LIPESALEMA 119

₁Ho lehlohonolo

ba metsamao e se nang koli,

ba tsamaeang ka Molao oa Morena.

₂Ho lehlohonolo

ba latelang litemoso tsa hae,

ba 'matlang

ka pelo tsohle tsa bona;

₃ba sa etseng tse sa lokang,

ba mpang ba tsamaea

litseleng tsa hae.

₄U re neile litaelo tsa hao,

hore re li bōlōke ka ho tlala.

₅Eka nka tiea metsamaong ea ka,

ka phetha thato ea hao.

₆Nke ke ka hlajoa ke lihlong,

ha ke hlokomela melao eohle ea hao.

₇Ke tla u boka ka pelo e hloekileng,

ha ke se ke ithutile

likahlōlo tsa hao tse lokileng.

₈Ke tla phetha thato ea hao,

u se ke ua ntahlela ruri.

₉Mohlankana a ka hloekisa

metsamao ea hae joang?

Ka ho hahela lentsoe la hao lesaka.

₁₀Ke u batla ka pelo ea ka eohle;

se ntumelle ho kheloha,

ho kheloha melao ea hao.

₁₁Ke bōlōkile tšepiso ea hao,

ka e bōlōka ka pelong ea ka,

hore ke se ke ka u siteloa.

₁₂Ho bokoe uena Morena;

ak'u nthute thato ea hao.

₁₃Ka molomo oa ka

ke bolela likahlōlo tsohle

tse tsoang molomong oa hao.

₁₄Ke thabela

ho latela litemoso tsa hao,

ho feta maruo 'ohle.

₁₅Ke tla nahana litaelo tsa hao,

ke imamelle litsela tsa hao.

₁₆Ke thabela

ho phetha thato ea hao,

nke ke ka lebala lentsoe la hao.

₁₇Etsetsa mohlanka oa hao tse molemo,

ke tle ke phele,

ke mamele lentsoe la hao ka hloko.

₁₈Ntutubolle mahlo,

ke bone limakatso tsa Molao oa hao.

₁₉Ke mofeti mona lefatšeng;

u se ke ua mpatela melao ea hao.

₂₀Moea oa ka o ngongorehela

likhahlōlo tsa hao ka nako tsohle.

₂₁U khalemela baikhōhōmōsi,

baikhōhōmōsi ba rōhakehileng,

ba khelohang melao ea hao.

₂₂Ak'u tlose sekhobo le nyeliso ho 'na,

hobane ke latela litemoso tsa hao.

₂₃Leha mahosana a kopane,

a kopanetse ho nthera,

'na, mohlanka oa hao,

ke nahana thato ea hao.

₂₄E, litemoso tsa hao lia nthabisa,

ke baeletsi ba ka.

₂₅Ke rapaletse lerōleng;

ak'u 'nee bophelo

ho ea ka lentsoe la hao.

₂₆Ke u boleletse metsamao ea ka,

ua nkaraba;

ak'u nthute thato ea hao.

₂₇Nthute, ke utloisise

tsela ea litaelo tsa hao,

ke tle ke nahane

limakatso tsa hao.

₂₈Moea oa ka o llisoa ke masoabi;

ak'u 'matlafatse

ho ea ka lentsoe la hao.

₂₉Nqobise tsela ea leshano,

u nkhauhele

ka ho nthuta Molao oa hao.

₃₀Ke ikhethetse tsela ea 'nete,

likahlōlo tsa hao ke li hlokometse.

₃₁Ke khomaretse litemoso tsa hao;

oho, Morena,

ke se ke ka hlajoa ke lihlong.

₃₂Ke tla matha

tseleng ea melao ea hao,

hobane uena u ntokolotse.

₃₃Morena, nthute ho tsamaea

ho ea ka thato ea hao,

ke tle ke e latele ho isa qetellong.

₃₄'Nee kutloisiso

ke tle ke hlomphe Molao oa hao,

ke o bōlōke ka pelo ea ka eohle.

₃₅Ntsamaise tseleng ea melao ea hao,

hobane kea e thabela.

₃₆Ruta pelo ea ka litemoso tsa hao,

ho e-na le ho rata maruo.

₃₇Faposa mahlo a ka,

a se ke a bona tsa mafeela,

u 'nee bophelo tseleng ea hao.

₃₈Phethisetsa mohlanka oa hao tšepiso

eo u e etselitseng ba u tšabang.

₃₉Ntlose sekhobo seo ke se tšabang,

hobane likahlōlo tsa hao li lokile.

₄₀Ke lakatsa litaelo tsa hao;

ak'u 'nee bophelo ka ho loka ha hao.

₄₁Morena, ak'u ntšitse

ka mohau oa hao,

u mpholose ho ea ka tšepiso ea hao;

₄₂ke tle ke tsebe

ho araba ba 'nyefolang,

hobane ke tšepile lentsoe la hao.

₄₃Nthuse, ke bue 'nete feela,

hobane ke tšepile likahlōlo tsa hao.

₄₄Ke tla 'ne ke bōlōke Molao oa hao,

ke o bōlōke kamehla le mehla.

₄₅Ke tla phela ka bolōkōlōhi,

hobane ke thahasella litaelo tsa hao.

₄₆Ke tla bua ka litemoso tsa hao,

ke bua ka tsona kapele ho likhosi,

ke sa hlajoe ke lihlong.

₄₇Ke thabela melao ea hao,

'me ke e rata haholo.

₄₈Ke tla hlompha melao ea hao,

ke nahane thato ea hao.

₄₉Hopola lentsoe leo u le buileng,

ua le bua ho mohlanka oa hao,

hobane le 'neile tšepo.

₅₀Ho hlōpheheng ha ka

se ntšelisang ke sena:

Tšepiso ea hao e 'nea bophelo.

₅₁Baikhōhōmōsi ba ntlaka haholo,

empa ha ke furalle Molao oa hao.

₅₂Morena, ke hopola likahlōlo tsa hao,

kahlōlo tsa hao tsa boholo-holo,

'me kea tšeliseha.

₅₃Ke halefisoa haholo ke ba khopo,

ba furallang Molao oa hao.

₅₄Thato ea hao

ke pina ho 'na, fatšeng lena

leo ke leng mofeti ho lona.

₅₅Bosiu ke hopola lebitso la hao,

lebitso la hao Morena,

'me ke bōlōka Molao oa hao.

₅₆Lehlohonolo la ka ke lena:

Ke bōlōkile litaelo tsa hao.

₅₇Morena, ke itse kabelo ea ka

ke ho mamela mantsoe a hao,

ke a mamele ka hloko.

₅₈Ke u rapela ka pelo ea ka eohle:

Ak'u nkhauhele

ho ea ka tšepiso ea hao.

₅₉Ke hlahlobile metsamao ea ka,

'me ke khutletse tseleng

eo u mpontšitseng eona.

₆₀Ke ile ka potlaka, ka se ke ka lieha

ho bōlōka melao ea hao.

₆₁Le hoja maraba a ntšoasitse,

maraba a ba khopo,

ha kea lebala Molao oa hao.

₆₂Ke tsoha ka seroko ho u boka,

ka baka la kahlōlo tsa hao,

kahlōlo tse lokileng.

₆₃Ke motsoalle oa bohle

ba u tšabang,

le oa ba bōlōkang litaelo tsa hao.

₆₄Lefatše lohle

le tletse mohau oa hao, Morena;

ak'u nthute thato ea hao.

₆₅Morena, u entse tse molemo,

oa li etsetsa mohlanka oa hao,

ho ea ka lentsoe la hao.

₆₆Nthute bohlale le tsebo,

hobane ke tšepa melao ea hao.

₆₇Pele ke e-s'o kokobetsoe

ke ne ke khelohile;

joale ke hlokometse tšepiso ea hao.

₆₈Uena u molemo, u etsa tse molemo;

ak'u nthute thato ea hao.

₆₉Le hoja baikhōhōmōsi

ba 'neta ka leshano,

ke tla bōlōka litaelo tsa hao,

ke li boloke ka pelo ea ka eohle.

₇₀Pelo tsa bona li tšerehane,

empa 'na ke thabela Molao oa hao.

₇₁Ke hantle ha ke ile ka kokobetsoa,

ke tle ke ithute thato ea hao.

₇₂Ho molemo ho 'na

ho ba le Molao o tsoang ho uena,

ho e-na le ho ba le likete-kete

tsa chelete ea khauta le ea silefera.

₇₃U mpōpile ka matsoho a hao,

ua 'nea sebōpeho;

ak'u 'nee kutloisiso,

ke tle ke ithute melao ea hao.

₇₄Ba u tšabang ba tla mpona,

ba mpone ba thabe,

hobane ke tšepile lentsoe la hao.

₇₅Morena, kea tseba

hore likahlōlo tsa hao li lokile;

'me leha u nkokobelitse,

uena ua tšepahala.

₇₆Mohau oa hao o ke o ntšelise,

ho ea ka tšepiso eo u e entseng,

ua e etsetsa mohlanka oa hao.

₇₇Lerato la hao le ke le nketele,

ke tle ke phele,

hobane ke thabela Molao oa hao.

₇₈Baikhōhōmōsi ba ntubang,

ba ntubang ka mashano,

ba ke ba hlajoe ke lihlong,

empa 'na

ke tla nahana litaelo tsa hao.

₇₉Ba u tšabang

ba ke ba khutlele ho 'na,

le ba tsebang litemoso tsa hao.

₈₀Pelo ea ka e ke e phethe

thato ea hao ka ho tlala,

ke tle ke se ke ka hlajoa ke lihlong.

₈₁Moea oa ka o ngongorehela

ho pholosoa ke uena,

ke tšepile lentsoe la hao.

₈₂Mahlo a ka a motela

ke ho lebella tšepiso ea hao,

ke re:

“Ekaba u tla ntšelisa neneng?”

₈₃Le hoja ke le joaloka lekuka,

lekuka le ka mosing,

ha kea lebala thato ea hao.

₈₄Mohlanka oa hao

o sa tla phela ho le hokae?

Bahlorisi ba ka

u tla ba ahlōla neng?

₈₅Baikhōhōmōsi

ba ncheketse mamena;

bona ba sa eeng ka Molao oa hao.

₈₆Melao ea hao eohle ke ea 'nete;

empa bona ba ntlhorisa ka mashano,

ak'u nthuse.

₈₇Ba batlile ba ntlosa lefatšeng,

empa ha kea furalla litaelo tsa hao.

₈₈Ak'u 'nee bophelo ka mohau oa hao,

ke latele litemoso

tse tsoang ho uena.

₈₉Morena, lentsoe la hao

ke la mehla eohle,

le tiile joaloka maholimo.

₉₀Botšepehi ba hao

ke ba melōko eohle,

u theile lefatše, 'me le tsitsitse.

₉₁Ho ea ka likahlōlo tsa hao,

tsohle li ntse li tiile:

Lintho tsohle lia u sebeletsa.

₉₂Hoja Molao oa hao

e ne e se thabo ea ka,

nka be ke timelitsoe

ke ho hlōpheha ha ka.

₉₃Nke ke ka lebala

litaelo tsa hao le ka mohla,

hobane ke ka tsona

u 'neang bophelo.

₉₄Ke oa hao, ak'u mpholose,

hobane ke thahasella

litaelo tsa hao.

₉₅Ba khopo ba ntaletse

hore ba ntimetse,

empa ke hlokometse

litemoso tsa hao.

₉₆Ke bone

hore tsohle tse phethehileng

li na le bofelo,

empa Molao oa hao ha o na moeli.

₉₇Molao oa hao ke o rata hakaakang!

Ke o nahana letsatsi lohle.

₉₈Molao oa hao

o ntlhalefisa ho feta lira tsa ka,

hobane ke na le oona kamehla eohle.

₉₉Ke hlalefile

ho feta bohle ba nthutileng,

hobane ke nahana litemoso tsa hao.

₁₀₀Ke feta maqheku ka kutloisiso,

hobane ke bōlōka litaelo tsa hao.

₁₀₁Ke qobisa maoto a ka

litsela tsohle tse khopo,

ke tle ke mamele

lentsoe la hao ka hloko.

₁₀₂Ha ke furalle likahlōlo tsa hao,

hobane ke uena ea nthutileng tsona.

₁₀₃Litšepiso tsa hao

li latsoeha hamonate hakaakang!

Li feta mahe a linotši

ka hanong la ka.

₁₀₄Ke na le kutloisiso

ka baka la litaelo tsa hao,

ka baka leo,

ke hloile litsela tsohle tsa leshano.

₁₀₅Lentsoe la hao

ke lebone maotong a ka,

ke leseli tseleng ea ka.

₁₀₆Ke ikanne, ke eme ke tiile:

Ke tla ea ka kahlōlo tsa hao,

kahlōlo tsa hao tse lokileng.

₁₀₇Ke kokobelitsoe ka ho fetisisa;

oho, Morena, ak'u 'nee bophelo

ho ea ka lentsoe la hao.

₁₀₈Morena, amohela liteboho

tse tsoang molomong oa ka,

u nthute likahlōlo tsa hao.

₁₀₉Bophelo ba ka bo kotsing kamehla,

empa ha ke lebale Molao oa hao.

₁₁₀Ba khopo ba nchehetse leraba,

empa ha ke khelohe litaelo tsa hao.

₁₁₁Litemoso tsa hao

ke lefa la ka la mehla eohle,

ke thabo ea pelo ea ka.

₁₁₂Ke rerile ka pelong ea ka

ho phetha thato ea hao kamehla,

ho e phetha ho isa qetellong.

₁₁₃Ke hloile bo-teme-peli,

ke rata Molao oa hao.

₁₁₄U setšabelo sa ka le thèbè ea ka,

ke tšepile lentsoe la hao.

₁₁₅Tlohang ho 'na,

lōna ba etsang bobe,

ke bōlōke melao ea Molimo oa ka.

₁₁₆'Matlafatse

ho ea ka tšepiso ea hao,

ke tle ke phele;

u se ke ua ntšoabisa,

hobane ke u tšepile.

₁₁₇Nthuse, ke tle ke pholohe,

ke 'ne ke thabele

ho phetha thato ea hao.

₁₁₈U nyelisa bohle

ba khelohang thato ea hao,

hobane masene a bona ke lefeela.

₁₁₉Bohle ba lefatše ba khopo

u ba talima e le manya,

kahoo ke rata litemoso tsa hao.

₁₂₀'Mele oa ka

o thōthōmela ke ho u tšaba,

'me ke tšohile likahlōlo tsa hao.

₁₂₁Ke phethile toka le ho lokileng;

u se ke ua ntlohella

matsohong a bahatelli ba ka.

₁₂₂Sireletsa mohlanka oa hao,

mohlanka oa hao a tle a atlehe,

baikhōhōmōsi

ba se ke ba mo hatella.

₁₂₃Mahlo a ka a motela

ke ho lebella ho pholosa ha hao,

le ho lebella tšepiso ea hao,

tšepiso ea hao e lokileng.

₁₂₄Tšoara mohlanka oa hao hantle

ho ea ka mohau oa hao,

u nthute thato ea hao.

₁₂₅Ke mohlanka oa hao,

ak'u 'nee kutloisiso,

ke tle ke tsebe litemoso tsa hao.

₁₂₆Morena, ke nako ea hore u sebetse,

hobane ba tlōtse Molao oa hao.

₁₂₇Ruri ke rata melao ea hao,

ke e rata ho feta khauta,

le hona khauta e hloekisitsoeng;

₁₂₈kahoo ke latela litaelo tsa hao tsohle,

ke hloile litsela tsohle tsa leshano.

₁₂₉Litemoso tsa hao lia tsoteha,

ke kahoo ke li latelang.

₁₃₀Qaqiso ea mantsoe a hao ea elisa,

ba hlokang mano

e ba nea kutloisiso.

₁₃₁Ke ahlamisa molomo oa ka,

ke sisa pelo

ke ho labalabela melao ea hao.

₁₃₂Retelehela ho 'na, u nkhauhele,

joalokaha ho lokela

ba ratang lebitso la hao.

₁₃₃Matlafatsa mehato ea ka

ho ea ka tšepiso ea hao,

u se lumelle hore ke busoe ke bobe.

₁₃₄Ntopolle ho batho ba nkhatellang,

ke tle ke bōlōke litaelo tsa hao.

₁₃₅Ak'u bontše mohlanka oa hao

fahleho se khanyang khotso,

u nthute thato ea hao.

₁₃₆Marameng a ka

ho keleketla likeleli,

hoba ha ho ea bōlōkang

Molao oa hao.

₁₃₇Morena, uena u lokile,

le likahlōlo tsa hao li nepahetse.

₁₃₈Temoso tseo u faneng ka tsona

li lokile, li tšepahala haholo.

₁₃₉Cheseho ea ka ea nqeta,

hobane ba ntlhoileng

ba lebala mantsoe a hao.

₁₄₀Tšepiso ea hao ke ea 'nete-nete,

mohlanka oa hao oa e rata.

₁₄₁Ke monyenyane, kea nyeliseha,

empa litaelo tsa hao ha ke li lebale.

₁₄₂Ho loka ha hao

ke ho loka ha kamehla,

Molao oa hao ke 'nete.

₁₄₃Ke fihletsoe ke matšoenyeho,

ke fihletsoe ke matsoalo,

empa melao ea hao ke thabo ea ka.

₁₄₄Litemoso tsa hao li lokile kamehla;

ak'u 'nee kutloisiso, ke tle ke phele.

₁₄₅Morena, kea ipiletsa,

ke ipiletsa ka pelo ea ka eohle,

ak'u nkarabe;

ke tle ke phethe thato ea hao.

₁₄₆Ke ipiletsa ho uena, ak'u mpholose;

ke tle ke latele litemoso tsa hao.

₁₄₇Ke tsoha

e sa le ka malungoalungoana,

ke lle ho uena,

hobane ke tšepile mantsoe a hao.

₁₄₈Ke lala ke falimehile

ka nako tsa bosiu,

ke ntse ke nahana tšepiso ea hao.

₁₄₉Morena, mamela lentsoe la ka,

u le mamele

ka baka la mohau oa hao,

u 'nee bophelo

ho ea ka kahlōlo ea hao.

₁₅₀Bahlorisi ba bolotsana baa atamela,

bona ba hōle-hōle le Molao oa hao.

₁₅₁Uena Morena, u haufi,

'me melao eohle ea hao ke 'nete.

₁₅₂Khale ke tsebile

hore litemoso tsa hao

u li tiisitse, e be tsa mehla eohle.

₁₅₃Ak'u talime ho hlōpheha ha ka,

u 'namolele,

hobane ha kea lebala Molao oa hao.

₁₅₄Ak'u emele nyeoe ea ka, u ntopolle;

u 'nee bophelo

ho ea ka tšepiso ea hao.

₁₅₅Pholoho e hōle-hōle le ba khopo,

hobane ha ba batle thato ea hao.

₁₅₆Lerato la hao le leholo, Morena;

ak'u 'nee bophelo

ho ea ka likahlōlo tsa hao.

₁₅₇Ba bangata ba ntlhorisang,

le ba ntoantšang ba bangata,

empa ha ke furalle litemoso tsa hao.

₁₅₈Ha ke bona bakoenehi kea teneha,

hoba tšepiso ea hao,

ha ba e hlokomele.

₁₅₉Morena, bona

kamoo ke ratang litaelo,

ke ratang taelo tsa hao kateng!

Ak'u 'nee bophelo

ho ea ka mohau oa hao.

₁₆₀'Nete ke moko oa lentsoe la hao,

likahlōlo tsohle tsa hao

ke tse lokileng, ke tsa mehla eohle.

₁₆₁Mahosana a ntlhorisa ntle ho lebaka,

empa pelo ea ka

e tšosoa ke lentsoe la hao feela.

₁₆₂Ke thabela tšepiso ea hao,

joaloka ea fumaneng khapo,

khapo e ngata.

₁₆₃Leshano ke le hloile, kea le nyonya;

Molao oa hao oona kea o rata.

₁₆₄Ke u rorisa hasupa ka letsatsi,

ka baka la kahlōlo tsa hao,

kahlōlo tse lokileng.

₁₆₅Ba ratang Molao oa hao

ba na le khotso e phethehileng,

ha ho na se ka ba khōpang.

₁₆₆Morena, ke lebeletse

hore u mpholose,

ke tle ke phethe melao ea hao.

₁₆₇Ke latela litemoso tsa hao,

ke li rata haholo.

₁₆₈Ke bōlōka litaelo tsa hao,

le litemoso tsa hao, kea li boloka,

hobane u bona metsamao ea ka eohle.

₁₆₉Morena, sello sa ka

se ke se finyelle ho uena;

ak'u 'nee kutloisiso

ho ea ka lentsoe la hao.

₁₇₀Thapelo ea ka e ke e fihle ho uena;

ak'u 'namolele

ho ea ka tšepiso ea hao.

₁₇₁Molomo oa ka

o bolela lithoko tsa hao,

hobane u nthuta thato ea hao.

₁₇₂Leleme la ka

le ke le bine tsa tšepiso ea hao,

hoba melao eohle ea hao e lokile.

₁₇₃Letsoho la hao le ke le nthuse,

hoba ke ikhethetse litaelo tsa hao.

₁₇₄Morena, ke lakatsa ho pholosoa,

ho pholosoa ke uena;

Molao oa hao ke thabo ea ka.

₁₇₅A nke ke phelele ho u rorisa,

likahlōlo tsa hao li ke li nthuse.

₁₇₆Ke lelera joaloka nku e lahlehileng;

ak'u batle mohlanka oa hao,

hobane ha ke lebale melao ea hao.