Bokang Morena, hobane o molemo
1Haleluja!
Bokang Morena, hobane o molemo;
mohau oa hae ke oa kamehla eohle.
2Bokang Molimo oa melimo;
mohau oa hae ke oa kamehla eohle.
3Bokang Morena oa marena;
mohau oa hae ke oa kamehla eohle.
4Ke eena a inotši
ea entseng limakatso tse kholo;
mohau oa hae ke oa kamehla eohle.
5Ke eena ea entseng maholimo,
a a etsa ka bohlale;
mohau oa hae ke oa kamehla eohle.
6O alile lefatše holim'a metsi;
mohau oa hae ke oa kamehla eohle.
7O entse maseli a maholo;
mohau oa hae ke oa kamehla eohle;
8letsatsi ho busa motšeare;
mohau oa hae ke oa kamehla eohle;
9khoeli le linaleli ho busa bosiu;
mohau oa hae ke oa kamehla eohle.
10Ke eena ea ileng a bolaea,
a bolaea matsibolo a Egepeta;
mohau oa hae ke oa kamehla eohle.
11A ntša Iseraele naheng ea Egepeta;
mohau oa hae ke oa kamehla eohle;
12ka letsoho le matla
le sephaka se otlolohileng;
mohau oa hae ke oa kamehla eohle.
13O ile a phatlola
Leoatle la Sufe koto tse peli;
mohau oa hae ke oa kamehla eohle.
14A tšelisa Iseraele har'a lona;
mohau oa hae ke oa kamehla eohle.
15A lihela Faro le mabōtho a hae,
a a lihela Leoatleng la Sufe;
mohau oa hae ke oa kamehla eohle.
16Ke eena ea ileng a tsamaisa sechaba,
a tsamaisa chaba sa hae lehoatateng;
mohau oa hae ke oa kamehla eohle.
17O ile a timetsa likhosi tse kholo;
mohau oa hae ke oa kamehla eohle.
18A bolaea likhosi tse matla;
mohau oa hae ke oa kamehla eohle:
19Sihone, khosi ea Baamore;
mohau oa hae ke oa kamehla eohle;
20le Oge, khosi ea Bashane;
mohau oa hae ke oa kamehla eohle.
21A fana ka naha ea bona
hore e be lefa;
mohau oa hae ke oa kamehla eohle;
22e be lefa la Iseraele,
mohlanka oa hae;
mohau oa hae ke oa kamehla eohle.
23Ke eena ea ileng a re hopola
ha re ne re kokobelitsoe;
mohau oa hae ke oa kamehla eohle.
24A re phamola ho lira tsa rōna;
mohau oa hae ke oa kamehla eohle.
25Ke eena ea fepang libōpuoa tsohle;
mohau oa hae ke oa kamehla eohle.
26Bokang Molimo oa maholimo;
mohau oa hae ke oa kamehla eohle.
