Ho rōmeloa lihloela Jeriko
1Ha ba le Shitime, Joshua, mora oa Nune, a rōma banna ba babeli ba lihloela, ka lekunutu, a re ho bona: “E-eang, le e'o hlahloba naha le motse oa Jeriko.” Banna bao ba babeli ba ea, ba fihla ka tlung ea mosali oa seotsoa, ea bitsoang Rahaba, 'me ba robaletsa teng.
2Ha tsebisoa khosi ea Jeriko, ha thoe: “Hela, bosiung bona bona ho fihlile banna ba Baiseraele mona, ba tlil'o hlahloba naha.”
3Eaba khosi ea Jeriko e rōmela molaetsa ho Rahaba, e re: “Ntša banna ba fihlileng ho uena, ba keneng ka tlung ea hao, hobane ba tlile mona ho tla hlahloba naha eohle.”
4Mosali eo a nka banna bao ba babeli, a ba pata, 'me a re: “Ke 'nete, banna ba babeli ba ile ba fihla mona ho 'na, empa ke ne ke sa tsebe moo ba tsoang teng. 5E ile eare ka nako eo ho koaloang monyako oa lerako la motse ka eona, ha ho se ho le lefifi, banna bao ba tsamaea, ha ke tsebe hore na ba lebile kae; ba potlakeleng kapele, le tla ba tšoara.” 6Empa o ne a ba hloeselitse kaholim'a marulelo, a ba koahetse ka litlhaka tsa motsitla, tseo a neng a li alile holim'a marulelo. 7Baphalalisi bao ba nka tsela e eang malibohong a Jorodane, 'me hang-hang hoba baphalalisi bao ba tsoe, monyako oa koaloa.
8Banna bao ba ne ba e-s'o ka ba khaleha, ha Rahaba a hloella ka ho bona, kaholim'a marulelo. 9A re ho banna bao: “Kea tseba hore Morena o le neile naha ena, le hore rōna rea le tšaba, le hore baahi bohle ba naha ena le ba nyahamisitse lipelo. 10Re utloile kamoo Morena a neng a pshese metsi a Leoatle la Lehlaka kapele ho lōna kateng, ha le ne le e-tsoa Egepeta. Re utloile le seo le neng le se etse ho likhosi tse peli tsa Baamore, tse neng li le kamose oane ho Jorodane, e leng Sihone le Oge, bao le neng le ba ripitle ho hang. 11Ha re utloa hoo, lipelo tsa rōna li ile tsa nyahama, 'me banna bohle ba se ke ba hlola ba e-ba le sebete, ka baka la ho le tsaba, hobane Morena Molimo oa lōna, ke eena Molimo ea holimo, leholimong, le ea tlase, lefatšeng. 12Joale kea le rapela: Ntlhapanyetseng ka lebitso la Morena, hore ha e le mona ke bile mosa ho lōna, le lōna le tla ba mosa ho lelapa leso, 'me le be le 'nee pontšo ea 'nete. 13Ntlhapanyetseng hore le tla pholosa ntate, le 'mè, le likhaitseli tsa ka, le bana beso, le bohle bao ba nang le bona, 'me le re phemise lefu.”
14Banna bao ba re ho eena: “Re tla u shoela, haeba u ke ke ua bolela taba ena ea rōna. Ha Morena a se a re neile naha ena, re tla ba mosa ho uena, re tšepahale.”
15Eaba Rahaba o ba lepeletsa le fesetereng ka thapo, hobane ntlo ea hae e ne e ikhohlile ka lerako la motse, 'me a phela kahar'a lerako. 16A re ho bona: “Balehelang thabeng, esere baphalalisi ba lōna ba kopana le lōna. Le qete matsatsi a mararo le ipatile moo, ho fihlela baphalalisi ba lōna ba be ba khutla. Kamora' moo le ka tsoela pele leetong la lōna.”
17Joale banna bao ba re ho eena: “Re tla be re lokolohile kanong ena eo u re hlapantšitseng eona haese ha u ka etsa tjena: 18Ha re fihla naheng ena, u tle u tlame khoele e khubelu ena fesetereng eo u re lepelelitseng ho eona, 'me u bitse ntat'ao, le 'm'ao, le bana beno, le bohle ba lelapa leno, ba phuthehele mona ha hao, ka tlung ena. 19Mang kapa mang ea tla tsoela seterateng, kantle ho ntlo ea hao, ke li-bonoa-ke-eena, 'me ha re na ho ba le molato. Empa mang kapa mang ea tla ba le uena ka tlung, ha a ka bolaoa, mali a hae a tla botsoa ho rōna. 20Feela haeba u ka bolela taba ena ea rōna, re tla be re lokolohile kanong ena eo u re hlapantšitseng eona.”
21Eaba o re: “A ho be joalokaha le bolela.” A ba lokolla, ba tsamaea. A sala a tlama khoele e khubelu fesetereng.
22Ba tsamaea, ba fihla thabeng. Ba hlola teng matsatsi a mararo, ho fihlela baphalalisi ba bona ba be ba khutla. Baphalalisi bao ba ba batla hohle tseleng, empa ba se ke ba ba fumana. 23Joale banna bao ba babeli ba tloha, ba theoha thabeng, ba tšela, ba fihla ho Joshua, mora oa Nune; ba mo tsebisa tse ileng tsa ba hlahela. 24Ba re ho Joshua: “Ruri Morena o re neile naha eo eohle; ho feta mona, baahi bohle ba eona ba tšositsoe haholo ke ho utloa hore rea tla.”
