Setšoantšo sa mosali oa mohlolohali le moahlōli
1Joale Jesu a ba bolella setšoantšo sa hore eka khona ba rapele kamehla, 'me ba se ke ba khathala. 2A re: “Moahlōli ea sa tšabeng Molimo, ea sa reng letho ka motho, o ne a le teng motseng o mong. 3Ho ne ho e-na le mosali oa mohlolohali motseng oo, 'me o ne a ee a tle ho eena, a re: ‘Nkahlōlele ho ea ntsekisang.’
4“A hana ka nako e itseng, empa hamorao a inahana, a re: ‘Leha ke sa tšabe Molimo, le motho ke sa re letho ka eena, 5feela kahobane mohlolohali enoa oa nkhathatsa, ke tla mo ahlōlela, esere qetellong a 'ngamola hlooho ka ho 'na a e-tla.’ ”
6Eaba Morena o re: “Utloang seo moahlōli ea sa lokang a se bolelang. 7Na Molimo ha a na ho ahlōlela bakhethoa ba hae ba mo rapelang motšeare le bosiu? Na o tla ba liehela? 8Kea le bolella hore o tla ba ahlōlela kapele-pele. Leha ho le joalo, na Mor'a Motho ha a e-tla, o tla fumana tumelo lefatšeng?”
Setšoantšo sa Mofarisi le molekhetho
9Le ba bang ba neng ba itšepa hore ba lokile, 'me ba nyelisa ba bang, Jesu a ba bolella setšoantšo sena, a re: 10“Banna ba babeli ba ile ba nyolohela Tempeleng ho ea rapela, e mong e le Mofarisi, e mong e le molekhetho. 11Mofarisi a ema, a rapella ka pelong, a re: ‘Molimo, kea u leboha ha ke se joaloka batho ba bang, bao e leng balotsana, ba sa lokang, lifebe, kapa leha e le joaloka molekhetho enoa. 12Ke itima lijo habeli ka beke; ke ntša karolo e le 'ngoe ho tse leshome ea tsohle tseo ke li fumanang.’
13“Empa molekhetho a ema hōjana, a tšaba le ho talima leholimong, a itšoabela, a re: ‘Molimo, ak'u nkhauhele, 'na moetsalibe.’
14“Kea le bolella, enoa o theohetse tlung ea hae a lokafalitsoe ho e-na le eane, hobane e mong le e mong ea iphahamisang o tla kokobetsoa, 'me ea ikokobetsang o tla phahamisoa.”
Jesu o hlohonolofatsa masea
15Joale batho ba tlisa le masea ho Jesu hore a tle a a ame, empa ha barutuoa ba bona hoo, ba ba khalemela. 16Empa Jesu a a bitsa, a re: “Lesang bana ba tle ho 'na, le se ke la ba thibela, hobane 'Muso oa Molimo ke oa ba joaloka bona. 17Ruri kea le bolella, mang le mang ea sa amoheleng 'Muso oa Molimo joaloka ngoana, ha a ka ke a kena ho oona.”
'Musi oa morui
18'Musi e mong a botsa Jesu, a re: “Moruti ea molemo, nka etsa eng hore ke tle ke rue bophelo bo sa feleng?”
19Jesu a re ho eena: “U mpitsetsa'ng ea molemo? Ha ho ea molemo haese a le mong, e leng Molimo. 20U tseba litaelo tse reng: ‘U se ke ua feba; u se ke ua bolaea; u se ke ua utsoa; u se ke ua etseletsa motho e mong; hlompha ntat'ao le 'm'ao.’ ”
21A re: “Tsena tsohle ke li bōlōkile ho tloha bocheng ba ka.”
22Eare ha Jesu a utloa hoo, a re ho eena: “U sa haelloa ke ntho e le 'ngoe: Rekisa tsohle tseo u nang le tsona, u abele mafutsana, 'me u tla ba le letlotlo leholimong, joale u tle, u ntatele.”
23Empa ha a utloa tsena, a soaba haholo, hobane o ne a ruile haholo.
24Eitse ha Jesu a bona hore o soabile haholo, a re: “Ho thata hakaakang ho barui ho kena 'Musong oa Molimo! 25Ho bonolo hore kamele e tsoe lesobeng la nale, ho e-na le hore morui a kene 'Musong oa Molimo.”
26Ba utloileng ba re: “Ke mang he, ea ka pholosoang!”
27Jesu a re: “Tse sitang batho ha li site Molimo.”
28Eaba Petrose o re: “Bona, rōna re tlohetse ling tsa rōna, ra u latela.”
29Jesu a re ho bona: “Ruri kea le bolella hore ha ho le ea mong ea tlohetseng ntlo, kapa mosali, kapa bana babo, kapa batsoali, kapa bana, ka baka la 'muso oa Molimo, 30eo nakong ena a ke keng a buseletsoa haholo, 'me mehleng e tlang a amohela bophelo bo sa feleng.”
Jesu o bua ka lefu la hae le tsoho ea hae khetlo la boraro
31Hoba Jesu a nkele ba leshome le metso e 'meli kathōko, a re ho bona: “Bonang, re nyolohela Jerusalema, 'me tsohle tse ngotsoeng ke baporofeta ka Mor'a Motho, li tla phethahala, 32hobane o tla neeloa balichaba, a songoe, a etsoe hampe, a tšoeloe ka mathe; 33hoba ba mo shape, ba tla 'molaea, 'me ka letsatsi la boraro o tla tsoha.”
34Empa ha baa ka ba utloisisa letho la litaba tsena; polelo ena e ne e ba siretse, ba sa utloisise se boleloang.
Pholiso ea mokōpi oa sefofu haufi le Jeriko
35Eitse ha Jesu a atamela Jeriko, sefofu se seng sa be se lutse pel'a tsela, se kōpa. 36Eare ha se utloa letšoele le feta, sa botsa hore na ekaba hoo ke'ng. 37Ba se bolella hore Jesu oa Naseretha oa feta.
38Eaba sea hōoa, se re: “Jesu, mor'a Davida, nkhauhele!”
39Ba tsamaeang kapele ba se khalemela hore se thōle, empa sona sa eketsa ho hōoa haholo, sa re: “Mor'a Davida, nkhauhele!”
40Jesu a ema, a laela hore se tlisoe ho eena. Eare hoba se atamele, a se botsa, a re: 41“U rata ha ke u etsetsa eng?”
Sa re: “Morena, nke ke boele ke bone!”
42Jesu a re ho sona: “Boela u bone! Tumelo ea hao e u folisitse.” 43Hang-hang sa boela sa bona, 'me sa latela Jesu se ntse se tlotlisa Molimo. Batho bohle, ha ba bona hoo, ba rorisa Molimo.
