Boinyatso ba Jobo
1Eaba Jobo o araba Morena, o re:
2“Kea tseba
hore tsohle u ka li etsa,
le hore ha ho morero
o ka u sitang.
3U il'a botsa, ua re:
‘Ea sitisang merero ea ka
a se na tsebo ke mang?’
Ke kahoo ke reng:
‘Ke buile ka tseo
ke sa li utloisiseng,
tse makatsang haholo
hoo ke sa li tsebeng.’
4“Eaba u re: ‘Mamela joale,
'me 'na ke tla bua.
Ke tla u botsa lipotso,
uena u nkarabe.’
5Ke utloile feela
ha u nts'u boleloa,
empa joale ke u bone
ka mahlo a ka.
6Ka baka lena,
ke soabela polelo tsa ka,
ke ikoahlaea ke le lerōleng,
ke le moloreng.”
Molimo o laela metsoalle ea Jobo ho etsa sehlabelo
7Eare hoba Morena a qete ho bua mantsoe ana ho Jobo, a re ho Elefase ea tsoang Temana: “Uena le metsoalle ea hao e 'meli ke le halefetse haholo. Ha lea ka la bua ka 'na ka mokhoa o tšoanelang, joalokaha Jobo, mohlanka oa ka, eena a ile a bua. 8Ka baka lena, nkang lipoho tse supileng le lipheleu tse supileng, le ee ho Jobo, mohlanka oa ka, le iketsetse nyehelo ea secheso. Jobo, mohlanka oa ka, o tla le rapella. 'Na ke tla ananela thapelo ea hae, ke se ke ka le otla ho ea ka bothoto ba lōna, hobane ha lea ka la bua ka 'na ka mokhoa o tšoanelang, joalokaha Jobo, mohlanka oa ka, eena a ile a bua.”
9Eaba bo-Elefase ea tsoang Temana, le Biledade ea tsoang Shua, le Sofara ea tsoang Naama, ba etsa kamoo Morena a ba laetseng kateng, 'me Morena a ananela thapelo ea Jobo.
Jobo o buseletsoa maruo a hae
10Hoba Jobo a rapelle metsoalle ea hae, Morena a boela a mo atlehisa. Tsohle tseo a neng a e-na le tsona Morena a 'museletsa tsona habeli. 11Joale bana babo kaofela, le likhaitseli tsa hae kaofela, le bohle ba neng ba tsebana le eena pele ho mona ba tla ho eena. Ba fihla ba e-ja lijo le eena, ba le ka tlung ea hae, ba mo tšelisa malebana le bobe bohle boo Morena a ileng a mo tlisetsa bona. Motho ka mong oa bona a mo nea chelete ea kesita, le reng ea khauta.
12Eaba Morena o hlohonolofatsa lilemo tsa ho qetela tsa bophelo ba Jobo ho feta lilemo tsa pele. A ba le likhutšoane tse likete tse leshome le metso e mene, le likamele tse likete tse tšeletseng, le lipholo tse likete tse peli, le litonki tse tšehali tse sekete. 13A ba a ba le bara ba supileng le barali ba bararo. 14Morali e moholo a mo rea lebitso la Jemima, oa bobeli a mo rea la Kesia, oa boraro a mo rea la Kerene-Hapuke. 15Naheng eo eohle ha hoa ka ha e-ba le baroetsana ba batle joaloka barali bao ba Jobo. Ntat'a bona a ba abela lefa joalokaha a ile a abela bana babo bona.
16Kamora' mona, Jobo a phela lilemo tse lekholo le mashome a mane. A bona bana ba hae le litlōhōlō le litlōhōloana tsa hae ho ea fihla molōkong oa bone. 17Jobo a shoa a se a tsofetse haholo, lilemo tsa hae li le ngata.
