1Morena o hloile sekala
se qhekanyetsang,
empa boima bo nepahetseng
bona boa mo thabisa.
2Boikakaso bo etella lihlong pele,
boikokobetso bona
bo tsamaea le bohlale.
3Ba tšepahalang
ba tataisoa ke botšepehi ba bona,
ba sa tšepahaleng bona ba timela,
ba timetsoa
ke ho se tšepahale ha bona.
4Khalefo ea Molimo
e ke ke ea felisoa
ea felisoa ke maruo a motho,
empa ho loka
ho lopolla motho lefung.
5Ho loka ha ba se nang molato
ho lokisa tsela tsa bona,
ba khopo ba timetsoa
ke bokhopo ba bona.
6Ho loka ha ba lokileng
hoa ba lopolla,
ba hlokang botšepehi
ba tšoasoa ke litakatso,
takatso tsa bona tse mpe.
7Ha ea khopo a e-shoa,
tšepo ea hae ea fela,
maruo ao a neng a a tšepile
le 'ona aa fela.
8Ea lokileng
o pholosoa tsietsing ea hae,
ebe ea khopo eena o oela ho eona.
9Polelo tsa ea khopo
li timetsa mohahabo,
empa ea lokileng
eena o pholosoa ke tsebo.
10Ha ba lokileng ba atleha
motse oa nyakalla,
ha ba khopo ba timela,
har'a motse ke melilietsane.
11Ho hlohonolofatsoa ha ba lokileng
ho haha motse,
athe leme la ea khopo
lona lea o timetsa.
12Sethoto se nyelisa mohahabo sona,
empa ea nang le kutloisiso
eena ke lethōla.
13Ea ratang litšebo
o hlahatsa makunutu,
ea tšephahalang eena o na le sefuba.
14Chaba se hlokang botsamaisi
sea lahleha,
se nang le baeletsi ba bangata
sea bolokeha.
15Ea itlamang ka molato oa motho
oa itsietsa,
ea hanang ho itlama
o iphemisa kotsi.
16Mosali ea mosa
o khaba ka hlompho,
banna ba likhoka
ba ikhapela maruo.
17Monna ea mohau
o iketsetsa tse molemo,
athe ea sehlōhō
eena oa itšiteloa.
18Motho ea khopo
o amohela moputso oa bolotsana,
ea jalang ho loka
o kotula moputso oa 'nete.
19Motho ea lokileng
o tla rua bophelo,
ea pheeletseng bobe
eena o tla timela.
20Morena o hloile ba pelo li khopo,
empa o thabela
ba metsamao e lokileng.
21Ruri ba khopo ba tla ahlōloa,
ba lokileng bona ba pheme kahlōlo.
22Mosali ea hlokang boitšoaro
leha a le motle,
o joaloka sale la khauta
nkong ea kolobe.
23Ea lokileng
o lakatsa tse molemo,
ea khopo eena
o emetsoe ke khalefo.
24E mong o fana haholo,
leruo le mo atele,
e mong e be lekhonatha,
bofuma bo mo aparele.
25Ea fanang haholo
o tla fumana katleho,
ea fanang ka metsi
le eena o tla a fuoa.
26Ea hanang ho rekisa koro
batho baa mo rōhaka,
empa ea ba rekisetsang
eena oa hlohonolofala.
27Ea pheellang tse molemo
o tla hauheloa,
ea pheellang bobe
bo tla mo oela holimo.
28Ea tšepang maruo a hae
o tla timela,
ea lokileng o atleha
joaloka hlaku le letalana.
29Ea hlorisang lapa la hae
a ke ke a rua letho,
sethoto se tla fetoha
khoba la ea bohlale.
30Tholoana ea ho loka
ke sefate se bophelo,
ea bohlale eena
o hapa meea ea batho.
31Ea lokileng
o tla fumana moputso a sa phela,
ea khopo le moetsalibe
le bona ba tla putsoa.
