NAHUME 1

₂Morena ke Molimo ea boulelang,

Morena ea phetetsang,

Morena oa phetetsa,

o tletse khalefo;

Morena o iphetetsa

ho ba mo loantšang,

khalefo ea hae e tlōkela lira tsa hae.

₃Morena o lieha ho halefa,

o matla haholo,

a ke ke a lesa ho otla ba molato.

O tsosa setsokotsane le sefefo

ha a tsamaea,

maru a ke lerōle maotong a hae.

₄O khalemela leoatle,

ebe oa le pshesa,

linōka tse phallang

le tsona a li pshese.

Bashane le Karamele lia omella,

lithunthung tsa Lebanone

tsona li pone.

₅Ha a hlaha lithaba lia sisinyeha,

maralla le 'ona a qhibilihe;

lefatše lea reketla

ha Morena a hlaha,

lefatše le bohle ba ahileng ho lona.

₆Ha Morena a halefile,

ea ka tiisetsang ke mang?

Ha khalefo ea Morena e tlōkōma

ea ka e mamellang ke mang?

Khalefo ea hae e tuka sa malakabe

kapele ho eena mafika aa pshatleha.

₇Morena o molemo, ke setšabelo;

ke setšabelo

mohl'a tsatsi la litlokotsi,

ba mo tšepang oa ba sireletsa.

₈Joaloka sekhōhōla,

khōhōla se phuthumanang,

Ninife o tla e timetsa joalo,

lira tsa hae a li lelekele lefifing.

₉Le rera mano afe

a ho loantša Morena?

O tla le timetsa, le timelle ruri!

Sera se ke ke

sa mo tsohela matla habeli.

₁₀Ba tla chesoa

sa meutloa e harahane,

ba chesoe sa lirite li omeletse,

ba ntse ba itlōpile veine ea bona.

₁₁Motho ea rerelang Morena bokhopo,

ea khothaletsang bomènèmènè,

o hlahile har'a motse oa Ninife.

₁₂Morena o bua tjena:

“Leha ba ka ba matla,

ba e-ba bangata,

ba tla bolaoa, ba timelle ruri!

Lōna chaba sa ka, ke ile ka le otla,

nke ke ka hlola ke le otla hape.

₁₃Ke tla roba joko

e le hatileng melala,

mahlaahlela a le hōlehileng

ke a khaole.”

₁₄Malebana le Ninife,

Morena o entse taelo:

“Uena Ninife u tla hloka litlōhōlō,

tlōhōlō tse tla bitsoa

ka lebitso la hao.

Melingoana ea hao ke tla e pshatla,

ke e pshatlele ka tempeleng ea eona,

ke pshatle le eona e bōpiloeng.

Bitla la hao ke tla le etsa sesomo.”

₁₅Bonang maoto a morōmuoa

holim'a lithaba,

maoto a ea tlisang

molaetsa o molemo,

ea phatlalatsang molaetsa oa khotso!

Uena Juda keteka mekete ea hao,

likano tsa hao u li phethahatse.

Ea khopo a ke ke

a hlola a u futuhela,

o timelitsoe, a timeletsoa ruri.