ka

le mpotlakiselitse ho ea thetsa;

₆a nkeke beoe sekaleng sa toka,

Molimo a tl'a tsebe

ha ke na molato.

₇Haeba mehato ea ka

e khelohile tseleng,

eba pelo ea ka

e hohetsoe ke mahlo a ka,

eba manothoko

a nkhomaretse matsohong;

₈seo ke se jetseng

se ke se jeoe ke e mong,

lijalo tsa ka, ka metso,

li ke li motsuloe.

₉“Haeba pelo ea ka

e hohetsoe ke mosali,

eba nkile ka lalla monyakong

oa mohaeso,

₁₀mosali oa ka a silele monna e mong,

ba bang ba kopanele likobo le eena.

₁₁Hona e ka ba ketso

e hlabisang lihlong,

ea e-ba sebe

se lokeloang ke ho ahlōloa.

₁₂Ke mollo o chesang

ho isa timelong,

o tla felisa maruo a ka kaofela.

₁₃“Haeba mohlanka oa ka

le lekhabunyane la ka,

ke ba hloketse toka

ha ba tsekisana le 'na,

₁₄ke tla etsa'ng

ha Molimo a s'a ntobile?

Ke tla re'ng

ha ke araba potso tsa hae?

₁₅Ha ke re 'Mōpi oa ka

ke 'Mōpi oa bona?

Ha ke re ke eena ea re bōpileng

maleng a bo-'m'a rōna?

₁₆“Haeba nkile ka hanyetsa

kōpo ea mofutsana,

eba mohlolohali o lebeletse,

mahlo a b'a khathala;

₁₇eba ke itjeletse thathana

ke le inotsi,

khutsana ka e jela tjela-mahlong,

₁₈ho tloha bocheng ba ka

ke e holisitse ke le ntat'a,

ka baballa mohlolohali

ho tloha mohla ke tsoaloang,

₁₉haeba nkile ka bona motho

a e-shoa ke ho hloka liaparo,

kapa mofumanehi

a se na le nketlana;

₂₀haeba ho se ea kileng

a ntlhohonolofatsa,

leha a ile a futhumatsoa

ke boea ba nku tsa ka;

₂₁haeba nkile ka otla khutsana

ka tsoho la ka,

hobane ke tseba hore ka khotla

nke ke ka tsuoa,

₂₂phaka sa ka

a se motsuhe lehetleng,

tsoho la ka le robehe setsoeng,

lenonyeletsong.

₂₃Ho tšaba Molimo

ho ne ho nthibela,

tlōtla ea hae

e ntšabisa ho etsa tsena.

₂₄“Haeba 'na

ke itšepetse khauta feela,

eba khauta e hloekisitsoeng

ke tšepa la ka;

₂₅haeba ke nyakalalitsoe

ke ho rua haholo,

hobane ka matsoho a ka

ke sebelitse haholo;

₂₆haeba nkile ka boha

tsatsi ha le phatsima,

kapa khoeli

e tsamaea ka lereli la eona,

₂₇kunutung la pelo ea ka ka lekeha,

ka aka tsoho la ka ho li obamela,

₂₈tsena le tsona ke libe

tsa ho ahlōloa ke baahlōli,

hoba Molimo ea kaholimo

ke tla be ke mo latotse.

₂₉“Na nkile ka thabela bomalimabe,

malimabe ba sera sa ka,

kapa ka thōhōletsa

ha se oeloa ke litsietsi?

₃₀Ka molomo oa ka

ha ke e-s'o bue bokhopo,

ka ho lakaletsa

bophelo ba sona thohako.

₃₁Na ba lapa la ka ba kile ba re:

‘Ke mang ea sa kang a ja,

a khotsofala?’

₃₂Ha ho na moeti

ea kil'a lala thoteng,

menyako ea lapa la ka

e buletsoe batsamai.

₃₃“Haeba nkile ka pata sebe sa ka

joaloka Adama,

ka ho boloka makhopo a ka

ka fubeng sa ka,

₃₄ka baka la ho tšaba

matšoele a batho,

le ho tšaba ho nyelisoa

ke bang ka 'na,

ke ne ke tla khutsa,

ebe ke tsoela kantle.

₃₅“Ekaba ke mang ea tla 'mamela!

Bonang, mongolo oa ka ke ona!

Ea Matla 'ohle a ke a nkarabe,

moqosi oa ka

a ngolle 'na moqosuoa qoso!

₃₆Ruri ke ne ke tla e jara

hetleng la ka,

ke e roale

sa mofapahlooho o roaloa.

₃₇Ke ne ke tla 'malla

mehato ea ka kanngoe,

ke atamele ho eena

ke tsamaea seka khosana.

₃₈“Haeba masimo a ka aa nqosa,

eba foro tsa 'ona li tletse likhapha;

₃₉haeba tholoana tsa 'ona

ke li jele lehahla,

kapa mong'a tsona ka 'molaea,

₄₀bakeng sa koro

ho ke ho mele meutloa,

bakeng sa harese

ho ke ho mele lehōla!”