Morena o tla busa tsohle ka khotso
1Mohl'a matsatsi a ho qetela,
thaba eo Tempele ea Morena
e hahiloeng holim'a eona,
e tla phahamela lithaba tsohle,
e phahamele le maralla 'ohle,
lichaba tsohle li phallele ho eona.
2Machaba-chaba a tla fihla,
a re: “Tloong,
re nyoloheleng thabeng ea Morena,
re nyoloheleng Tempeleng
ea Molimo oa Jakobo.
O tla re ruta litaba tsa hae,
re tle re tsamaee tseleng tsa hae;”
kaha molao o tla tsoa,
o tsoe thabeng ea Sione,
ntsoe la Morena le tsoe Jerusalema.
3Morena o tla ahlōla
a ahlōlele chaba tse ngata,
a felise ho se utloane
har'a tse ngata, tse hōle;
sabole tsa chaba tseo
li tla etsa mehoma,
marumo a tsona li a etse lisekele.
Chaba li ke ke tsa hlola
li nkelana lisabole,
li ke ke tsa hlola
li itokisetsa lintoa.
4Motho ka mong o tla phomola
tlas'a morara oa hae,
a phōmōle
tlas'a sefate sa hae sa feiee;
ha ho le ea mong ea sa tla ba tšosa,
hobane Morena oa mabōtho
o boletse joalo.
5Chaba tsohle
li sebeletsa melimo ea tsona,
empa rōna re tla sebeletsa Morena,
re selebetse Molimo oa rōna
kamehla le mehla.
Baiseraele ba tla khutla bothōpuoeng
6“Mohl'a tsatsi leo,”
ho rialo Morena,
“ke tla bokella ba hlotsang,
ke phuthe ba qhalantsoeng,
ke phuthe bao ke ba otlileng.
7Ba hlotsang ke tla ba etsa masalla,
ba qhalantsoeng
ke ba etse chaba se matla.
Morena o tla ba busa
a le Thabeng ea Sione,
a ba buse ho tloha mohl'a tsatsi leo,
a ba buse kamehla le mehla.
8Ha e le uena, Tora ea Mohlape,
uena qhobosheane
ea Morali oa Sione,
u tla buseletsoa puso ea hao ea pele,
'muso o khutlele
ho Morali oa Jerusalema.”
9Joale uena u llela'ng hakaale?
Na ebe uena ha u na khosi?
Na moeletsi oa hao o timetse,
ha e le mo u utloa bohlōkō,
bohlōkō bo kang
ba mahlaba a pelehi?
10Meneka, u bōbōle,
uena Morali oa Sione,
u ke ea tšoeroeng
ke mahlaba a pelehi,
joale u tla tsoa kahar'a motse,
u tsoe, u e'o aha nahathothe.
U tla tsamaea, u ee Babilona,
ke hona moo u tla pholosoa teng,
Morena o tla u lopolla
u le hona moo,
a u namolele
matsohong a lira tsa hao.
11Joale chaba tse ngata li u likile, li re:
“A Sione e k'e silafale,
re be r'e bone ha e silafala!”
12Empa mehopolo ea Morena
ha ba e tsebe,
le morero oa hae ha ba o utloisise,
eena ea ba bokeletseng
sa mangata seotlong.
13“Uena Morali oa Sione,
tsoha, u pōle!
Ke tla u khoesa manaka a tšepe,
ke u roese tlhako tsa lethose,
u tl'u robokele chaba tse ngata.”
U tla nyehella Morena
ka khapo ea hao,
u mo nyehelle ka leruo la tsona,
u nyehelle Morena oa lefatše lohle.
