JUDA 1

₁'Na Juda, mohlanka oa Jesu Kreste, le ngoan'abo Jakobo, kea le lumelisa, lōna ba bitsitsoeng, ba ratiloeng ke Molimo Ntate, 'me ba bōlōkoa ke Jesu Kreste, ke re: ₂Le ke le ekeletsoe lereko, le khotso, le lerato.

₃Baratuoa, ke ne ke chesehela ho le ngolla ka ho pholosoa hoo e leng ha rōna bohle. Joale ka ikutloa ke tlameha ho le ngolla, ke le khothatsa ho loanela tumelo e neiloeng bahalaleli hanngoe feela. ₄Ho na le batho ba bang ba keneng har'a lōna ka sekhukhu, bao kahlōlo ea bona e leng khale e ngotsoe. Ke ba khopo, ba nkang mohau oa Molimo oa rōna e le tumello ea ho etsa tse manyala; ke ba latolang Mong'a rōna ea inotši, le Morena oa rōna Jesu Kreste.

₅Le hoja le se le tseba tsena tsohle ka ho tlala, ke rata ho le hopotsa hore, e ne ere hoba Morena a pholose sechaba sa hae naheng ea Egepeta, hamorao o ile a felisa ba sa kang ba lumela. ₆Esita le mangeloi a sa kang a tiisetsa boemong ba 'ona, a furaletseng leaho la 'ona, oa bōlōketse kahlōlo ea Letsatsi le leholo, a le litlamong tse sa feleng, lefifing. ₇Ho bile joalo le ho baahi ba Sodoma le Gomora, le ba metse e ka mathōko. Le bona ba ile ba ineela bohlola, 'me ba lakatsa libōpuoa lisele. Metse ena e ileng ea oeloa ke kotlo ea mollo o sa feleng, ke mohlala o ka bonoang ke bohle.

₈Ka mokhoa o joalo le bona batho bana ba lorang, ba silafatsa 'mele ea bona, ba nyelisa borena ba Molimo, ba nyefola mangeloi a tlōtlehang. ₉Empa le lengeloi le leholo Mikaele, mohla le neng le tsekisana setōpō sa Moshe le Diabolosi, ha lea ka la mo ahlōla ka thōhako, feela le itse: “Morena a ke a u khalemele.” ₁₀Batho bana ba nyefola tseo ba sa li tsebeng. Le tseo ba li tsebang ka tlhaho, joalokaha le liphoofolo tse se nang kutloisiso li li tseba, ba itimetsa ka tsona.

₁₁Ba malimabe hakaakang! Ba latetse tsela ea Kaine. Ba itihetse phosong ea Bileame ka baka la ho ipatlela moputso. Ba timetse ka baka la ho hanyetsa joaloka Kora.

₁₂Ke bona ba silafatsang mekete ea lōna ea Bakreste ka ho ja ba se na lihlong, ba hopotse limpa tsa bona feela. Ke maru a se nang pula, a fefoloang ke moea. Ke lifate tse sa beheng, esita le ka nako ea hoetla, tse shoeletseng ruri, tse fōthōtsoeng. ₁₃Ke maqhubu a befileng a leoatle, a tlōkōmang lekoeba la lihlong tsa bona. Ke linaleli tse lelerang, tse bōlōketsoeng lefifi le letšo-letšo, ka ho sa feleng.

₁₄Ke ka bona batho bana Henoke, oa molōko oa bosupa ho tloha ho Adama, a ileng a porofeta, a re: “Bonang, Morena o tla le mangeloi a hae a halalelang, a likete-kete, ₁₅ho tla ahlōla bohle, le ho khalemella bohle ba khopo mesebetsi eohle ea bona e khopo, le lipolelo tsohle tse mpe, tseo baetsalibe bao ba khopo ba mo sitetsoeng ka tsona.” ₁₆Batho bana ke bakoma-komi, bakhanani, ba laoloang ke litakatso tsa bona, bao melomo ea bona e buang tsa boikhōhōmōso, ba eang ka tšobotsi ho iphumanela tsa bona.

₁₇Lōna baratuoa, le mpe le hopole lipolelo tse boletsoeng e sa le pele ke baapostola ba Morena oa rōna Jesu Kreste. ₁₈Ba itse ho lōna: “Mehleng ea bofelo ho tla tla basomi ba laoloang ke litakatso tsa bona tse khopo.” ₁₉Batho bana ba baka likarohano; ke ba lefatše, ba se nang Moea oa Molimo.

₂₀Ha e le lōna, baratuoa, ikaheng holim'a mothèo oa tumelo ea lōna, e halalelang haholo, le ntse le rapela ka thuso ea Moea o Halalelang. ₂₁Ipōlōkeng leratong la Molimo, le ntse le lebeletse hore mohau oa Morena oa rōna Jesu Kreste o le ise bophelong bo sa feleng. ₂₂Hauhelang ba qea-qeang; ₂₃le ba pholose ka ho ba tšōla mollong. Ba bang bona le ba hauhele, empa le ntse le e-na le tšabo; le hloee esita le seaparo se silafalitsoeng ke bona.

₂₄Ho ea nang le matla a ho le bōlōka hore le se ke la khōptjoa, le a ho le hlahisa kapel'a tlōtla ea hae le se na sekoli, le nyakaletse, ₂₅ho Molimo ea inotši, Mopholosi oa rōna ka Jesu Kreste, Morena oa rōna, e be tlōtla, le boholo, le matla, le borena, tseo a bileng le tsona pele ho linako, le joale, le kamehla eohle. A ho be joalo!