Melao e amanang le lepera
1Morena a bua ho Moshe le ho Arone, a re: 2“Ha motho a ka tsoa lekukuma, kapa lekhōphō, kapa setlapeli, 'me ho bonahala eka hona ho tla iketsa lepera 'meleng oa hae, o tla tlisoa ho moprista Arone, kapa ho e mong oa bara ba hae, bao e leng baprista. 3Moprista o tla hlahloba lefu lena le 'meleng oa motho eo. Ha a bona hore mohoete o soeufetse, 'me setlapeli sena se phobetse, hoo ke lefu la lepera. Ha moprista a se a mo hlahlobile o tla phatlalatsa hore motho eo o sesila. 4Empa haeba setlapeli sena se sa phobela, 'me mohoete o holim'a sona o sa soeufala, moprista, o tla etsa hore motho eo a lule a le mong ka matsatsi a supileng. 5Ka letsatsi la bosupa moprista o tla boela a mo hlahloba, 'me ha a bona hore lefu ha le tsoele pele, moprista o tla boela a etsa hore motho eo a se ke a lula le batho ba bang ka matsatsi a supileng. 6Ka letsatsi la bosupa moprista o tla boela a mo hlahloba khetlo la bobeli, 'me ha a bona hore setlapeli sea fola, ha se anele 'mele, moprista o tla phatlalatsa hore o hloekile, ke lekhōphō feela. Motho eo o tla hlatsoa liaparo tsa hae, 'me o tla hloeka. 7Haeba lekhōphō le bonahala hore le anela 'mele, kamora' hore motho enoa a itlhahise kapele ho moprista, hore a hloekisoe, motho eo o tla boela a itlhahisa ho moprista khetlo la bobeli. 8Moprista o tla boela a mo hlahloba, 'me haeba lekhōphō lena le bonahala le ntse le anela 'mele, moprista o tla phatlalatsa hore motho eo o sesila, hona ke lefu la lepera.
9“Ha motho a tšoeroe ke lefu la lepera, o tla tlisoa ho moprista. 10Moprista o tla mo hlahloba, 'me haeba ho e-na le lekukuma le lesoeu, le soeufalitse mohoete, 'me lekukuma le etsa sebebe, 11eba ke lefu la lepera le sa foleng, moprista o tla phatlalatsa hore motho eo o sesila. Ha a ka ke a mo koalla, hobane o se a ntse a le sesila.
12“Haeba lepera le anela 'mele oohle, ho tloha hloohong ho isa maotong, le 'meleng oohle kamoo moprista a bonang kateng, 13moprista o tla mo hlahloba, 'me haeba lepera le anetse 'mele oohle, o tla phatlalatsa hore motho eo o hloekile, 'mele oa hae o soeufetse, 'me o hloekile. 14Empa mohla ho hlahang sebebe, o tla ba sesila. 15Moprista o tla hlahloba sebebe, a phatlalatse hore motho eo o sesila. Sebebe sena se sa hloekang ke lefu la lepera. 16Empa haeba sebebe se fetoha, se soeufala hape, motho eo a ee ho moprista hape. 17Moprista o tla mo hlahloba, 'me ha a fumana sebebe se seoufetse, o tla phatlalatsa hore lefu leo le folile, motho eo o hloekile.
18“Ha motho a e-tsoa lethōpa 'meleng oa hae, leo kamora' hore le fole, 19le sieang khoho e tšoeu, e kokomohileng, kapa lebali le benyang, le bofubelu bo bosoeu, motho eo o tla itlhahisa ho moprista. 20Moprista o tla le hlahloba, 'me haeba lebali leo le bonahala le phobetse, mohoete oa lona o seoufetse, moprista o tla phatlalatsa hore motho eo o sesila. Ke lefu la lepera le qalehileng ka mokhoa oa lethōpa. 21Empa ha moprista a mo hlahloba, 'me a fumana hore ha ho mohoete o soeufetseng, kapa letlalo le phobetseng, empa lethōpa lea fola, moprista o tla etsa hore motho eo a lule a le mong ka matsatsi a supileng. 22Haeba lefu lena le anela 'mele, moprista o tla phatlalatsa hore motho eo o sesila, o na le lepera. 23Empa haeba lebali leo le le bofubelu bo benyang, le sa anela 'mele oohle, hoo ke lebali la lethōpa, moprista o tla phatlalatsa hore motho eo o hloekile.
24“Haeba motho a e-na le sepatlō sa ho cha, 'me mollo ona o e-tsoa, o etsa lebali le lefubelu kapa le lesoeu, 25moprista o tla hlahloba motho eo. Haeba mohoete o sepatlōng o soeufetse, 'me ho bonahala ho phobetse, hoo ke lefu la lepera, le qalehileng ka ho chesoa ke mollo. Moprista o tla phatlalatsa hore motho eo o sesila. Ke lefu la lepera. 26Empa ha moprista a mo hlahloba, 'me a fumana hore ha ho mohoete o soeufetseng lebaling leo le benyang, kapa ha ho letlalo le phobetseng, feela lethōpa le fola, moprista o tla etsa hore motho eo a lule a le mong ka matsatsi a supileng. 27Ka letsatsi la bosupa moprista o tla mo hlahloba; haeba lefu lena le anela 'mele, moprista o tla phatlalatsa hore motho eo o sesila; hoo ke lefu la lepera. 28Empa haeba leqebeng leo ho sala lebali le bofubelu bo benyang, le sa anelang 'mele oohle, empa leqeba leo le fola, hoo ke lebali la ho chesoa ke mollo.
29“Haeba monna kapa mosali a e-na le seso hloohong kapa selelung, 30moprista o tla mo hlahloba. Ha a fumana hore se phobetse, mohoete o mosesanyane, o mosehlanyana, moprista o tla phatlalatsa hore motho eo o sesila; hoo ke lefu la 'mokoana, ke lepera le tsoang motho hloohong kapa selelung. 31Ha moprista a hlahloba lefu lena la 'mōkoana, 'me ho bonahala hore letlalo ha lea phobela, ho se na le moriri o motšo, moprista o tla etsa hore motho enoa ea tšoeroeng ke lefu la 'mokoana a lule a le mong ka matsatsi a supileng. 32Ka letsatsi la bosupa moprista o tla hlahloba lefu leo, 'me haeba lefu lena la 'mōkoana le sa anela 'mele, 'me ho se na mohoete o mosehlanyana, ho bonahala hore 'mōkoana ha oa phobela, 33motho eo o tla beoloa, empa moo 'mōkoana o entseng lebali ho se ke ha beoloa. Moprista o tla etsa hore motho eo ea tšoeroeng ke lefu lena a lule a le mong ka matsatsi a supileng. 34Ka letsatsi la bosupa moprista o tla hlahloba lefu lena la 'mōkoana; haeba le sa anela 'mele, 'me ho bonahala hore ha lea phobela, moprista o tla phatlalatsa hore motho eo o hloekile. Motho eo o tla hlatsoa liaparo tsa hae, 'me e tla ba o hloekile. 35Empa haeba lefu lena la 'mōkoana le anela 'mele kamora' hore ho phatlalatsoe hore motho eo o hloekile, 36moprista o tla mo hlahloba, 'me haeba lefu leo la 'mōkoana le anetse 'mele, ha ho hlokahale hore moprista a hlahlobe hore na ho na le mohoete o mosehlanyana; motho eo o sesila. 37Empa haeba ho bonahala hore lefu lena ha le tsoele pele, 'me mohoete o motšo o metse teng, lefu lena la 'mōkoana le folile. Motho eo o hloekile, 'me moprista o tla phatlalatsa hore motho eo o hloekile.
38“Haeba monna kapa mosali a e-na le mabali a masoeunyana a benyang, 39moprista o tla a hlahloba. Haeba mabali ana a benyang, a 'meleng a le bosoeuyana bo fifetseng, 'me a supa hore aa nyamela, e tla ba ke lekhōphōnyana feela; motho eo o hloekile.
40“Ha motho a fōfōreha moriri hloohong, o na le lefatla; o hloekile. 41Haeba motho a fōfōreha moriri phatleng, o na le lefatla phatleng, o hloekile. 42Ha motho enoa a e-ba le litlapeli holim'a lefatla le har'a hlooho, kapa phatleng, hoo ke lepera le tsoang hloohong, kapa phatleng. 43Moprista o tla mo hlahloba, 'me haeba holim'a lefatla le hloohong kapa phatleng, ho e-na le litlapeli tse bofubelu bo bosoeu, tse tšoanang le tsa lepera le bang teng 'meleng, 44motho eo o na le lepera; o sesila. Moprista o tla phatlalatsa hore motho eo o na le sesila, o na le lepera le tsoileng hloohong.
45“Motho ea nang le lepera o tšoanetse ho apara liaparo tse maharasoa, moriri oa hae o hlanthollehe, a koahele molomo o kaholimo, 'me a hōoe, a re: ‘Ke na le sesila! Ke na le sesila!’ 46Ha a ntse a tšoeroe ke lefu lena, o tla ba le sesila, hobane ruri o sesila. O tla lula a le mong kantle ho liahelo.”
Lepera le liaparong
47“Haeba seaparo se e-na le lefu la lepera, e ka ba seaparo sa boea, kapa sa lesela la lene, 48kapa se entsoeng ka lene, kapa boea, kapa eng le eng e entsoeng ka letlalo, 49'me seaparong sena se entsoeng ka letlalo, kapa se entsoeng ka lesela la lene, kapa ka boea, kapa seaparong sefe le sefe se entsoeng ka letlalo, ho e-na le botalanyana kapa bofubelunyana ba lefu lena, hoo ke lefu la lepera, 'me le tla bontšoa moprista. 50Moprista o tla hlahloba lefu lena, 'me phahlo e nang le lefu lena e tla tlosoa ho tse ling ka matsatsi a supileng. 51Ka letsatsi la bosupa moprista o tla boela a hlahloba seaparo seo. Haeba lefu lena le anetse seaparo, kapa lesela le lene, kapa le lōhiloeng ka boea, kapa letlalo le sebelisoang mosebetsing ofe kapa ofe, hoo ke lepera le tšoaetsang, 'me seaparo seo se sesila. 52Moprista o tla chesa seaparo sena sa lesela la lene, kapa se lōhiloeng ka boea, kapa phahlo efe le efe e entsoeng ka letlalo, e nang le lefu lena. Ke lepera le tšoaetsang. Seaparo seo se tla chesoa ka mollo.
53“Ha moprista a hlahloba seaparo sena se entsoeng ka lene, kapa se lōhiloeng ka boea, kapa phahlo efe le efe e entsoeng ka letlalo, 'me a bona hore lefu lena ha lea se anela, 54o tla laela hore ho hlatsuoe ntho eo e nang le lefu lena, 'me a boele a tlose seaparo seo liaparong tse ling khetlo la bobeli ka matsatsi a supileng. 55Ha se se se hlatsoitsoe, moprista o tla se hlahloba, 'me ha a fumana hore ha ho na phetoho, le hoja lefu le sa anela seaparo, phahlo eo e sesila. E chesoe ka mollo, e sesila kahohle.
56“Ha seaparo se se se hlatsoitsoe, 'me moprista a bona hore lefu lena le folile, o tla tabola karolo ea seaparo e nang le lefu, e ka ba se entsoeng ka letlalo, kapa ka lesela la lene, kapa se lōhiloeng ka boea. 57Ha lefu lena le boela le hlaha hape seaparong sa lesela la lene, kapa se lōhiloeng ka boea, kapa phahlong efe le efe e entsoeng ka letlalo, lefu leo le ntse le le matla; seaparo se nang le lefu lena se chesoe ka mollo. 58Ha seaparo sa lesela la lene, kapa se lohiloeng ka boea, kapa phahlo efe le efe e entsoeng ka letlalo, e se e hlatsoitsoe, 'me lefu le nyamela ho eona, e tla hlatsuoa khetlo la bobeli, 'me e tla ba e hloekile.”
59Ona ke molao oa lefu la lepera le seaparong se lōhiloeng ka boea, kapa sa lesela la lene, kapa phahlong efe le efe e entsoeng ka letlalo, ho bona hore na e hloekile kapa e sesila.
