KOLI-EA-MALLA 4

₁Khauta e phatsimang

e fifetse hakaakang!

Khauta e hloekileng

e silafetse hakaakang!

Majoe a bohlokoa

a qhalane kahohle,

hukung tsa literata tsohle!

₂Bara ba Sione, mokhetho o khabane,

bara bao bohlokoa ba bona

e n'e ka ba khauta,

kajeno ba tšoana

le pitsa tsa letsopa,

ntho tse entsoeng

ke matsoho a sebōpi!

₃Phokojoe le tsona li ee li nyantše,

li ee li nyantše malinyane a tsona;

empa chaba sa heso

se sehlōhō haholo,

se tšoana le limpshe tsa lehoatata!

₄Leme la lesea

le khomarela mahalapeng,

le khomarela teng

ka baka le lenyora;

ba banyenyane ba sikila bohobe,

empa ha ho ea ba neang

le sengoathoana.

₅Ba kileng ba phela

ka limènyèmènyè,

ba bolaoa ke tlala har'a literata;

ba neng ba apara tse mabokoboko,

kajeno ba paqame lithōtōbōlōng.

₆Kotlo ea chaba sa heso

e kholo haholo,

ho feta le ea Sodoma,

e neng e timetsoe

ka ho panya ha ntši,

e sa timetsoe ke letsoho la motho.

₇Mahosana a ne a phatsima

ho feta lehloa,

bosoeu ba 'ona

bo feta le ba lebese,

'mele e le mesehla

ho feta mabenyane,

bokhabane ba 'ona

e ka ba majoe a safire.

₈Empa kajeno botšo ba 'ona

bo feta ba mooa,

le literateng

ha a sa tsejoa ke batho;

letlalo la 'ona

le manne holim'a masapo,

le omeletse, le se le ka lehong.

₉Ho lehlohonolo

ba bolailoeng ka sabole,

ba lehlohonolo

ho feta ba bolaoang ke sekoboto,

ba fellang likobong

ho fihlela ba e-shoa,

ka baka la ho hloka

tse behoang ke naha.

₁₀Basali ba nang le motlopotlo

oa ho tsoala,

ka matsoho a bona

ba apeha bana ba bona;

ba ba apeha,

ea e-ba lijo tsa bona,

nakong ea ha chaba sa heso

se timetsoa.

₁₁Morena o phethahalitse

tsa khalefo ea hae,

bohale bo tlōkōmang ba hae

o bo hlatsitse.

O hotelitse mollo

motseng oa Sione,

oa chesa methèo

ea motse oa Sione.

₁₂Likhosi tsa lefatše

li ne li sa kholoe,

le baahi bohle ba lefatše

ba sa kholoe,

hore khoro tsa motse oa Jerusalema

li ka kenoa,

tsa kenoa ke sera,

tsa kenoa ke mofutuhi!

₁₃Li kenoe ka baka la libe

tsa baporofeta ba oona,

ka baka la makhopo

a baprista ba oona,

ba tšolotseng mali a ba lokileng,

ba a tšolla

har'a motse oa Jerusalema.

₁₄Ba 'nile ba lelera

sa banna ba lifofu,

ba lelera har'a literata tsa motse;

ba itšilafalitse ka mali haholo,

hoo ho seng ea ka amang

liaparo tsa bona.

₁₅“Suthang, le silafetse!”

ho rialo sechaba.

“Suthang! Suthang!

Le se ke la re ama!”

Leha ba lelera har'a balichaba,

ha ho na moo

ba fumanang tjako teng!

₁₆Morena ka sebele o ba qhalantse,

ha a ka ke a hlola a sa ba tsotella.

Lira li rōletse baprista hlompho,

baholo ba sechaba ha li sa ba natsa.

₁₇Re tonne mahlo ra ba ra khathala,

ra lebella thuso,

ra se ke ra e bona!

Re lebeletse

re le holim'a litora,

ra lebella

chaba se sitoa ho re pholosa!

₁₈Lira li lisitse metsamao ea rōna,

re sitoa le ho tsamaea

literateng tsa rōna.

Bofelo ba rōna bo se bo atametse,

litšiu tsa rōna li se li baliloe,

bofelo ba rōna bo se bo fihlile.

₁₉Baphalalisi ba rōna

ba lebelo haholo,

ba lebelo le ho feta lintsu li fofa;

ba re phalalisitse holim'a lithaba,

ba re lalla har'a lehoatata.

₂₀Motlotsuoa oa Morena,

eo re phelang ka eena,

o il'a oela mameneng a bona;

eena eo re neng re bua ka eena,

re re: “Tlas'a moriti oa hae

re tla phela har'a balichaba!”

₂₁Thabang, le nyakalle,

lōna baahi ba Edomo,

lōna ba ahileng naheng ea Use,

le lōna nyakallang!

Senoelo sena

se tla fetisetsoa ho lōna,

le tahoe, le tsole,

le sale le le feela!

₂₂Uena Sione,

kotlo ea hao e tla fela,

ha u ka ke ua hlola

u isoa bothōpuoeng.

Empa uena Edomo,

u tla otleloa bokhopo ba hao,

libe tsa hao Morena a li senole.