JOSHUA 3

₁Bo-Joshua, le bana bohle ba Iseraele, ba tsoha ka malungoalungoana, ba qala leeto la ho tloha Shitime, ba ea fihla Jorodane ba robaletsa moo, ba tsoha ba tšela. ₂Ha ho fetile matsatsi a mararo, baokameli ba tsamaea har'a liahelo. ₃Ba laela sechaba, ba re: “Ha le bona areka ea selekane sa Morena Molimo oa lōna, e jeroe ke baprista, e leng Balevi, le tla tloha moo le leng teng, le e sale morao. ₄Feela pakeng tsa lōna le eona ho be le sebaka se bolelele bo ka bang ba kilomethara. Le se ke la atamela haufi le eona, le tle le tsebe tsela eo le tla tsamaea ka eona, hobane ha le e-s'o ka le tsamaea ka tsela ena.”

₅Joshua a re ho sechaba: “Itlhoekiseng, hobane hosasane Morena o tla etsa limakatso kahar'a lōna.”

₆Joale Joshua a bua ho baprista, a re: “Jarang areka ea selekane, le etelle sechaba pele.” Ba jara areka ea selekane, 'me ba etella sechaba pele.

₇Morena a re ho Joshua: “Ka letsatsi lena ke tla qala ho u hōlisa moo Baiseraele bohle ba bonang, ba tle ba tsebe hore ke tla ba le uena joalokaha ke ile ka ba le Moshe. ₈U tla laela baprista ba jarang areka ea selekane, u re: ‘Ha le fihlile mōleng oa metsi a Jorodane, le eme themelele!’ ”

₉Joshua a re ho bana ba Iseraele: “Atamelang koano, le mamele mantsoe a Morena Molimo oa lōna.” ₁₀Joshua a boela a re: “Ka sena le tla tseba hore Molimo ea phelang o teng kahar'a lōna, le hore o tla leleka kapele ho lōna Bakanana, le Bahete, le Bahife, le Baperise, le Bagirigashe, le Baamore, le Bajebuse. ₁₁Bonang, areka ea selekane sa Morena oa lefatše lohle, e tšela Jorodane e le eteletse pele. ₁₂Ka baka leo, khethang banna ba leshome le metso e 'meli merabeng ea Iseraele, morabeng o mong le o mong ho khethoe monna a le mong. ₁₃Etlare ha baprista ba jereng areka ea Morena, Morena oa lefatše lohle, ba hata metsi a Jorodane, metsi ao a Jorodane a tla arohana ka lehare. Metsi a phallelang tlase, a e-tsoa holimo ho nōka, a tla ema a ikentse lekaka.”

₁₄Joale sechaba sa tloha litenteng tsa sona, ho ea tšela Jorodane, se eteletsoe pele ke baprista ba jereng areka ea selekane. ₁₅Eare feela ha ba jereng areka ba fihla Jorodane, 'me maoto a baprista ba jereng areka a thetsa mōla oa metsi – Jorodane e ja meluoane ka nako eohle ea ha ho kotuloa – ₁₆metsi a phallelang tlase a ema, a kōkōmōha, a iketsa lekaka le eang morao, ho tloha motseng oa Adama, o haufi le Saretane. Metsi a phallelang Leoatleng la Araba, e leng Leoatle la Letsoai, a khaotsa ho phalla. Sechaba sa tšela malebana le Jeriko. ₁₇Baprista ba jereng areka ea selekane sa Morena ba ema themelele! mobung o ommeng, bohareng ba Jorodane, 'me Baiseraele bohle ba tšela mobung o ommeng, ho fihlela sechaba sohle se tšela Jorodane.