LUKA 9

₁Jesu a bitsa ba leshome le metso e 'meli, a ba nea matla le taolo holim'a bademona bohle le matla a ho folisa maloetse, ₂a ba rōma ho ea phatlalatsa 'Muso oa Molimo le ho folisa ba kulang, ₃a re ho bona: “Le se ke la nka letho ha le eta, leha e le lere, leha e le mokotlana, leha e le bohobe, leha e le chelete, leha e le liaparo tse peli motho ka mong. ₄Tlung efe le efe eo le kenang ho eona, le lule teng, ho fihlela le tloha. ₅Ha le e-tsoa motseng oo ba sa le amoheleng ho oona, le hlōhlōre lerōle maotong a lōna, e be bopaki bo ba qosang.” ₆Hoba ba tlohe, ba ea le metse ba ntse ba bolela molaetsa o molemo, ba folisa kahohle.

₇Morena Heroda a utloa tsohle tse etsahalang, 'me a tsieleha hobane ba bang ba ne ba re, Johanne o tsositsoe bafung, ₈ba bang ba re, ho hlahile Elia, ba bang ba re, ho tsohile moporofeta e mong oa ba boholo-holo. ₉Empa Heroda a re: “Johanne ke mo khaotse hlooho. Joale eo ke mang eo ke utloang ho boleloa tse joalo ka eena?” Eaba o batla ho 'mona.

₁₀Ha baapostola ba khutlile, ba phetela Jesu tsohle tseo ba li entseng. A ba nka, ba tloha ba le 'notši, ba lebisa motseng o bitsoang Bethesaida. ₁₁Eare ha matšoele a tseba, a mo latela. Hoba a a amohele, a bua le 'ona ka 'Muso oa Molimo, a folisa ba hlokang ho folisoa.

₁₂Ha letsatsi le qala ho rapama, ba leshome le metso e 'meli ba atamela, ba re ho eena: “Lokolla letšoele, hore batho ba ee metseng le metsaneng e re teetseng hare, ba robaletse teng, 'me ba fumane se jeoang, hobane mona re nahathothe.”

₁₃A re ho bona: “Ba fepeng e le lōna!”

Empa ba re: “Ha re na letho ntle ho linkhoa tse hlano le litlhapi tse peli feela, haese ha re ka ea rekela batho bana bohle lijo!” ₁₄E ne e le banna ba ka bang kete tse hlano.

A re ho barutuoa ba hae: “Ba luliseng ka lihlopha tsa ba ka bang mashome a mahlano se le seng.” ₁₅Ba etsa joalo, ba ba lulisa bohle. ₁₆Jesu a nka linkhoa tse hlano le litlhapi tse peli, a lelalla leholimong, a li hlohonolofatsa, a li ngoatha, a li nea barutuoa ho li abela letšoele. ₁₇Bohle ba e-ja, ba khōra, 'me ha bōkelloa lirōtō tse leshome le metso e 'meli tsa makumane a setseng.

₁₈Eitse ha Jesu a ntse a rapela boinotšing, barutuoa ba e-na le eena, a ba botsa, a re: “Matšoele a re ke mang?”

₁₉Ba araba, ba re: “Johanne Mokolobetsi; ba bang ba re Elia, empa ba bang ba re moporofeta e mong oa ba boholo-holo o tsohile bafung.”

₂₀A re ho bona: “Empa lōna le re ke mang?”

Petrose a araba, a re: “U Kreste oa Molimo.”

₂₁A ba laea, 'me a ba laela ho se bolelle motho hona, ₂₂a re: “Eka khona Mor'a Motho a hlōkōfatsoe haholo, a lahloe ke baholo, le baprista ba baholo, le Litsebi tsa Molao, 'me a bolaoe, a nt'o tsoha bafung ka letsatsi la boraro.”

₂₃Joale a re ho bohle: “Haeba motho a rata ho ntšala morao, a itele, a jare sefapano sa hae ka tsatsi le leng le le leng, 'me a ntatele. ₂₄Mang le mang ea ratang ho pholosa bophelo ba hae, bo tla mo lahlehela, empa mang le mang ea tla lahleheloa ke bophelo ba hae ka baka la ka, o tla bo pholosa. ₂₅Ebe motho a ka boelloa ke'ng haeba a ka rua lefatše lohle, empa a lahleheloa ke bophelo ba hae, kapa a timela? ₂₆Mang le mang ea tla hlajoa ke lihlong ka baka la ka le lipolelo tsa ka, Mor'a Motho o tla hlajoa ke lihlong ka baka la hae, ha a e-tla a le tlōtleng ea hae, le ea Ntat'ae, le ea mangeloi a halalelang. ₂₇Empa kannete kea le bolella hore ho na le ba bang ba emeng mona, ba ke keng ba latsoa lefu, ba e-s'o ka ba bona 'Muso oa Molimo.”

₂₈Kamora' lipolelo tsena, ha ho fetile matsatsi a ka bang robeli, Jesu a nka Petrose, le Johanne, le Jakobo, a nyolohela thabeng ho ea rapela. ₂₉Ha a ntse a rapela, a fetoha tšobotsi, liaparo tsa hae tsa e-ba tšoeu, tsa benya. ₃₀Bonang, banna ba babeli, bao e neng e le Moshe le Elia, ba ne ba buisana le eena, ₃₁ba iponahatsa tlōtleng, ba bua ka lefu la hae leo a seng a tla le shoa Jerusalema. ₃₂Empa Petrose le ba nang le eena ba ne ba imetsoe ke boroko; eare ha ba phaphama, ba bona tlōtla ea Jesu le banna ba babeli ba emeng le eena. ₃₃Ha ba tloha ho eena, Petrose a re ho Jesu: “Monghali, ke hantle ha re le mona. A re hlomeng maphephe a mararo, le leng e be la hao, le leng e be la Moshe, le leng e be la Elia,” feela a sa tsebe seo a se bolelang.

₃₄A re a sa rialo, ha tla leru, 'me la ba khurumetsa; ba tšoha ha ba kena lerung. ₃₅Lentsoe la tsoa lerung, la re: “Enoa ke Mora oa ka eo ke mo khethileng; mo mameleng!” ₃₆Ha lentsoe leo le utloahala, Jesu a fumanoa a se a le mong. Bona ba khutsa, 'me matsatsing ao ba se ke ba tsebisa motho letho la tseo ba li boneng.

₃₇Ka le hlahlamang ha ba theoha thabeng, letšoelehali la khahlanyetsa Jesu. ₃₈Bonang, monna e mong a hōoa, a re: “Moruti, kea u kōpa hore u talime mora oa ka, hobane ke eena a le inotši. ₃₉Moea o ee o mo tšoare, a tšohe a se a phasoloha, o mo akhehise, a khethetse makoeba, 'me o tlohe ka thata ho eena, o mo tetelitse. ₄₀Ke ile ka kōpa barutuoa ba hao hore ba o leleke, empa ba hlōtsoe.”

₄₁Jesu a araba, a re: “A molōko o sa lumeleng, o khopo! Ke tla ba le lōna, ke le mamelle ho fihlela neneng? Tlisa mora oa hao koano!”

₄₂A re a sa atamela, modemona oa tabanya moshanyana fatše, oa mo akhehisa. Empa Jesu a khalemela moea oo o litšila, a folisa moshanyana, a mo khutlisetsa ho ntat'ae. ₄₃Bohle ba tsota boholo ba Molimo.

Eare ha bohle ba makalla tsohle tseo Jesu a li entseng, a re ho barutuoa ba hae: ₄₄“Lōna, mamelang lipolelo tsena ka hloko, hobane Mor'a Motho o se a tla neeloa matsohong a batho.” ₄₅Empa ba ne ba sa utloisise polelo eo, e ba siretse hore ba se ke ba e hlalohanya. Ba tšaba ho 'motsa ka tsa polelo eo.

₄₆Joale ha hlaha khang har'a bona, ea hore na ekaba e moholo har'a bona ke mang. ₄₇Jesu, ka ho tseba menahano ea pelo tsa bona, a nka ngoana, a mo emisa pel'a hae, ₄₈a re ho bona: “Mang le mang ea amohelang ngoana enoa lebitsong la ka, oa nkamohela, 'me ea nkamohelang o amohela ea nthōmileng, hobane ea leng monyenyane har'a lōna bohle, ke eena e moholo.”

₄₉Johanne a bua, a re: “Monghali, re bone e mong a leleka bademona ka lebitso la hao, 'me ra mo thibela, kahobane a sa u latele joaloka rōna.”

₅₀Jesu a re ho eena: “Le se ke la mo thibela, hobane ea sa le loantšeng o eme le lōna.”

₅₁Ha nako ea hae ea ho nkeloa leholimong e atametse, a ikemisetsa ho leba Jerusalema, ₅₂'me a rōma barōmuoa ho mo etella pele. Ba kena motseng o mong oa Basamaria ho mo lokisetsa. ₅₃Empa ba se ke ba mo amohela, hobane a ne a lebile Jerusalema. ₅₄Eare ha barutuoa ba hae, Jakobo le Johanne, ba bona hoo, ba re: “Morena, na u rata hore re re mollo o theohe leholimong, o ba felise?” ₅₅Empa Jesu a reteleha a ba khalemela. ₅₆Eaba ba ea motseng osele.

₅₇Ha ba le tseleng, e mong a re ho Jesu: “Ke tla u latela hohle moo u ka eang teng.”

₅₈Jesu a re ho eena: “Liphokojoe li na le mesima, linonyana li na le lihlaha, empa Mor'a Motho ha a na moo a ka samelang hlooho teng.”

₅₉A re ho e mong: “Ntatele!”

Empa eo a re: “Morena, ak'u ntumelle ke e'o pata ntate pele.”

₆₀Jesu a re ho eena: “Lesa bafu ba pate bafu ba bona, empa uena e-ea, u phatlalatse 'Muso oa Molimo.”

₆₁E mong hape a re: “Ke tla u latela, Morena; feela ak'u ntumelle ke e'o lumelisa ba lelapa la ka pele.”

₆₂Jesu a re ho eena: “Ea beang letsoho mohomeng, empa a hetla tse kamorao, ha a lokele 'Muso oa Molimo.”