JOBO 6

₂“Ao! hoja ho koma-koma ha ka

ho ka lekanngoa,

tsietsi tsa ka tsa beoa sekaleng,

₃li ne li tla feta hlabathe

la leoatle ka boima;

ke ka hona

ke ileng ka phatloha feela.

₄Metsu ea Ea Matla 'ohle

e ntlhabile,

mahlōkō a eona

a chachametsa le moea oa ka,

matšabeho a Molimo

a nteetse thekō!

₅Na tonki e ka lla

khulo le le lengata?

kapa pholo ea bohla

e ntse e fula?

₆Lijo tse bosula

li ka jeoa ho se letsoai?

Na mothoebe o mosoeu oona

oa latsoeha?

₇Lijo tse joalo ha ke li lakatse,

li tšoana

le tse nqhuqhumisang mala!

₈“Hoja kōpo ea ka

e n'e ka ananeloa,

Molimo a 'nea

seo ke se labalabelang;

₉Molimo a khahloa

ke ho mphetšela,

a nkisa letsoho, a ntimetsa,

₁₀Ke ne ke tla thaba,

ke tšelisehe,

ke tsebe ho mamella

litlokotsi tsa ka,

hoba polelo tsa Ea Halalelang

ha kea li hanyetsa.

₁₁“Ke sa na le matla afe,

a ho 'nea letšepa?

Ke tla fella kae,

ha ke qenehetse ho phela?

₁₂Na 'mele oa ka

o thata joaloka lejoe?

Kapa nama ea ka

e entsoe ka lethose?

₁₃Matla a ho ithusa a mpheletse,

sehlaha sa bohlale se setse feela.”

₁₄“Ea nyahameng pelo,

eka khona a hauheloe ke metsoalle,

leha eba a sa tšabe Ea Matla 'ohle.

₁₅Bana beso ha ba tšepahale

sa melatsoana,

ba ka melatsoana e tlala,

e ba e feta,

₁₆e ba maluke

ke qhoqhoaane ho qhibiliha,

e patehe ke lehloa ho khetheha.

₁₇Ha mocheso o fihla ea nyamela,

ha tsatsi le èma e pshele ruri.

₁₈Baeti ba kheloha tsela,

ba batla metsi,

ba ee lehoatateng,

ba be ba timele.

₁₉Baeti ba tsoang Tema

ba batla metsi,

bahoebi ba Sheba

ba batla ka letšepa;

₂₀ba tsielehile,

leha ba ne ba tšepile,

ba fihlile teng, joale ba soabile.

₂₁Ho 'na, le lōna le ka melatsoana eo:

Lea bona ke oele ka phatla,

lōna lea ntšabella!

₂₂Na nkile ka re:

‘Mpheng hona le hane’?

Kapa: ‘Ntefelleng ka maruo a lōna?’

₂₃Kapa: ‘'Namoleleng

matsohong a lira tsa ka?

Mpholoseng

ho ba matla ho mpheta’?

₂₄“Nthuteng,

ke tla mamela ka lilimetse,

le ntlhalosetse na phoso ea ka e kae.

₂₅Mantsoe a 'nete a matla hakaakang!

Polelo tsa lōna ekaba li supa eng?

₂₆Ebe le rerile ho nyatsa polelo tsa ka,

le re tsa ea tšerehaneng

li ea le moea feela?

₂₇Le khutsanyan'a khulu!

le ka e rekisa,

la chekela motsoalle oa lōna lemena.

₂₈“Joale lumelang,

le ntalime sefahla-mahlo:

Taba li mahlong,

shano la ka le tla itšupa.

₂₉Kea le kōpa: Imameleng,

phoso e se be teng;

imameleng hape,

esere ho loka ha ka

ha thunthetsoa.

₃₀Ebe phoso e tsoile lelemeng la ka?

Na nka sitoa ho khetha

tse molemo ho tse khopo?”