Tumeliso
1'Na Paulosi, le Timothea, bahlanka ba Kreste Jesu, re lumelisa balumeli bohle bao e leng ba Kreste Jesu, ba leng Filipi, le baokameli, le basebeletsi ba kereke, re re: 2Mohau le khotso ea Molimo Ntat'a rōna le ea Morena Jesu Kreste li ke li be le lōna.
Paulosi o rapella Bafilipi
3Ke leboha Molimo oa ka kamehla ha ke le hopola, 4'me kamehla ha ke le rapella bohle, ke ka thabo ke rapelang, 5hobane le ile la kopanela molaetsa o molemo oa Kreste le 'na, ho tloha letsatsing la pele ho fihlela kajeno. 6Ke kholisehile hore ea qalileng mosebetsi ona o motle har'a lōna o tla o ntšetsa pele ho fihlela Letsatsing la ho tla ha Kreste Jesu.
7Ho a lokela hore ke be le maikutlo a joalo ka lōna bohle, kaha le le pelong ea ka kamehla, lōna bohle ba nang le kabelo lehlohonolong la ka, leha ke le litlamong, leha ke fumane sebaka sa ho buella kapa ho tiisa molaetsa o molemo. 8Molimo ke paki ea kamoo ke le hlolohetsoeng kateng ka lerato le kang la Kreste Jesu.
9Thapelo ea ka ke hore le ekeletsoe lerato le nang le tsebo le kutloisiso eohle ho-ea-ho-ile, 10hore le tle le tsebe ho hlalohanya tse nang le thuso. Kahoo le tla hloka koli le molato mohl'a Letsatsi la ho tla ha Kreste, 11le tlale ho loka ho tsoang ho Kreste, e tle e be tlōtla le thoriso ho Molimo.
Ho 'na, bophelo ke Kreste
12Bana beso, ke rata ho le tsebisa hore tse ntlhahetseng li entse hore molaetsa o molemo o atlehe haholo. 13Ba ntlo ea bobusisi kaofela, le ba bang bohle, ba tseba hantle hore ke litlamong ka baka la Kreste, 14'me bana babo rōna ba bangata ba tšepile Morena ka ho tiea ka baka la litlamo tsa ka, hoo ba leng sebete ho feta pele ho bolela lentsoe la Molimo ba sa tšabe letho.
15Ke 'nete, ba bang ba phatlalatsa tsa Kreste ka mōna le ka khang, empa ba bang ba etsa joalo ka lipelo tse ntle. 16Ha e le bona ba etsa ka lerato, ba ntse ba tseba hore 'na ke koano ka baka la ho buella molaetsa o molemo. 17Ba pele bona ba bolela tsa Kreste ka khang, ka sepheo se sebe, ba hopotse hore ba tla nkekeletsa matšoenyeho ha ke ntse ke le litlamong. 18Ho na'ng? Ha feela Kreste a ntse a boleloa ka mokhoa ofe kapa ofe, e ka ba ka boiketsiso kapa ka 'nete, hoo hoa nthabisa, 'me ke tla 'ne ke ho thabele.
19Ke tseba hore, ka lithapello tsa lōna le ka thuso ea Moea oa Jesu Kreste, qetello ea tsena tsohle e tla ba pholoho ea ka. 20Seo ke se lebeletseng, 'me ke se tšepileng, ke sena: Ha ke na ho soabisoa ke letho, empa joale le kamehla ke na le tšepo e tiileng ea hore Kreste o tla tlotlisoa ka 'na, leha nka shoa kapa ka phela. 21Ho 'na, bophelo ke Kreste, 'me lefu le molemo ho feta. 22Empa haeba ho phela lefatšeng ho ka nthusa ho phetha mosebetsi oa bohlokoa, ke tla khetha eng? Ha ke tsebe. 23Ke qakiloe ke ntho tsena tse peli: Ke lakatsa ho falla bophelong bona, ke e'o ba le Kreste, 'me hona ho molemo ka ho fetisisa, 24empa ho phela lefatšeng ho ntse ho hlokahala haholo, ka baka la lōna. 25Joale ke kholisehile, 'me kea tseba hore ke tla 'ne ke phele, ke lule le lōna bohle, le tle le fumane katleho le thabo tumelong. 26Ha ke se ke boetse ho lōna hape, le tla tseba ho ithorisa haholo ka 'na ho Kreste Jesu.
27Feela le ke le phele ka mokhoa o tšoanelang molaetsa o molemo oa Kreste, e le hore, leha nka tla ho le bona kapa ka sitoa, ke 'ne ke utloe hore le ntse le tiile, le moeamong, 'me ka maikutlo a le mang le loanela tumelo e hlahisoang ke molaetsa o molemo. 28Le se ke la tšosoa ke bahanyetsi le ka mohla. Ho bao hona e tla ba pontšo ea hore ba tla timela, 'me lōna le pholohe, ebile e le ka thato ea Molimo. 29Lōna le filoe lehlohonolo, e seng feela la ho lumela ho Kreste, empa le la ho mamella mahlōkō ka baka la hae. 30Le loana ntoa e tšoanang le eo le boneng ke e loana, eo le utloang hore le joale ke sa e loana.
