NEHEMIA 5

₁Banna le basali ba bona ba lla haholo, ba ipelaetsa ka bana babo bona, e leng Bajuda. ₂Ba bang ba bona ba ne ba re: “Rōna, le bara ba rōna, le barali ba rōna, re bangata; ka baka lena, re batla koro eo re ka e jang, e le hore re tle re phele.”

₃Ba bang bona ba re: “Re beile masimo a rōna paneng, le lirapa tsa rōna tsa morara, le matlo a rōna, e le hore re tle re tsebe ho reka koro nakong ea tlala.”

₄Ba bang le bona ba re: “Re alimile chelete ea ho ntša lekhetho la khosi, bakeng sa masimo a rōna, le lirapa tsa rōna tsa morara. ₅Le hoja rōna, le bana babo rōna re le mali a le mang, le bana ba rōna e le ba bohlokoa joaloka bana ba bona, feela re tlameha ho fetola bara ba rōna makhoba, le barali ba rōna makhabunyane. Ba bang ba barali ba rōna e se e le makhabunyane, empa re hloka matla a ho ba lopolla, hobane masimo a rōna le lirapa tsa rōna tsa morara, e se e le tsa ba bang.”

₆Ke ile ka halefa haholo ha ke utloa sello sa bona le lipolelo tsa bona. ₇Ka imamella lintho tsena, 'me ka khalemela mahosana le babusi, ka re ho bona: “Le lefisa bana babo lōna tsoala!”

Eaba ke ba etsetsa pitso e kholo. ₈Ka re ho bona: “Ho ea kamoo re bileng le hona kateng, re lopolotse bana babo rōna, e leng Bajuda ba neng ba rekiselitsoe balichaba. Joale lōna le rekisa bana babo lōna, hore re tle re ba reke hape!” Ba khutsa tu! ba sitoa ho bua!

₉Ka boela ka re: “Ntho ena eo le e etsang ha ea loka. Le tšoanela ho phela ka ho tšaba Molimo oa rōna, e le hore balichaba, e leng lira tsa rōna, ba tle ba se ke ba re nyatsa. ₁₀Le rōna, le bana beso, le bahlanka ba ka, re ka 'na ra lefisa batho bana tsoala holim'a chelete le koro eo re ba alimang eona. Kea le kōpa hle: A re tloheleng tsoala ena! ₁₁Kea le kōpa hle: Hona joale khutlisetsang batho bana masimo a bona, le lirapa tsa bona tsa morara, le lirapa tsa bona tsa mohloaare, le matlo a bona, le karolo e le 'ngoe, ho tse lekholo, ea chelete ea bona, le ea koro ea bona, le ea veine ea bona, le ea ole ea bona, e leng tsoala ea lintho tseo le li nkileng ho bona.”

₁₂Eaba ba re: “Re tla li khutlisa, 'me re ke ke ra ba lefisa letho. Re tla etsa joalokaha u boletse.”

Joale ka bitsa baprista, le mahosana ana, le babusi bana, ka ba hlapantša hore ba etse joalokaha ba tšepisitse. ₁₃Le 'na ka hlōhlōra maphutha a seaparo sa ka, ka re: “Ka mokhoa ona, Molimo a ke a hlōhlōre motho e mong le e mong ea sa phetheng tšepiso ena; a mo hlōhlōre, a mo ntše ka tlung ea hae, a mo amohe maruo a hae; a hle a hlōhlōroe ka tsela ena, a khōkhōthoe!”

Sechaba sohle sa re: “A ho be joalo!” Sa rorisa Morena. Batho bao ba etsa kamoo ba tšepisitseng kateng.

₁₄Ho tloha mohla ke khethoang hore ke be 'musisi naheng ea Juda, e leng ho tloha ka selemo sa mashome a mabeli, ho isa ho sa mashome a mararo a metso e 'meli sa puso ea khosi Aretaseresese, ke ho re ka lilemo tse leshome le metso e 'meli, rōna le bana beso, ha rea ka ra ja lijo tseo e leng seabo sa 'musisi. ₁₅Babusisi ba neng ba bile teng pele ho 'na, ba ne ba imelitse sechaba, ba nka lijo le veine ea sona, ntle ho lichelete tsa silefera tse ka etsang boima ba likeramo tse mashome a tšeletseng, tseo e neng e le lekhetho la letsatsi ka leng, la motho ka mong. Esita le bahlanka ba bona ba ne ba ikalatisa holim'a sechaba. Empa 'na ha kea ka ka etsa joalo, ka lebaka la ho tšaba Molimo. ₁₆Le 'na ka sebetsa ka thata mosebetsing oa ho haha lerako, le hoja ke ne ke se na tšimo. Le bahlanka ba ka kaofela ba ne ba phuthehetse moo, ho ea sebetsa.

₁₇Ke ne ke e-ja le Bajuda, le babusi ba lekholo le mashome mahlano, ke sa bolele ba neng ba re etetse, ba e-tsoa lichabeng tse neng li re pota-potile. ₁₈Ka letsatsi le leng le le leng, ke ne ke pheheloa nama ea pholo kaofela, le ea linku tse tšeletseng tse nonneng. Ke ne ke pheheloa le nama ea likhōhō, 'me hang, kamora' matsatsi a leshome, ho ne ho tlisoa veine e ngata, ea mefuta-futa. Empa leha ho ne ho le tjena, ha kea ka ka batla lijo tseo e leng seabo sa 'musisi, hobane sechaba se ne se imelitsoe haholo.

₁₉Nehemia a re: “Molimo oa ka, ak'u nkhōpōlele tse molemo, ka baka la tsohle tseo ke li etselitseng sechaba sena.”