Barutuoa ba kha matšohlo ka Sabatha
1Ka nako eo, Jesu a feta har'a masimo a koro e le ka Sabatha. Barutuoa ba hae ba ne ba lapile, 'me ba qala ho kha matšohlo, ba a ja. 2Eare ha Bafarisi ba bona hona ba re ho eena: “Bona, barutuoa ba hao ba etsa ho sa lumelloang ka Sabatha.”
3A re ho bona: “Na ha lea ka la bala seo Davida a neng a se etse, ha a ne a lapile 'moho le bao a neng a e-na le bona; 4kamoo a neng a kene ka Tlung ea Molimo kateng, 'me ba ja bohobe bo halalelang, e leng boo eena le bao a neng a e-na le bona ba neng ba sa lumelloa ho bo ja, bo jeoa ke baprista feela? 5Kapa na ha lea ka la bala Molaong hore baprista ba tlōla molao oa Sabatha Tempeleng ka Lisabatha, empa ha ba na molato? 6Kea le bolella, mona ho teng ho fetang Tempele ka boholo. 7Hoja le ne le tsebile hore na ke ho re'ng ha ho thoe: ‘Ke thabela mohau, e seng sehlabelo,’ le ka be le sa ka la ahlōla ba se nang molato. 8Mor'a Motho ke morena oa Sabatha.”
Motho ea shoeleng letsoho
9Jesu ha a tloha moo a kena ka tlung ea bona ea thapelo. 10Ho ne ho le teng motho ea shoeleng letsoho. Hore ba tle ba qose Jesu, Bafarisi ba 'motsa, ba re: “Na hoa lumelleha ho folisa batho ka Sabatha?”
11A re ho bona: “Ekaba ke mang ho lōna, ea nang le nku e le 'ngoe, eo ekareng ha e oetse ka lenkoaneng ka Sabatha, a ke keng a e tšoara, a e nyolla? 12Ha ho le joalo, motho o feta nku hakaakang ka bohlokoa! Ka baka leo, ho a lumelleha ho etsa ho molemo ka Sabatha.”
13Eaba o re ho motho eo: “Otlolla letsoho la hao!”
A le otlolla, la fola, 'me la boela la loka joaloka le leng. 14Bafarisi ba tsoa, ba rera kamoo ba ka bolaeang Jesu kateng.
Mohlanka eo Molimo a mo khethileng
15Ha Jesu a tsebile hoo, a tloha moo. Batho ba bangata ba mo latela, 'me a ba folisa bohle, 16a ba laea hore ba se ke ba etsa hore a tsejoe; 17e le hore ho tle ho phethahale ho boletsoeng ke moporofeta Esaea, ha a re:
18“Bonang, mohlanka oa ka
eo ke mo khethileng ke eo,
moratuoa oa ka ea nkhahlang!
Ke theoletse Moea oa ka
holim'a hae,
o tla tlisetsa lichaba toka.
19A ke ke a nganga,
leha e le ho peroha,
lentsoe la hae
le ke ke la utloahala literateng.
20A ke ke a roba lehlaka
le tenyetsehileng,
le lebone le taitsang
a ke ke a le tima,
ho fihlela a etsa hore toka e hlōle.
21Lichaba li tla tšepa,
li tšepe lebitso la hae.”
Jesu le Beele-Sebule
22Eaba ho tlisoa ho Jesu monna ea nang le modemona, e le sefofu se semumu. A mo folisa, 'me sefofu se semumu sa bua, sa bona. 23Matšoele kaofela a hlolloa, a re: “Na eo hase Mor'a Davida?”
24Empa Bafarisi, ha ba utloa hona, ba re: “Enoa ha a leleke bademona, haese ka Beele-Sebule, morena oa bademona.”
25Ka ho tseba mehopolo ea bona, Jesu a re ho bona: “'Muso o mong le o mong o ikarolang ho itoantša o fetoha lesupi, 'me ha ho motse kapa lelapa le ikarolang ho itoantša le ka tieang. 26Haeba Satane a leleka Satane, o ikarotse, oa itoantša; ha ho le joalo 'muso oa hae o ka tiea joang? 27Haeba 'na ke leleka bademona ka Beele-Sebule, bara ba lōna ba ba leleka ka mang? Ka baka leo, e tla ba bona baahlōli ba lōna. 28Empa haeba ke leleka bademona ka Moea oa Molimo, ruri 'Muso oa Molimo o fihlile ho lōna.
29“Kapa motho a ka kena joang ka tlung ea seqhobane, a hapa thepa ea sona, haeba a sa tlama seqhobane seo pele, e be hona a hapang thepa eohle ea ntlo?
30“Ea sa emang le 'na oa ntoantša, 'me ea sa bōkelleng le 'na oa qhalanya. 31Ka baka leo, kea le bolella, batho ba ka tšoareloa sebe se seng le se seng le nyefōlo e 'ngoe le e 'ngoe, empa ha e le nyefōlo e nyefōlang Moea o Halalelang, ba ke ke ba e tšoareloa. 32Mang kapa mang ea buang se loantšang Mor'a Motho o tla tšoareloa, empa mang kapa mang ea buang se loantšang Moea o Halalelang a ke ke a tšoareloa mehleng ena, leha e le mehleng e tlang.
Sefate le litholoana tsa sona
33“Haeba sefate se le monate, le litholoana tsa sona li monate, empa haeba sefate se le sebe, le litholoana tsa sona li mpe, hobane sefate se tsejoa ka litholoana tsa sona. 34Lōna malinyane a marabe, le ka bolela joang tse lokileng le le khopo tjee? Molomo o bolela se tletseng ka pelong. 35Motho ea lokileng o ntša tse lokileng letlotlong le lokileng; athe motho ea khopo o ntša tse khopo letlotlong le lebe. 36Kea le bolella, lentsoe le leng le le leng la bosaoana leo batho ba le buang, ba tla ikarabella holim'a lona ka letsatsi la kahlōlo, 37hobane u tla beoa ea lokileng ka lipolelo tsa hao, kapa u tla ahlōloa ka lipolelo tsa hao.”
Ba batla sesupo
38Eaba tse ling tsa Litsebi tsa Molao le ba bang ba Bafarisi baa araba, ba re: “Moruti, re rata ho bona sesupo se tsoang ho uena.”
39Jesu a ba araba, a re: “Molōko o khopo, oa bakoenehi, o batla sesupo, empa o ke ke oa neoa sesupo, haese sa moporofeta Jonase. 40Joalokaha Jonase a bile ka mpeng ea leruarua matsatsi a mararo le masiu a mararo, ka mokhoa o joalo Mor'a Motho o tla ba ka mpeng ea lefatše matsatsi a mararo le masiu a mararo. 41Mohl'a kahlōlo batho ba Ninife ba tla ema, ba qose molōko ona, ba o ahlōle, hobane ba ne ba bake ha ba rutoa ke Jonase, empa bonang, mona ho teng ea fetang Jonase. 42Mohl'a kahlōlo Mofumahali oa Boroa o tla ema, a qose molōko ona, a o ahlōle, hobane o ile a tloha lipheletsong tsa lefatše ho tla mamela bohlale ba Solomone, empa mona ho teng ea fetang Solomone.
Ho khutla ha moea o litšila
43“Moea o litšila ha o tsoile ho motho, o sōlla mahoatateng, o batla phomolo, empa ha o e fumane. 44Ebe o re: ‘Ke tla khutlela tlung ea ka, moo ke tsoileng teng.’Joale ha o fihla, o e fumana e le lephaka, e fietsoe, e khabisitsoe. 45Ebe o ea lata meea e meng e supileng, e o fetang ka bokhopo, 'me e kene, e ahe teng, hoo litaba tsa motho eo tsa morao li bang mpe ho feta tsa pele. Ho tla ba joalo le ho molōko ona o khopo.”
Bana babo Jesu le 'm'ae
46Ha Jesu a ntse a bua le matšoele, 'm'ae le bana babo Jesu ba ne ba eme kantle, ba batla ho bua le eena. 47Motho e mong a re ho eena: “'M'ao le bana beno ke bana ba eme kantle, ba batla ho bua le uena.”
48Empa Jesu a araba ea 'molellang, a re: “'Mè ke mang? Bana beso ke bo-mang?” 49Eaba o otlollela letsoho ho barutuoa ba hae, o re: “Bonang! 'Mè le bana beso ke bana. 50Mang kapa mang ea etsang thato ea Ntate ea maholimong, ke eena eo e leng ngoan'eso, le khaitseli, le 'mè.”
