Motse oa Ai oa hapuoa
1Morena a re ho Joshua: “Se tšabe, 'me u se ke ua nyahama pelo. Nka bahlabani bohle, u ee motseng oa Ai. Bona, ke neelane ka khosi ea Ai matsohong a hao, eena le sechaba sa hae, le motse oa hae, le naha ea hae. 2U etse Ai le khosi ea eona joalokaha u ile ua etsa Jeriko le khosi ea eona. Le tla inkela feela thepa ea eona, le liphoofolo tsa eona, e le khapo ea lōna. Bahlabani ba lalle kamorao ho motse.”
3Eaba Joshua o tsamaea joalo, a e-na le bahlabani bohle, o ea Ai. Joshua a khetha mokhetho oa linatla tsa bahale ba likete tse mashome a mararo, 'me ba futuha har'a bosiu. 4A ba laela, a re: “Bonang mona, le tla lalla kamorao ho motse. Feela le se ke la ba hōle le motse, empa bohle le be malala-a-laotsoe. 5'Na, le banna bohle bao ke nang le bona, re tla leba motseng. Etlare ha ba e-tsoa ho re khahlanyetsa, joalokaha ba ile ba etsa ka lekhetlo la pele, ebe rea ba baleha. 6Ba tla re phalalisa ho fihlela re ba hulela thōko le motse, hobane ba tla re: ‘Batho bana ba re baleha joalokaha ba ile ba etsa ka lekhetlo la pele,’ 'me rōna re tla fela re ba balehe. 7Joale lōna le tla tsoa moo le ipatileng teng, le hape motse. Morena Molimo oa lōna, o tla neelana ka oona matsohong a lōna. 8Ha le se le o hapile, le tla o chesa ka mollo; le etse joalo ho ea ka taelo ea Morena. Joale ke le laetse!”
9Joshua a ba rōmela joalo. Ba ea moo ba tla lalla teng, ba lalla pakeng tsa Bethele le Ai, ka bophirimela ho Ai. Empa Joshua eena a hlola bosiu boo le bahlabani ba bang.
10Joshua a tsoha e sa le ka malungoalungoana, a bōkella bahlabani, a nyolohela Ai; eena le baholo ba Iseraele ba eteletse bahlabani pele. 11Bahlabani bohle ba neng ba e-na le eena ba nyoloha, ba atamela motse, ba ba ba fihla kapele ho oona. Ba hloma ka leboea ho Ai, khohlo ea e-ba pakeng tsa bona le motse. 12A nka bahlabani ba ka bang kete tse hlano, ba lalla pakeng tsa Bethele le Ai, ka bophirimela ho Ai. 13Ba emisa bahlabani ka lithekō: Lebōtho lohle le ne le le ka leboea ho motse, le la serao le ne le laletse ka bophirimela ho motse. Joshua eena a hlola bosiu boo ka khohlong.
Ntoa ea Ai
14Ha khosi ea Ai e bona mabōtho ana, banna ba motse ba potlakela ho tsoha ka malungoalungoana, ba tsoa motseng, ba futuhela Baiseraele: E le khosi le banna bohle ba eona, 'me ba ea thulana le Baiseraele motheong o lebang Araba. Empa khosi e ne e sa tsebe hore mabōtho a laletse kamorao ho motse. 15Joale Joshua le Baiseraele bohle ba etsa joalokaha eka ba etsa sealo, ba baleha ka tsela e eang lehoatateng. 16Ha bitsoa banna bohle ba neng ba le kahar'a motse oa Ai, ho phalalisa Baiseraele. Ba phalalisetsa bo-Joshua hōle le motse. 17Ha ho motho le ea mong Ai kapa Bethele, ea ileng a sala, a se ke a tsoa ho phalalisa Baiseraele. Ba siea motse o sa sireletsoa, ba phalalisa Baiseraele.
18Joale Morena a re ho Joshua: “Supa nq'a Ai ka lerumo le ka letsohong la hao, hobane ke tla neelana ka motse oo matsohong a hao.” Joshua a supa nq'a Ai ka lerumo le neng le le ka letsohong la hae. 19Bahlabani ba laletseng ba raoha kapele moo ba ipatileng teng, 'me hang-hang hoba Joshua a supe ka lerumo la hae ba matha, ba kena motseng, ba o hapa, ba potlakela ho o chesa ka mollo.
Ho timetsoa ha batho ba Ai
20Ha banna ba Ai ba hetla morao, ba bona mosi o tsoang motseng o fōqōhela holimo. Ba tšerehana, ba sitoa ho balehela kae kapa kae. Batho ba neng ba balehela lehoatateng ba khutla sekoele, ba boeana le baphalalisi ba bona. 21Ha Joshua le Baiseraele bohle ba bona hore balalli ba hapile motse, le hore mosi o tsoang motseng o fōqōhela holimo, ba boea sekoele, ba bolaea banna ba Ai. 22Le balalli ba tsoa motseng, ba khahlanyetsa banna ba Ai. Kahoo Baiseraele ba ba etsetsa sakana-la-nkōpe, ba ba hlaha ka mahlakoreng 'ohle. Ba ba bolaea, ho fihlela ho sa sala le ea mong, ho sa phonyoha le ea mong. 23Empa khosi ea Ai eona ba e tšoara e ntse e phela, ba e isa ho Joshua.
24Ha Baiseraele ba qetile ho bolaea baahi bohle ba Ai har'a naha, le har'a lehoatata moo ba neng ba ile ba ba phalalisetsa teng, 'me bohle ba bolailoe ka sabole ho fihlela ba timela, Baiseraele bohle ba khutlela Ai, ba bolaea masalla 'ohle ka sabole. 25Banna bohle le basali bohle ba ileng ba bolaoa tsatsing leo, e ne e le likete tse leshome le metso e 'meli, e leng batho bohle ba Ai.
26Joshua a se ke a khutlisa letsoho la hae le neng le supile Ai ka lerumo, ho fihlela baahi bohle ba Ai a ba timelitse ho hang. 27E bile liphoofolo feela, le thepa ea motse, tseo Baiseraele ba ileng ba ikhapela tsona, ho ea ka taelo ea Morena, eo a ileng a e laela Joshua. 28Joshua a chesa motse oa Ai, a o etsa litututsoana tsa masupi a kamehla eohle, 'me o joalo le kajeno-ea-bokajeno. 29A fanyeha khosi ea Ai sefateng, setōpō sa eona sa tloheloa moo ho fihlela mantsiboea. Ha letsatsi le likela Joshua a laela hore setōpō se fanyolloe sefateng. Ba se lahlela monyakong oa khoro e kenang ka motseng, ba se koahela ka qubu ea majoe. Qubu eo e ntse e le teng le kajeno-ea-bokajeno.
Ho hahoa aletare thabeng ea Ebale
30Joshua a hahela Morena Molimo oa Iseraele, aletare thabeng ea Ebale. 31A e haha joalokaha Moshe, mohlanka oa Morena, a ne a laetse bana ba Iseraele, joalokaha ho ngotsoe Bukeng ea Molao oa Moshe; aletare ea majoe ao ho seng motho ea kileng a a betla ka tšepe. Ba nyehella Morena ka mahlabelo a secheso holim'a eona, ba mo nyehella le ka mahlabelo a teboho.
Molao oa baloa
32Eare moo bana ba Iseraele ba ntseng ba talimile, Joshua a ngola holim'a majoe a aletare melao eo Moshe a neng a ba ngolle eona.
33Baiseraele bohle, le baholo ba bona, le baokameli ba bona, le baahlōli ba bona, le bajaki, le matsoalloa a naha, ba ema ka mahlakoreng a mabeli a areka ea selekane, kapele ho baprista, e leng Balevi, ba jarang areka ea selekane sa Morena. Karolo e 'ngoe ea sechaba e ne e talimile thabeng ea Gerisime, 'me karolo e 'ngoe e talimile thabeng ea Ebale, joalokaha Moshe, mohlanka oa Morena, a ne a ba laetse ho etsa joalo ha ba hlohonolofatsa sechaba sa Iseraele e le lekhetlo la pele.
34Kamora' mona Joshua a bala mantsoe 'ohle a Molao, e leng litlhohonolofatso le lithōhako, ho ea ka tsohle tse ngotsoeng Bukeng ea Molao. 35Ha ho lentsoe le le leng la tsohle tseo Moshe a neng a li laele, leo Joshua a sa kang a le balla phutheho eohle ea Baiseraele, le basali, le bana, le bajaki ba neng ba jakile har'a bona.
