Thōmo ea ba mashome a supileng a metso e 'meli
1Kamora' tsena Morena a khetha ba bang ba mashome a supileng a metso e 'meli, a ba rōma ka bobeli ho mo etella pele motseng o mong le o mong le sebakeng se seng le se seng moo a neng a hopotse ho ea teng. 2A re ho bona: “Ruri kotulo e kholo, empa basebetsi ha ba bakae; ka baka leo, rapelang Mong'a kotulo hore a rōmele basebetsi kotulong ea hae. 3E-eang! Bonang, ke le rōma joaloka likonyana har'a liphiri. 4Le se ke la nka sepache, leha e le mokotlana, leha e le meqathatso, 'me le se ke la lumelisa motho tseleng.
5“Tlung efe le efe eo le kenang ho eona, le qale ka ho re: ‘Khotso e be tlung ena!’ 6Haeba ngoan'a khotso a le teng moo, khotso ea lōna e tla ba le eena, empa ho seng joalo, e tla khutlela ho lōna. 7Le lule tlung eona eo, le e-ja, le e-noa le bona seo ba le fang sona, hobane ea sebetsang o lokeloa ke moputso oa hae. Le se ke la ea le matlo.
8“Motseng ofe le ofe oo le kenang ho oona, 'me ba le amohela, le je tse beoang kapel'a lōna, 9le folise ba kulang ba ho oona, le re ho bona: ‘'Muso oa Molimo o se o le fihletse!’ 10Empa motseng ofe le ofe oo le kenang ho oona, 'me ba sa le amohele, le tsoele litseleng tsa oona, le re: 11‘Le lerōle la motse oa lōna, le re khomaretseng maotong, re le hlōhlōrela lona e le bopaki bo le qosang. Feela le tsebe hona, hore 'Muso oa Molimo o se o fihlile.’ 12Kea le bolella hore ka letsatsi leo kahlōlo ea Sodoma e tla ba bobebe ho feta ea motse oo.
Bomalimabe ba metse e sa bakeng
13“U malimabe uena Korasine! U malimabe uena Bethesaida! hobane hoja liketso tse hlollang tse entsoeng kahar'a lōna li ne li entsoe Tire le Sidone, batho ba teng ba ka be ba bakile khale, ba apere tse mahoashe, ba lutse moloreng. 14Empa kahlōlong, litaba tsa Tire le Sidone li tla mamelleha ho feta tsa lōna. 15Na le uena Kaperenauma,
“ ‘ebe u tla phahamisetsoa
leholimong?
U tla liheloa tlase libitleng!’
16“Ea le utloang oa nkutloa, ea le hanang oa nkhana, 'me ea nkhanang o hana ea nthōmileng.”
Ho khutla ha ba mashome a supileng a metso e 'meli
17Joale ba mashome a supileng a metso e 'meli ba khutla ka thabo, ba re: “Morena, esita le bademona ba ikokobeletsa rōna ka baka la lebitso la hao!”
18Jesu a re ho bona: “Ke bone Satane a e-oa leholimong joaloka lehalima. 19Bonang, ke le neile matla a ho hata linōha le liphepheng, le a ho hlōla matla 'ohle a sera, 'me ha le ka ke la ntšuoa kotsi ke letho. 20Leha ho le joalo le se ke la thabela hobane meea e litšila e ikokobeletsa lōna, empa le thabele hobane mabitso a lōna a ngotsoe maholimong.”
Jesu oa nyakalla
21Ka eona nako eo, Jesu a nyakalatsoa ke Moea o Halalelang, a re: “Kea u boka, Ntate, Morena oa leholimo le oa lefatše, hobane litaba tsena u li patetse ba bohlale le ba seli, 'me u li senoletse masea. E, Ntate, hobane u khahliloe joalo.
22“Ntate o 'neile tsohle, 'me ha ho ea tsebang hore na Mora ke mang, haese Ntate; le hore na Ntate ke mang, haese Mora, le eo Mora a ratang ho mo senolela eena.”
23A retelehela ho barutuoa ba le 'notši, a re: “Ho lehlohonolo mahlo a bonang tseo le li bonang! 24Kea le bolella hore baporofeta ba bangata le mahosi a mangata ba ne ba lakalitse ho bona tseo le li bonang, empa ha baa ka ba li bona; le ho utloa tseo le li utloang, empa ha baa ka ba li utloa.”
Mosamaria ea molemo
25Joale ha ema Setsebi se seng sa Molao, 'me ka ho leka Jesu, sa re: “Moruti, eka khona ke etse'ng hore ke rue bophelo bo sa feleng?”
26Eaba o re ho eena: “Ho ngotsoe'ng Molaong? U o bala joang?”
27Eena a araba, a re: “U tla rata Morena Molimo oa hao ka pelo ea hao eohle, le ka moea oa hao oohle, le ka matla a hao 'ohle, le ka maikutlo a hao 'ohle, 'me u rate le oa heno joalokaha u ithata.”
28Jesu a re ho eena: “U arabile hantle. Etsa hoo, 'me u tla phela.”
29Empa eena ka ho rata ho itokafatsa, a re ho Jesu: “Oa heso ke mang?”
30Jesu a araba, a re: “Motho e mong o ne a theoha Jerusalema a e-ea Jeriko, 'me a oela har'a linokoane tse ileng tsa mo hlobolisa, tsa mo khakhatha, tsa mo siea a le makhatheng a ho shoa. 31Ha etsahala hore moprista e mong a theohe ka tsela eo, 'me ha a 'mona a mo koekoetla. 32Ka mokhoa oona oo le Molevi a fihla sebakeng seo, ha a 'mona a mo koekoetla. 33Empa Mosamaria e mong, ea neng a eta, a fihla teng; ha a 'mona a mo utloela bohlōkō, 34a atamela, a tlamella maqeba a hae, a a tšèla ka ole le ka veine, a nt'o mo palamisa pelesa ea hae, a mo isa tlung ea baeti, 'me a mo oka. 35Ka la hosasane a ntša denare tse peli, a li nea mong'a ntlo ea baeti, a re: ‘Ak'u mo oke, 'me seo u ka se sebelisang kathōko ho sena, ke tla u buseletsa sona ha ke khutla.’
36“Ho ba bararo bao, u re eo e bileng oa habo motho ea ileng a oela har'a linokoane ke mang na?”
37A re: “Ke ea ileng a mo etsetsa mohau.”
Jesu a re ho eena: “E-ea, u etse joalo le uena!”
Jesu o chakela Maretha le Maria
38Eare ha ba ntse ba e-ea, Jesu a kena motseng o mong; eaba mosali e mong ea bitsoang Maretha oa mo amohela. 39O ne a e-na le ngoan'abo ea bitsoang Maria, ea neng a lutse maotong a Morena, a mametse seo a se bolelang. 40Empa Maretha o ne a tšoarehile ke mosebetsi o mongata; joale a atamela, a re: “Morena, na ha u tsotelle ha ngoan'eso a ntlohela ke sebetsa ke le mong? Ak'u re ho eena a nthuse hle!”
41Morena a mo araba, a re: “Maretha, Maretha, ua itšoenya, 'me u ikhathatsa ka tse ngata, 42empa ho hlokeha ntho e le 'ngoe: Maria o ikhethetse se molemo, seo a ke keng a se amohuoa.”
