Ho koeneha ha Kora
1Kora, mora oa Isihare, mora oa Kohate, mora oa Levi, a e-na le Datane le Abirame, bara ba Eliabe, le One, mora oa Pelete, e leng bara ba Rubene; 2banna bana ba tsohela Moshe matla, ba e-na le banna ba bang ba bana ba Iseraele, ba makholo a mabeli le mashome a mahlano, bao e leng mahosana a sechaba, ba tumileng, ba khethiloeng sechabeng. 3Ba ikopanya, ba loantša Moshe le Arone, ba re ho bona: “Khale re le mameletse! Sechaba sena sohle sea halalela, 'me Morena o teng har'a sona. Ke ka baka la'ng ha le iphahamisa, le ipea kaholim'a sechaba sa Morena?”
4Ha Moshe a utloa taba ena a itihela fatše ka sefahleho, 5a bua le Kora le balateli ba hae, a re: “Hosasane Morena o tla bontša eo e leng oa hae, le hore na ea halalelang ke mang, 'me a mo atametse pel'a hae. Eo a tla mo khetha, o tla mo atametsa pel'a hae. 6Etsang tjena: uena Kora, le balateli ba hao, nkang lipane. 7Hosasane le bee mashala a hlenneng ka lipaneng, le tšèlè mokubetso holim'a 'ona, le le kapele ho Morena. Motho eo Morena a tla mo khetha, ke eena ea halalelang. Ke khale re le mameletse lōna, bara ba Levi!”
8Moshe a re ho Kora: “Joale mamelang, lōna bara ba Levi. 9Na ke ntho e nyenyane hore ebe Molimo oa Iseraele o le arotse ho sechaba sa Iseraele, hore a le atametse pel'a hae, hore le sebeletse ka Tenteng ea Morena? Le hore le eme kapele ho sechaba, le se sebeletse? 10Le hore ebe o u atamelitse pel'a hae, uena hammoho le bana beno, bara ba Levi? Na le uena u batla ho ba moprista? 11Ke ka hona uena le balateli bohle ba hao le ikopantseng ho loantša Morena. Arone ke mang, haeka lea mo korotlela tjee?”
Ho koeneha ha Datane le Abirame
12Moshe a rōmela hore ho e'o bitsoa Datane le Abirame, bara ba Eliabe, empa bona ba re: “Ha re ka ke ra tla! 13Na ke ntho e nyenyane hore ebe u re ntšitse naheng e phallang lebese le mahe a linotši, ho tla re bolaela lehoatateng moo? Joale u s'u ikentse 'musi oa rōna? 14Ebile ha ua re fihlisa naheng e phallang lebese le mahe a linotši. Ha ua re nea lefa la naha le masimo a morara. Na u tla foufaletsa banna baa 'nete ea litaba? Rōna ha re ka ke ra nyolohela ho uena mono!”
15Moshe a halefa haholo, 'me a re ho Morena: “U se ke ua natsa nyehelo ea bona. Ha kea nka leha e le tonki ho bona, leha e le ho etsa e mong oa bona hampe.”
Kora o hlaha kapele ho Morena
16Eaba Moshe o re ho Kora: “Hosasane uena, le balateli ba hao, le Arone, le be kapele ho Morena. 17Monna e mong le e mong a nke pane ea hae, a tšèlè mokubetso ka ho eona, a nt'o e tlisa kapele ho Morena, e be lipane tse makholo a mabeli le mashome a mahlano. Le uena le Arone le tlise lipane tsa lōna.” 18Monna e mong le e mong a nka pane ea hae, a bea mashala a hlenneng holim'a eona, a nt'o tšèla mokubetso holim'a 'ona. Eaba ba ema monyakong oa Tente ea Morena ba e-na le Moshe le Arone. 19Eare hoba Kora a khobokanye balateli ba hae bohle monyakong oa Tente ea Morena, tlōtla ea Morena ea iponahatsa ho sechaba sohle.
20Morena a bua ho Moshe, le ho Arone, a re: 21“Ikarohanyeng le sechaba sena, le tsoe har'a sona, ke tle ke se timetse ka ho panya ha ntši.”
22Eaba Moshe le Arone ba itihela fatše ka lifahleho, ba re: “Oho, Molimo, Molimo oa meea ea batho bohle, na u ka halefela sechaba see sohle ka baka la sebe sa motho a le mong?”
23Morena a bua ho Moshe, a re: 24“Bolella sechaba, u re: ‘Tlohang liahelong tsa Kora, le tsa Datane, le tsa Abirame!’ ”
25Moshe a ema, a ea ho Datane le ho Abirame, 'me baholo ba Iseraele ba ea le eena. 26Moshe a bua ho sechaba, a re: “Kea le rapela, tlohang litenteng tsa banna bana ba khopo, le se ke la ama letho leo e leng la bona, esere la timetsoa ke sebe sa bona.” 27Sechaba sa tloha liahelong tsa Kora, le tsa Datane, le tsa Abirame, ka mahlakoreng 'ohle. Bo-Datane le Abirame, le basali ba bona, le bara ba bona, le bana ba bona, ba tsoa, ba ema menyakong ea litente tsa bona.
28Moshe a re: “Le tla tseba ke hona hore Morena o nthōmile ho tla etsa mesebetsi ena eohle, le hore hase mesebetsi ea ka. 29Haeba banna bana ba e-shoa lefu la Molimo, 'me ba e-shoa lefu le tšoanang le ba batho bohle, e tla ba ha kea rōngoa ke Morena. 30Empa haeba Morena a etsa ntho e ncha, 'me lefatše le ahlama, le ba koenya hammoho le lintho tsohle tsa bona, 'me ba theohela Qalong ea Bafu ba ntse ba phela, ka hona le tla tseba hore banna bao ba nyelisitse Morena.”
Kotlo ea Kora
31Hoba a qete ho bua mantsoe ana, lefatše la ngamoha katlas'a bona; 32lefatše la ahlama, la ba koenya, bona le matlo a bona, le balateli ba bona, le thepa eohle ea bona. 33Ba theohela Qalong ea Bafu ba ntse ba phela, le maruo 'ohle a bona. Lefatše la ba pupetsa, ba timetsoa, ba tlosoa sechabeng. 34Bana ba Iseraele bohle ba neng ba le moo ba baleha ha ba utloa seboko sa bona, hobane ba ile ba re: “Lefatše le se ke la re metsa!”
35Mollo oa theoha o e-tsoa ho Morena, oa timetsa banna bana ba makholo a mabeli le mashome a mahlano, ba ileng ba nyehela ka mokubetso.
Lipane tsa mollo
36Joale Morena a bua ho Moshe, a re: 37“Bolella Eleasare, mora oa moprista Arone, hore a ntše lipane khabong ea mollo, 'me a qhalle mollo oo hōle, hobane lipane tsena lia halalela. 38Lipane tsa banna bao ba ileng ba siteloa bophelo ba bona li thulelloe, ho etsoe lipoleiti tse tla koahela aletare, kaha ba ile ba nyehela ka tsona kapele ho Morena. Ka baka leo, li ile tsa halalela. Tsena e tla ba sesupo ho bana ba Iseraele.”
39Moprista Eleasare a nka lipane tse entsoeng ka lethose, tseo e neng e le nyehelo ea ba chesitsoeng, tsa thulelloa 'moho ho etsa sekoahelo sa aletare. 40Hona e tla ba khopotso ho bana ba Iseraele, hore motho e mong osele eo e seng setlōhōlō sa Arone, a se ke a atamela kapele, ho chesetsa Morena mokubetso, esere a ba joaloka Kora le balateli ba hae, joalokaha Morena a ile a bua le Kora ka Moshe.
Arone o pholosa sechaba
41Sechaba sohle sa bana ba Iseraele sa korotlela Moshe le Arone, sa re: “Le bolaile batho ba Morena.”
42Ha sechaba se bōkane ho loantša Moshe le Arone, bo-Moshe le Arone ba khutlela Tenteng ea Morena, 'me leru la e khurumetsa, tlōtla ea Morena ea iponahatsa. 43Moshe le Arone ba fihla kapele ho Tente ea Morena.
44Morena a bua ho Moshe, a re: 45“Tlohang har'a sechaba sena, ke tla se timetsa ka ho panya ha ntši!” Bona ba itihela fatše ka lifahleho.
46Joale Moshe a re ho Arone: “Nka pane, holim'a eona u bee mashala a hlenneng a tsoang holim'a aletare, 'me u tšèlè mokubetso kaholim'a 'ona, u e ise kapele ho sechaba, u se etsetse tefelo ea sebe.” Khalefo ea Morena e ne e befetse sechaba, 'me seoa se se se se oetse holimo. 47Arone a e nka joalokaha Moshe a ne a mo laetse, 'me a mathela har'a sechaba, hobane seoa se ne se se se qalehile har'a sechaba. A tšèla mokubetso paneng, 'me a etsetsa sechaba tefelo ea sebe. 48Joale a ema pakeng tsa ba shoeleng le ba phelang, eaba seoa sea khaotsa. 49Ba ileng ba e-shoa ke seoa sena ba ne ba le likete tse leshome le metso e mene le makholo a supileng, ho sa baloe ba shoeleng ka taba ea Kora. 50Eaba Arone o khutlela ho Moshe, monyakong oa Tente ea Morena. Seoa sona se ne se se se khaolitse.
