Ketelo ea Ba Bohlale Ba Bochabela
1Hoba Jesu a tsoalloe Betlelehema e Judea, mehleng ea khosi Heroda, ha fihla Jerusalema Ba Bohlale ba tsoang bochabela, 2ba re: “E kae khosi ea Bajuda e tsoetsoeng? Re bone naleli ea eona ha e hlaha, 'me re tlil'o e khumamela.”
3Eare ha khosi Heroda a utloa, a ferekana hammoho le ba Jerusalema kaofela, 4'me hoba a bōkelle baprista ba baholo bohle le Litsebi tsa Molao tsa sechaba, a ba botsa moo Kreste a loketseng ho tsoalloa teng. 5Ba re ho eena: “Betlelehema e Judea, hobane ho ngotsoe joalo ke moporofeta, ha a re:
6“ ‘Ha e le uena, Betlelehema,
e naheng ea Juda,
ha u hlile ha u monyenyane haholo,
ha u monyenyane
har'a batsamaisi ba Juda
hobane ho uena ho tla tsoa
motsamaisi ea tla alosa Iseraele,
sechaba sa ka.’ ”
7Eaba Heroda o bitsa Ba Bohlale bao ka lekunutu, a ba botsisisa nako eo naleli e hlahileng ka eona, 8a nt'o ba rōmela Betlelehema, a re: “E-eang, le batlisise tsa ngoana ka hloko; ere ha le se le mo fumane, le ntsebise, le 'na ke tle ke e'o mo khumamela.”
9Eare hoba ba utloe puo ea khosi ba tsamaea, 'me naleli eo ba e boneng e hlaha ea ba etella pele ho fihlela e ema holim'a moo ngoana a neng a le hona teng. 10Joale ha ba bona naleli ba thaba haholo. 11Ha ba fihla ka tlung, ba bona ngoana le 'm'ae Maria; ba itihela fatše, 'me ba khumamela ngoana, ba nt'o bula matlōle a bona, ba mo nyehella ka limpho: khauta, mokubetso, le 'mira. 12Hoba ba lemosoe torong hore ba se ke ba boela ho Heroda, ba khutlela naheng ea habo bona ka tsela esele.
Josefa o balehela Egepeta
13Hoba Ba Bohlale ba khutle, lengeloi la Morena la iponahatsa ho Josefa torong, la re: “Tsoha, u nke ngoana le 'm'ae, u balehele Egepeta, u hlole teng ho fihlela ke u bolella, hobane Heroda o makhatheng a ho batla ngoana hore a 'molaee.”
14A tsoha, a nka ngoana le 'm'ae bosiu, a tšabela Egepeta, 15'me a hlola teng ho fihlela Heroda a e-shoa; e le hore ho tle ho phethahale ho boletsoeng ke Morena ka moporofeta, ha a re: “Ke bitsitse mora oa ka hore a tsoe Egepeta.”
Polao ea masea
16Eare ha Heroda a lemoha hore o phomiloe ke Ba Bohlale, a halefa haholo, a laela hore ho bolaoe masea 'ohle a bashanyana a Betlelehema le a tikolohong eohle ea teng, a lilemo li peli le katlase, ho ea ka nako eo a e botsisisitseng ho Ba Bohlale. 17Ea e-ba moo ho phethahalang ho boletsoeng ke moporofeta Jeremia, ha a re:
18“Mohoo o utloahetse Rama:
seboko le sello sa 'mokotsane;
Ragele o llela bana ba hae,
'me o hana ho tšeliseha,
hobane ha ba sa le eo.”
Josefa o khutla Egepeta
19Hoba Heroda a shoe, lengeloi la Morena la iponahatsa ho Josefa, torong, Egepeta, 20la re: “Tsoha, u nke ngoana le 'm'ae, u boele naheng ea Iseraele, hobane ba neng ba batla bophelo ba ngoana ba shoele.”
21Josefa a tsoha, a nka ngoana le 'm'ae, a boela naheng ea Iseraele. 22Empa ha a utloa hore Arekelaose o hlahlamile ntat'ae Heroda boreneng ba Judea, a tšaba ho ea teng. Hoba a lemosoe torong, a tšabela seterekeng sa Galelea, 23a ea aha motseng o bitsoang Nasaretha, e le hore ho tle ho phethahale ho boletsoeng ke baporofeta hore o tla bitsoa Monasaretha.
