Jesu o tsoha bafung
1Ha Sabatha se fetile, ho hlaha mafube a letsatsi le qalang beke, Maria oa Magadala le Maria e mong ba tla ho bona lebitla.
2Bonang, tšisinyeho e kholo ea lefatše ea e-ba teng, hobane lengeloi la Morena le ne le ile la theoha leholimong, la fihla, la phikolosa lejoe, 'me la lula holim'a lona. 3Sebōpeho sa lona se ne se ka lehalima, 'me seaparo sa lona se ne se le sesoeu joaloka lehloa. 4Balebeli ba thōthōmela ke ho tšaba, ba e-ba joaloka bafu.
5Lengeloi la re ho basali: “Lōna le se ke la tšoha; kea tseba hore le batla Jesu ea thakhisitsoeng. 6Ha a eo mona, hobane o tsohile, joalokaha a ne a bolele. Tloong, le bone sebaka seo a neng a le ho sona. 7Le phakise le e'o bolella barutuoa ba hae, le re: ‘O tsohile bafung, 'me o le etella pele ho ea Galelea; le tla 'mona teng.’ Joale ke le boleletse.”
8Ba tloha kapele lebitleng, ka tšabo le ka thabo e kholo, ba matha ho ea tsebisa barutuoa ba hae.
9Jesu a teana le bona, a re: “Lumelang!” Ba atamela, 'me ba mo tšoara maoto, ba mo khumamela. 10Eaba Jesu o re ho bona: “Se tšabeng, e-eang le tsebise bana beso hore ba ee Galelea, 'me ba tla mpona teng.”
Mokhosi oa balebeli
11Ha basali ba ntse ba e-ea, ba bang ba balebeli ba ea motseng, 'me ba tsebisa baprista ba baholo tsohle tse etsahetseng. 12Ba phutheha le baholo, 'me ha ba se ba rerisane, ba nea bahlabani chelete e ngata, 13ba re: “Le tle le re: ‘Barutuoa ba hae ba ile ba tla bosiu, 'me ba mo utsoa ha re ntse re robetse.’ 14Haeba taba ena e ka fihla litsebeng tsa 'musisi re tla mo kholisa, hore a se ke a le khathatsa.”
15Bahlabani ba amohela chelete, 'me ba etsa kamoo ba lailoeng kateng. Polelo ena ea tumisoa har'a Bajuda ho fihlela kajeno-ea-bokajeno.
Thōmo ea barutuoa
16Barutuoa ba leshome le motso o mong ba ea Galelea, thabeng eo Jesu a neng a ba laetse ho ea ho eona. 17Ha ba 'mona, ba mo khumamela, empa ba bang ba belaela. 18Jesu a atamela, a bua le bona, a re: “Ke neiloe matla 'ohle leholimong le lefatšeng. 19E-eang ke hona le lichaba tsohle, le li etse barutuoa, le ba kolobetse ka lebitso la Ntate, le la Mora, le la Moea o Halalelang, 20le ba rute ho bōlōka tsohle tseo ke le laetseng tsona. Bonang, ke na le lōna kamehla eohle ho isa bofelong ba lefatše.”
