LIPALO 33

₁Ana ke maeto a bana ba Iseraele, ha ba ne ba falla naheng ea Egepeta ka mabōtho a bona, ba le tsamaisong ea Moshe le Arone. ₂Ka taelo ea Morena, Moshe a ngola mabitso a libaka tseo ba neng ba ntse ba tloha ho tsona, ka ho latelana. Ana ke maeto ho ea ka libaka tseo ba neng ba tloha ho tsona.

₃Ka letsatsi la leshome le metso e mehlano la khoeli ea pele, ba tloha Ramesese, ka letsatsi le hlahlamang la Paseka. Bana ba Iseraele ba tloha ka litlatse tsa thabo, pontšeng ea Baegepeta bohle. ₄Baegepeta ba ne ba ntse ba epela matsibolo a bona, ao Morena a neng a a bolaile. Morena a ba a otla le melimo ea bona.

₅Bana ba Iseraele ba tloha Ramesese, ba ea hloma Sukote. ₆Ha ba tloha Sukote, ba ea hloma Ethame, e leng meeling ea lehoatata. ₇Ha ba tloha Ethame ba khutlela Pi-Hahirote, ka bochabela ho Baale-Sefone, ba ea hloma pel'a Migedole. ₈Ha ba tloha Pi-Hahirote, ba tšela leoatle, ba ea fihla lehoatateng; ba tsamaea leeto la matsatsi a mararo lehoatateng la Ethame, ba ea hloma Mara. ₉Ha ba tloha Mara, ba ea fihla Elime, moo ho neng ho e-na le liliba tse leshome le metso e 'meli, le lifate tsa lipalema tse mashome a supileng, 'me ba hloma teng. ₁₀Ha ba tloha Elime ba ea hloma pel'a Leoatle la Lehlaka. ₁₁Ha ba tloha Leoatleng la Lehalaka, ba ea hloma lehoatateng la Sine. ₁₂Ha ba tloha lehoateng la Sine, ba ea hloma Dofeka.

₁₃Ha ba tloha Dofeka, ba ea hloma Alōshe. ₁₄Ha ba tloha Alōshe, ba ea hloma Refidime, moo ho neng ho se metsi ao sechaba se neng se ka a noa. ₁₅Ha ba tloha Refidime, ba ea hloma lehoatateng la Sinai. ₁₆Ha ba tloha lehoatateng la Sinai, ba ea hloma Mabitleng a Meharo. ₁₇Ha ba tloha Mabitleng a Meharo, ba ea hloma Haserote. ₁₈Ha ba tloha Haserote, ba ea hloma Ritema. ₁₉Ha ba tloha Ritema, ba ea hloma Rimone-Perese. ₂₀Ha ba tloha Rimone-Perese, ba ea hloma Lebena. ₂₁Ha ba tloha Lebena, ba ea hloma Risa. ₂₂Ha ba tloha Risa, ba ea hloma Kehelata. ₂₃Ha ba tloha Kehelata, ba ea hloma thabeng ea Shefere. ₂₄Ha ba tloha thabeng ea Shefere, ba ea hloma Harada. ₂₅Ha ba tloha Harada, ba ea hloma Makelote. ₂₆Ha ba tloha Makelote, ba ea hloma Tahate. ₂₇Ha ba tloha Tahate, ba ea hloma Tara. ₂₈Ha ba tloha Tara, ba ea hloma Miteka. ₂₉Ha ba tloha Miteka, ba ea hloma Hashemona. ₃₀Ha ba tloha Hashemona, ba ea hloma Moserote. ₃₁Ha ba tloha Moserote, ba ea hloma Bene-Jaakane. ₃₂Ha ba tloha Bene-Jaakane, ba ea hloma Hore-Gidegade. ₃₃Ha ba tloha Hore-Gidegade, ba ea hloma Jotebata. ₃₄Ha ba tloha Jotebata, ba ea hloma Aborona. ₃₅Ha ba tloha Aborona, ba ea hloma Esione-Gebere. ₃₆Ha ba tloha Esione-Gebere, ba ea hloma lehoatateng la Sine, ke ho re Kadeshe. ₃₇Ha ba tloha Sine, ba ea hloma thabeng ea Hore, meeling ea naha ea Edomo.

₃₈Ka letsatsi la pele la khoeli ea bohlano, hoba bana ba Iseraele ba tsoe naheng ea Egepeta, moprista Arone a nyolohela thabeng ea Hore ka taelo ea Morena, 'me a shoella moo. ₃₉Arone o ne a e-na le lilemo tse lekholo le mashome a mabeli a metso e meraro ha a shoella thabeng ea Hore.

₄₀Eaba Mokanana, khosi ea Arada, ea ahileng Negebe, naheng ea Kanana, o utloela hore bana ba Iseraele baa tla.

₄₁Ha ba tloha thabeng ea Hore, ba ea hloma Salemona. ₄₂Ha ba tloha Salemona, ba ea hloma Punone. ₄₃Ha ba tloha Punone, ba ea hloma Obote. ₄₄Ha ba tloha Obote, ba ea hloma masuping a lithaba tsa Abarime, e naheng ea Moabe. ₄₅Ha ba tloha Ijime, ba ea hloma Dibone-Gade. ₄₆Ha ba tloha Dibone-Gade, ba ea hloma Alemona-Debeletaima. ₄₇Ha ba tloha Alemona-Debeletaima, ba ea hloma thabeng ea Abarime, pel'a Nebo. ₄₈Ha ba tloha thabeng ea Abarime, ba ea hloma phuleng ea Moabe, pel'a Jorodane, mabapa le Jeriko. ₄₉Ba ea hloma pel'a Jorodane, ho tloha Bete-Jeshimote, ho ea fihla Abele-Shitime, liphuleng tsa Moabe.

₅₀Eaba Morena o bua ho Moshe a le liphuleng tsa Moabe, pel'a nōka ea Jorodane, mabapa le Jeriko, o re: ₅₁“Bua le bana ba Iseraele, u re ho bona: ‘Ha le tšela Jorodane, le kena naheng ea Kanana, ₅₂le tla leleka baahi ba naha eo kapele ho lōna, le lihe lifika tsa bona, le senye litšoantšo tsa bona tse bōpiloeng, le felise le libaka tsohle tsa bona tsa borapeli. ₅₃Naha eo e tla ba ea lōna, 'me le tla aha ho eona, hobane ke le neile eona hore e be ea lōna. ₅₄Naha eo e tla ba lefa la lōna, 'me le tla e arola ka lōtho, ho ea ka malapa abo lōna. Ba bangata u ba abele karolo e kholo, ba 'maloana u ba abele karolo e nyenyane. Kamoo lōtho le tla khethela motho kateng, lefa le ajoe joalo. Naha eo e tla ba ea lōna ho ea ka merabe ea bo-ntat'a lōna.

₅₅“ ‘Empa haeba le sa leleke baahi ba naha eo kapele ho lōna, ho tla etsahala hore bao le ba tlohetseng ba be joaloka metsu ka mahlong a lōna, le meutloa likhopong tsa lōna, ba le tšoenye naheng eo le ahileng ho eona. ₅₆Lōna ke tla le etsa seo ke neng ke hopotse ho ba etsa sona’.”