LIPESALEMA 102

₂Morena, ak'u utloe thapelo ea ka;

sello sa ka se ke se fihle ho uena.

₃Ha ke le matšoenyehong

u se ke ua mpatela fahleho sa hao;

ak'u ntšekehele tsebe,

ha ke ipiletsa ho uena,

u ke u nkarabe kapele.

₄Litšiu tsa ka li fela joaloka mosi,

masapo a ka a cha sa patsi mollong.

₅Ke otliloe,

pelo ea ka e ka joang bo omeletseng,

ke se ke lebala le ho ja.

₆Ka baka la ho feheloa haholo,

nama ea ka e maname,

e maname masapong a ka.

₇Ke tšoana le letata la lehoatata,

ke tšoana le sephōōkō sa lithako.

₈Kea hlobaela, 'me kea feheloa,

ke ka nonyana e lutseng e inotši,

e lutseng holim'a sehlōhlōlō.

₉Lira tsa ka li ntlaka kamehla,

ba nkhalefetseng

ba nyefola lebitso la ka.

₁₀Ke ja molora joaloka bohobe,

seno sa ka se tsoakana le meokho,

₁₁ka baka la bohale

le khalefo ea hao;

hobane u ile ua mphamola,

ua nt'o ntabanya!

₁₂Litšiu tsa ka

li tšoana le meriti e theang,

ke omella joaloka joang.

₁₃Empa uena Morena,

u rena kamehla eohle,

u tla hopoloa ke melōkō eohle.

₁₄Ak'u tsohe, u utloele Sione bohlōkō;

ke nako joale ea ho e hauhela,

motsotso o fihlile.

₁₅Bahlanka ba hao

ba khahloa ke majoe a eona,

ba qenehela le lerōle la eona.

₁₆Balichaba ba tla hlompha,

ba hlomphe lebitso la Morena,

le likhosi tsohle tsa lefatše

li tla hlompha tlōtla ea hao.

₁₇Ha Morena a tsosa marako a Sione,

o tla bonahatsa tlōtla ea hae,

a e bonahatse ho eona.

₁₈O tla mamela thapelo

ea ba itlhōphereng;

thapelo eo ea bona

a ke ke a e khesa.

₁₉Tsena li ke li ngolloe molōko,

molōko o tlang,

hore chaba se tla tsoaloa

se tle se rorise Morena.

₂₀Morena o shebile fatše

a le sehalalelong sa hae se holimo;

o talimile lefatše a le maholimong,

₂₁hore a utloe mefehelo,

mefehelo ea batšoaruoa,

a lokolle ba ahlōletsoeng lefu.

₂₂Joale lebitso la Morena

le tla boleloa Sione,

lithoko tsa hae Jerusalema,

₂₃ha lichaba tsohle

li phuthehile 'moho,

li e-na le mebuso ea tsona,

ho sebeletsa Morena.

₂₄O mphokolisitse ke sa le mocha,

a khutsufatsa litšiu tsa ka.

₂₅Ka ba ka re: “Molimo oa ka,

u se ke ua ntlosa lefatšeng

ke sa le mahareng a bophelo ba ka.

Uena lilemo tsa hao

li akaretsa melōko eohle.

₂₆U ne u thee lefatše khale-khale,

maholimo ke mosebetsi

oa liatla tsa hao.

₂₇Tsena li tla timela,

empa uena u tla sala;

tsohle li tla tsofala joaloka seaparo,

u tla li lahla joaloka seaparo,

'me li tla nyamela.

₂₈Empa uena haesale e le uena,

lilemo tsa hao li ke ke tsa fela.

₂₉Bana ba bahlanka ba hao

ba tla ba le leaho le tiileng,

'me litlōhōlō tsa bona

li tla 'ne li be teng pel'a hao.”