Jesu o tsoha bafung
1Ha Sabatha se fetile, Maria oa Magadala, le Maria 'm'a Jakobo, le Salome ba reka linōko ho ea tlotsa setōpō sa Jesu. 2E sa le hoseng haholo, ka letsatsi le qalang beke, ba tla lebitleng ha letsatsi le chaba. 3Ba ne ba botsana, ba re: “Ke mang ea tla re phikolosetsa lejoe le monyako oa lebitla?”
4Eare ha ba talima, ba bona lejoe le se le phikolositsoe; le ne le le leholo haholo. 5Ha ba kena ka lebitleng, ba bona mohlankana ea lutseng ka lehlakoreng le letona, a apere seaparo se sesoeu, 'me ba makala.
6Empa eena a re ho bona: “Se makaleng! Le batla Jesu oa Nasaretha ea thakhisitsoeng: o tsohile, ha a eo mona. Bonang sebaka seo a neng a beiloe ho sona ke sena. 7Le mpe le e'o bolella barutuoa ba hae le Petrose, le re: ‘O le etella pele ho ea Galelea; le tla 'mona teng, joalokaha a le boleletse!’ ”
8Ba tsoa lebitleng, ba baleha, hobane ba ne ba thōthōmela ke letsoalo, 'me ha baa ka ba bolella motho le ea mong, hobane ba ne ba tšohile.
Jesu o iponahatsa ho Maria oa Magadala
9Hoba Jesu a tsohe kameso, ka letsatsi le qalang beke, a qala ka ho iponahatsa ho Maria oa Magadala, eo a neng a lelekile bademona ba supileng ho eena. 10Eena a ea tsebisa ba neng ba bile le Jesu, ba neng ba hlomohile, ba lla. 11Empa ha ba utloa hore oa phela, 'me o bonoe ke Maria, ba se ke ba lumela.
Jesu o iponahatsa ho barutuoa ba babeli
12Kamora' moo, Jesu a iponahatsa ka sebōpeho sesele ho ba babeli ba bona, ba neng ba tsamaea naheng. 13Bao ba ea bolella ba bang, empa le bona ba se ke ba ba ba ba lumela.
Thōmo ea barutuoa
14Hamorao a iponahatsa ho ba leshome le motso o mong, ha ba le lijong. A ba khalemella ho se lumele ha bona le bothata ba lipelo tsa bona, hobane ha baa ka ba lumela ba 'moneng a tsohile.
15A re ho bona: “E-eang lefatšeng lohle, le phatlalletse libōpuoa tsohle molaetsa o molemo. 16Ea tla lumela, a be a kolobetsoe, o tla pholosoa; athe ea sa tl'o lumela o tla tsuoa. 17Lipontšo tse tla felehetsa ba lumetseng ke tsena he: Ba tla leleka bademona ka lebitso la ka, ba bue lipuo tse ncha, 18ba tšoare linōha ka matsoho, 'me leha ba ka noa chefo efe kapa efe, e ke ke ea ba etsa letho; ba tla bea bakuli matsoho, 'me ba tla fola.”
Jesu o nyolohela leholimong
19Eare hoba Morena Jesu a bue le barutuoa, a nkeloa leholimong, a lula letsohong le letona la Molimo. 20Ha e le bona ba tsamaea, ba ruta kahohle, Morena a ntse a sebelisana le bona, a tiisa lentsoe ka lipontšo tse le felehetsang.
