Morero oa ho bolaea Jesu
1Eare ha Jesu a qetile lipolelo tsena tsohle, a re ho barutuoa ba hae: 2“Lea tseba hore kamora' matsatsi a mabeli e tla ba Paseka, 'me Mor'a Motho o tla neeloa ho thakhisoa.”
3Joale baprista ba baholo le sechaba ba phuthehela ha Moprista e Moholo ea bitsoang Kaiafa, 4'me ba rera ho tšoara Jesu ka mano le ho 'molaea. 5Empa ba re: “E se be mohl'a mokete, esere mohlomong moferefere oa e-ba teng har'a sechaba.”
Jesu o tšèloa ka setlolo Bethania
6Jesu ha a le Bethania ha Simone, molepera, 7mosali ea nang le pitsana e tletseng setlolo sa bohlokoa, a tla ho eena, 'me a se tšèla hloohong ea Jesu ha a ntse a e-ja.
8Empa barutuoa ba hae ha ba bona hoo ba ipelaetsa, ba re: “Tšenyo ee e etsetsoa'ng? 9Setlolo sena se ka be se rekisitsoe chelete e ngata, 'me ea abeloa mafutsana.”
10Jesu a elelloa hona, 'me a re ho bona: “Le nyahamisetsa'ng mosali eo pelo, athe o nketselitse ketso e molemo? 11Mafutsana le na le 'ona kamehla, athe 'na le ke ke la ba le 'na kamehla; 12ka ho tšèla setlolo sena holim'a 'mele oa ka, o lokiselitse ho èpèloa ha ka. 13Ruri kea le bolella, hohle lefatšeng moo molaetsa ona o molemo o tla phatlalatsoa teng, seo a se entseng se tla boleloa, e be seo a hopoloang ka sona.”
Tumellano ea ho èka Jesu
14Eaba e mong oa ba leshome le metso e 'meli, ea bitsoang Judase Isekariota, o ea ho baprista ba baholo, 15o re: “Le tla mpha'ng, ke tle ke le neele eena?” Ba mo lefa lichelete tsa silefera tse mashome a mararo. 16Ho tloha moo a batla monyetla oa ho ba neela eena.
Jesu le barutuoa ba ja Paseka
17Ka letsatsi la pele la mokete oa bohobe bo sa lomosoang, barutuoa ba tla ho Jesu, ba re: “U rata ha re u lokisetsa ho jela Paseka kae?”
18A re: “E-eang motseng ho motho ea itseng, le re ho eena: ‘Moruti o re nako ea ka e haufi, ke tla jela Paseka ha hao 'moho le barutuoa ba ka.’ ”
19Barutuoa ba etsa joalokaha Jesu a ba laetse, 'me ba lokisa Paseka.
20Mantsiboea a qala ho ja le ba leshome le metso e 'meli. 21Ha ba ntse ba e-ja, a re: “Ruri kea le bolella hore e mong oa lōna o tla nkèka.”
22Ba soaba haholo, 'me e mong le e mong a qala ho 'motsa, a re: “Na ke 'na, Morena?”
23A araba, a re: “Ea kentseng letsoho le 'na ka sejaneng ke eena ea tla nkèka. 24Ha e le Mor'a Motho, o ikela joalokaha ho ngotsoe ka eena, empa ho malimabe motho eo Mor'a Motho a tla èkoa ke eena. Ho ka be ho bile molemo ho eena hoja a se ke a tsoaloa.”
25Judase, e leng eena ea mo èkang, a bua, a re: “Na ke 'na, Moruti?”
A re ho eena: “U boletse teng!”
Selallo sa Morena
26Eare ha ba ntse ba e-ja, Jesu a nka bohobe, a boka, a bo ngoatha, 'me a bo nea barutuoa ba hae, a re: “Nkang le je; hona ke 'mele oa ka.”
27A nka senoelo, a leboha, a nt'o ba nea sona, a re: “Noelang ho sona bohle, 28hobane hona ke mali a ka a selekane, a tla tšolleloa ba bangata, a tšolleloa tšoarelo ea libe. 29Kea le bolella, ho tloha joale ha nka ke ka noa seno sena se tsoang tholoaneng ea morara ho fihlela letsatsing leo ke tla se noa le lōna 'Musong oa Ntate se le secha.”
30Hoba ba bine sefela, ba tsoa, ba ea Thabeng ea Mehloaare.
Jesu o bolela tatōlo ea Petrose
31Joale Jesu a re ho bona: “Ka bosiu bona lōna bohle le tla nkoenehela, hobane ho ngotsoe, ho thoe:
“ ‘Ke tla otla molisa,
'me linku tsa mohlape
li tla qhalana.’
32“Empa ha ke se ke tsohile bafung ke tla le etella pele ho ea Galelea.” 33Petrose a mo araba, a re: “Leha bohle ba ka u koenehela, 'na nke ke ka koeneha le khale.”
34Jesu a re ho eena: “Kannete kea u bolella hore bosiung bona, etlare mokōkō o e-s'o lle, u tla be u ntatōtse hararo.”
35Petrose a re ho eena: “Leha eba ke tlameha ho shoa le uena, ha nka ke ka u latōla.” Barutuoa bohle le bona ba bua joalo.
Jesu o rapela Gethesemane
36Joale Jesu a ea le bona serapeng se bitsoang Gethesemane, 'me a re ho barutuoa: “Lulang mona ha ke sa ntse ke e-ea mane ho rapela.” 37A tsamaea le Petrose le bara ba babeli ba Sebedea, 'me a qala ho soaba le ho tšoenyeha. 38Eaba o re ho bona: “Moea oa ka o masoabing a maholo, hoo nka shoang; salang mona, le falimehe le 'na.”
39A ea pejana, a itihela fatše ka sefahleho, a rapela, a re: “Ntate, haeba ho ka etsahala, senoelo sena a se ke se mphete, empa ho be kamoo ho ratang uena kateng, e seng 'na.”
40A tla ho barutuoa, a fumana ba robetse, 'me a re ho Petrose: “Na ebe le sitiloe ho falimeha le 'na hora e le 'ngoe? 41Falimehang, 'me le rapele, hore le se kene molekong; moea o mafōlōfōlō, empa 'mele oa fokola.”
42A tloha ho bona khetlo la bobeli, a ea rapela, a re: “Ntate, haeba senoelo sena se sitoa ho mpheta ke sa se noe, a ho etsoe thato ea hao!”
43Ha a khutlela ho bona hape, a fumana ba robetse, hobane mahlo a bona a ne a le boima ke boroko. 44A tloha hape, a ea rapela khetlo la boraro, a pheta mantsoe 'ona ane.
45Joale a tla ho barutuoa, a re ho bona: “Na le sa ntse le robetse, le phomotse? Bonang, nako e atametse, 'me Mor'a Motho o neeloa matsohong a baetsalibe. 46Tsohang, a re eeng; ea nkèkang ke enoa, o se a atametse.”
Jesu oa èkoa, 'me oa tšoaroa
47Eare a sa bua, Judase, e mong oa ba leshome le metso e 'meli, a fihla a e-na le letšoelehali le tšoereng lisabole le likoto, le e-tsoa ho baprista ba baholo le baholo ba sechaba. 48Ea èkang Jesu o ne a ba neile pontšo, a re: “Eo ke tla mo aka ke eena; le mo tšoare.” 49A b'a s'a toba ho Jesu, a re: “E, Moruti!” Eaba oa mo aka.
50Jesu a re ho eena: “Motsoalle, u tletse'ng moo?”
Joale ba tla ho Jesu, ba mo tšoara. 51E mong oa ba nang le Jesu a phahamisa letsoho la hae, a hula sabole ea hae, a hlatha mohlanka oa Moprista e Moholo, a mo pōma tsebe.
52Eaba Jesu o re ho eena: “Busetsa sabole ea hao selateng sa eona, hobane bohle ba tšoarang sabole ba tla bolaoa ka sabole. 53Kapa u lekanya hore ke sitoa ho rapela Ntate, a nthōmelle hona joale mabōtho a mangeloi a fetang leshome le metso e 'meli? 54Empa Mangolo a ka phethahala joang a reng, eka khona ho be joalo?”
55Ka eona nako eo Jesu a re ho matšoele: “Na ebe ke senokoane ha le tlile ho ntšoara ka lisabole le likoto tjee? Ke 'nile ka ruta ka Tempeleng ka matsatsi 'ohle, empa ha lea ka la ntšoara. 56Empa hona hohle ho etsahetse hore se ngotsoeng ke baporofeta se phethahale.” Joale barutuoa bohle ba mo siea, ba baleha.
Jesu o isoa khotla
57Eaba ba tšoereng Jesu ba mo isa ho Moprista e Moholo, Kaiafa, moo Litsebi tsa Molao le baholo ba neng ba phuthehetse teng. 58Petrose a mo latela a le sebakana ho ea fihla ha Moprista e Moholo, 'me hoba a kene, a lula le bahlanka ho bona pheletso.
59Baprista ba baholo le lekhotla lohle ba batla bopaki ba leshano bo ka tsoang Jesu hore ba tle ba 'molaee, 60empa ha baa ka ba bo fumana, le hoja lipaki tsa leshano li ile tsa tla ka bongata.
Qetellong ha tla tse peli, 61tsa re: “Motho enoa o itse: ‘Nka qhaqha Tempele ea Molimo, 'me ka e tsosa ka matsatsi a mararo.’ ”
62Moprista e Moholo a ema, a re: “Na ha u arabe letho holim'a tseo ba u qosang ka tsona?” 63Empa Jesu a khutsa.
Moprista e Moholo a re ho eena: “Ke re u hlapanye ka Molimo ea phelang, u re bolelle hore na u Kreste, Mor'a Molimo.”
64Jesu a re: “Uena u rialo. Empa kea le bolella, ke re:
“Ho tloha joale
le tla bona Mor'a Motho
a lutse letsohong le letona
la Ea Matla,
'me a e-tla
a le holim'a maru a leholimo.”
65Eaba Moprista e Moholo o hahōla liaparo tsa hae, o re: “O nyefotse, re sa hlokela'ng lipaki? Joale le ikutloetse nyefolo. 66Le re'ng?”
Ba mo araba, ba re: “O tšoaneloa ke lefu.”
67Eaba ba mo tšoela ka mathe sefahlehong, ba mo otla ka litebele, ba bang bona ba mo jabela, 68ba re: “Re porofetele, Kreste: Ke mang ea u otlileng?”
Petrose o latōla Jesu
69Petrose o ne a lutse kantle, lebaleng; lekhabunyane le leng la tla ho eena, la re: “Le uena u ne u e-na le Jesu oa Galelea.”
70A mo latōla pel'a bohle, a re: “Ha ke tsebe seo u se bolelang.”
71Eare ha a e-tsoa monyako, lekhabunyane le leng hape la 'mona, la re ho ba neng ba le moo: “Enoa o ne a e-na le Jesu oa Nasaretha.”
72A hlapanya, a mo latōla hape, a re: “Motho eo ha ke mo tsebe.”
73Hamoraonyana, ba emeng moo ba tla ho Petrose, ba re: “Kannete le uena u e mong oa bona, hobane le puo ea hao ea u paka.”
74Ea e-ba moo a qalang ho rōhakana le ho hlapanya, a re: “Motho eo ha ke mo tsebe!” Hang-hang mokōkō oa lla. 75Petrose a hopola polelo ea Jesu ha a itse ho eena: “Mokōkō o e-s'o lle, u tla be u ntatōtse hararo.” A tsoela kantle, a lla habohlōkō.
