Jesu o kena Jerusalema
1Ha ba atamela Jerusalema, 'me ba fihla Bethefage, Thabeng ea Mehloaare, Jesu a rōma barutuoa ba babeli, 2a re ho bona: “E-eang motseng o kapele ho lōna, 'me le tla fumana tonki e holehiloeng, e nang le petsana. Le li lokolle, le li tlise mona ho 'na, 3'me ha motho a ka le botsa ho hong, le re ho eena: ‘Morena oa li hloka,’ 'me o tla li lokolla hang-hang.”
4Hona ho ile ha etsahala hore ho tle ho phethahale se boletsoeng ke moporofeta, ha a re:
5“Bolellang morali oa Sione:
Bona! Khosi ea hao e tla ho uena
e ikokobelitse, e palame tonki,
e palame petsana ea tonki.”
6Eaba barutuoa baa ea, 'me ba etsa kamoo Jesu a ba laetseng kateng. 7Ba tlisa tonki le petsana ea eona, ba ala liaparo tsa bona holim'a tsona, 'me a palama. 8Letšoelehali la batho la ala liaparo tsa lona tseleng, 'me ba bang ba lona ba rema makala lifateng, ba a ala ka tseleng. 9Matšoele a neng a mo eteletse pele, le a neng a e-tla kamorao a hōoa, a re:
“Hosanna ho Mora oa Davida!
Ho bokoe
ea tlang ka lebitso la Morena!
Hosanna maholimong
a holimo-limo!”
10Ha Jesu a kena Jerusalema, motse oohle oa hlōkōleha. Batho ba botsa, ba re: “Eo ke mang?”
11Matšoele a re: “Enoa ke moporofeta Jesu, ea tsoang Nasaretha e Galelea.”
Jesu o hloekisa Tempele
12Jesu a kena ka Tempeleng, a phahla bohle ba neng ba reka, ba rekisetsa ka ho eona; a phethola litafole tsa baananyi ba lichelete le litulo tsa ba rekisang maeba. 13A re ho bona: “Ho ngotsoe, ho thoe:
“ ‘Ntlo ea ka e tla bitsoa
ntlo ea thapelo,’
empa lōna le e etsa
‘lehaha la linokoane.’ ”
14Joale lifofu le liritsa tsa tla ho eena ka Tempeleng, 'me a li folisa. 15Ha baprista ba baholo le Litsebi tsa Molao ba bona tse hlollang tseo a li entseng, le bana ba hōoang ka Tempeleng, ba re: “Hosanna ho Mora oa Davida!” ba halefa haholo.
16Ba re ho eena: “Na u nts'u utloa seo ba se bolelang?” Jesu a re ho bona: “E, kea utloa. Na ha le e-s'o bale moo ho thoeng: ‘U itokiselitse thoko ka melomo ea bana le ea masea?’ ”
17Eaba o tloha ho bona, o tsoela kantle ho motse, o ea Bethania, 'me a robaletsa teng.
Jesu o rōhaka sefate sa feiee
18Jesu ha a khutlela motseng, e sa le hoseng, a ikutloa a lapile. 19A bona sefate sa feiee kathōko ho tsela, a ea ho sona, a mpa a fumana se se na letho, haese mahlaku feela. A re ho sona: “U se hlole u beha litholoana le ka mohla!” Sefate sa omella hang-hang.
20Barutuoa ha ba se bona ba makala haholo, ba re: “Sefate see sa feiee se omeletse hang-hang ka mokhoa o joang?”
21Jesu a ba araba, a re: “Ruri kea le bolella hore haeba le e-na le tumelo, le sa belaele, ha le na ho etsa feela se entsoeng sefateng sa feiee, empa leha le ka re ho thaba ena: ‘Sutha, u e'o oela leoatleng,’ hoo ho tla etsahala, 22'me tsohle tseo le li kōpang ka thapelo, le lumela, le tla li fumana.”
Khang holim'a matla a Jesu
23Hoba Jesu a kene ka Tempeleng, baprista ba baholo le baholo ba sechaba ba tla ho eena a ntse a ruta, ba re: “Ke ka matla afe u etsang tsee? Matla aa u a neiloe ke mang?”
24Jesu a ba araba, a re: “Le 'na ke tla le botsa potso e le 'ngoe. Ha le ka mpolella seo ke se botsang, le 'na ke tla le bolella hore na ke ka matla afe ke etsang lintho tsena. 25Kolobetso ea Johanne e ne e e-tsoa kae: Leholimong kapa bathong?”
Ba buisana ba le bang, ba re: “Ha re ka re, e ne e e-tsoa leholimong, o tla re ho rōna, na ke ka baka la'ng re sa kang ra mo lumela. 26Empa ha re ka re e ne e e-tsoa bathong, re tšaba letšoele lena, hobane bohle ba talima Johanne e le moporofeta.”
27Ba araba Jesu, ba re: “Ha re tsebe.”
A re ho bona: “Le 'na ha ke le bolelle hore na ke ka matla afe ke etsang tsena.
Setšoantšo sa bara ba babeli
28“Le re'ng na? Monna e mong o ne a e-na le bara ba babeli. A ea ho oa pele, a re: ‘Mor'a ka, tsamaea u e'o sebetsa tšimong ea morara, kajeno!’
29“A araba, a re: ‘Kea hana!’ Empa hamorao a ikoahlaea, a ea.
30“A ea ho oa bobeli, a bua joaloka ho oa pele. Eena a araba, a re: ‘E, ntate, ke tla ea,’empa a se ke a ea.
31“Ke ofe ho bao ba babeli ea entseng thato ea ntat'ae?”
Ba re: “Ke oa pele.”
Jesu a re ho bona: “Ruri kea le bolella: Balekhetho le liotsoa ba tla kena 'Musong oa Molimo pele ho lōna. 32Johanne o tlile ho lōna ka tsela ea ho loka, 'me ha lea ka la mo lumela, empa balekhetho le liotsoa ba ile ba mo lumela. Feela leha le bone, ha lea ka la ikoahlaea hamorao, la mo lumela.
Setšoantšo sa balemi tšimong ea morara
33“Mamelang setšoantšo se seng hape: Ho ne ho e-na le mong'a tšimo ea ileng a lema tšimo ea morara, a e teela hare ka lerako, a cheka setlhōtlelo har'a eona, a ba a haha le kalana ea molebeli. A e nea balemi ho e lema seahlōlo, eaba oa eta. 34Eare ha nako ea kotulo e atametse, a rōmela bahlanka ba hae ho balemi ho ea bōkella seabo sa hae sa kotulo.
35“Balemi ba tšoara bahlanka ba hae; ba khakhatha e mong, ba bolaea e mong, 'me ba tlepetsa e mong ka majoe. 36A boela a rōmela bahlanka ba bang hape, ba bangata ho feta ba pele, 'me le bona ba 'na ba etsoa joalo. 37Qetellong a rōmela mora oa hae, a re: ‘Ba tla hlompha mora oa ka.’
38“Empa ha balemi ba bona mora, ba buisana, ba re: ‘Enoa ke mojalefa; a re 'molaeeng, re tle re je lefa la hae!’ 39Ba mo tšoara, ba mo kharameletsa kantle ho tšimo, 'me ba 'molaea.
40“Joale ekaba mohla mong'a tšimo a tlang, balemi baa o tla ba etsa joang?”
41Ba re ho eena: “Batho bao ba khopo o tla ba timetsa hampe, tšimo a e nee balemi ba bang ho e lema seahlōlo, ba tla mo nea seabo sa kotulo ka nako ea sona.”
42Jesu a re ho bona: “Na ha le e-s'o bale Mangolong a halalelang, moo ho thoeng:
“ ‘Lejoe le lahliloeng ke lihahi
le fetohile lejoe la mantlha;
ke Morena ea entseng hona,
'me mahlong a rōna ke mohlolo’?
43“Ka baka leo, kea le bolella, ke re, le tla amohuoa 'Muso oa Molimo, 'me o tla neoa sechaba se behang litholoana tsa oona. 44Mang kapa mang ea oelang holim'a lejoe lena o tla tamukana, 'me le tla silakanya eo le mo oelang holimo.”
45Baprista ba baholo le Bafarisi ha ba utloa litšoantšo tsa hae, ba elelloa hore o bua ka bona. 46Ba ne ba batla ho mo tšoara, ba mpa ba tšaba matšoele, hobane a ne a talima Jesu e le moporofeta.
