LIPALO 36

₁Baholo ba malapa a bana ba Gileade, mora oa Makiri, mora oa Manase, ba malapa a bara ba Josefa, ba atamela, ba bua ba le kapele ho Moshe, le kapele ho mahosana ao e leng baholo ba malapa a bana ba Iseraele, ₂ba re: “Morena o u laetse ho abela bana ba Iseraele naha ena ka lōtho, e le lefa la bona. Morena a ba a u laela hore lefa la ngoan'abo rōna Selofehade, u le abele barali ba hae. ₃Haeba barali bana ba ka nyaloa ke ba bang ba merabe e meng ea bana ba Iseraele, lefa la bona le tla ntšoa lefeng la bo-ntat'a rōna, le e'o eketsa lefa la morabe oo ba nyetsoeng ho oona; kahoo le tla ntšoa lefeng leo re le abetsoeng ka lōtho. ₄Ha bana ba Iseraele ba etsa mokete oa lilemo tse mashome a mahlano, lefa la bona le tla kenngoa lefeng la morabe oo ba nyetsoeng ho oona; kahoo lefa la bona le tla ntšoa lefeng la morabe oa bo-ntat'a rōna.”

₅Moshe a laela bana ba Iseraele ho ea ka taelo ea Morena, a re: “Morabe oa bara ba Josefa o buile ka nepo. ₆Sena ke seo Morena a se laetseng malebana le barali ba Selofehade, a re: ‘Ba ka inyalloa ke bao ba ba ratang, empa leha ho le joalo ba nyaloe malapeng a morabe oa ntat'a bona. ₇Lefa la bana ba Iseraele le ke ke la tloha morabeng o mong la ea ho o mong, hobane e mong le e mong oa bana ba Iseraele o tla khomarela lefa la morabe oa bo-ntat'ae. ₈Morali e mong le e mong, eo e leng mojalefa morabeng ofe kapa ofe oa bana ba Iseraele, o tla nyaloa ke e mong oa lelapa la morabe oa ntat'ae, e le hore e mong le e mong oa bana ba Iseraele a 'ne a je lefa la bo-ntat'ae. ₉Kahoo lefa la bana ba Iseraele le ke ke la tloha morabeng o mong la ea ho o mong, empa morabe o mong le o mong oa bana ba Iseraele o tla khomarela lefa la bo-ntat'a oona.’ ”

₁₀Barali ba Selofehade ba etsa kamoo Morena a laetseng Moshe kateng. ₁₁Bo-Mahela, le Tiresa, le Hogela, le Mileka, le Nōoa, ba ile ba nyaloa ke bara ba bana ba bo-ntat'a bona. ₁₂Barali ba Selofehade ba ile ba nyaloa malapeng a bara ba Manase, mora oa Josefa, 'me lefa la bona ea 'na ea e-ba lefa la morabe oa lelapa la ntat'a bona.

₁₃Ena ke melao le litaelo tseo Molimo a neng a li laele bana ba Iseraele ka Moshe, ha ba le liphuleng tsa Moabe, pel'a Jorodane, mabapa le Jeriko.