JOSHUA 20

₁Morena a bua ho Joshua, a re:

₂“Bua le bana ba Iseraele, u re: ‘Ikhetheleng metse eo ho tla tšabeloa ho eona, eo ke buileng ka eona ho lōna, ka molomo oa Moshe. ₃Ke moo motho ea ka bolaeang motho e mong e se ka morero, a sa hlokomela, a tla tšabela teng. Metse eo e tla ba eo le tšabelang ho eona, ho baleha mophetetsi oa mali.

₄“ ‘Motho eo o tla tšabela ho o mong oa metse eo, a eme monyakong oa motse, a bolelle baholo ba motse litaba tsa hae. Bona ba tla mo kenya ka motseng, ba mo nee sebaka, hore a phele le bona. ₅Haeba mophetetsi oa mali a ka mo lelekisa, ha ba na ho neelana ka eena matsohong a mophetetsi eo, hobane 'molai o bolaile oa habo e se ka morero, 'me le pele ho moo a ne a sa mo hloea. ₆O tla phela motseng oo ho fihlela a emisoa kapele ho phutheho hore e mo ahlōle, le ho fihlela eo e leng Moprista e Moholo nakong eo a e-shoa. Joale 'molai a ka khutlela motseng oa habo, le tlung ea hae, moo a neng a balehe teng.’ ”

₇Joale Galelea, naheng e maralla ea Nafthali ba khetha Kedeshe; naheng e maralla ea Efraime ba khetha Shekeme, 'me naheng e maralla ea Juda ba khetha Motse oa Areba, e leng Heborone. ₈Kamose oane ho Jorodane, ka bochabela ho Jeriko, morabeng oa Rubene, ba khetha Besere e lehoatateng le phuleng; morabeng oa Gade ba khetha Rama e Gileade; morabeng oa Manase ba khetha Golane e Bashane. ₉Ena ke eona metse e ileng ea khetheloa bana bohle ba Iseraele, le bajaki ba jakileng har'a bona. Ho eona ho tla balehela mang kapa mang ea ka bolaeang motho e se ka morero, hore a se ke a bolaoa ke mophetetsi oa mali, ho fihlela 'molai a emisoa kapele ho phutheho.