LIPESALEMA 140

₂Morena ak'u 'namolele

ho batho ba khopo,

u ntšireletse

ho batho ba sehlōhō.

₃Ba lōha mano ka lipelong tsa bona,

ba qholotsa ntoa kamehla.

₄Ba leotsa maleme a bona

a be joaloka a linōha,

mahlōkō a marabe

a tsoa melomong ea bona.

₅Morena, ak'u 'namolele,

u 'namolele liatleng tsa ba babe,

u ntšireletse ho batho ba sehlōhō,

ba rerang hore ke khōthōmetsehe.

₆Baikhōhōmōsi ba nchehetse sefi,

ba nketselitse leraba ka likhoele,

ba ncheketse mamena pel'a tsela.

₇Ke itse ho Morena:

“Ke uena Molimo oa ka.”

Oho, Morena, sekeha tsebe,

u sekéhele sello sa thapeli ea ka tsebe.

₈Morena, mong'a ka,

mopholosi oa ka ea matla,

u sireletsa hlooho ea ka,

u e sireletsa ka nako ea ntoa.

₉Morena,

se lumelle litakatso tsa ea khopo,

se lumelle hore li phethahale,

le hore merero ea hae e atlehe.

₁₀Ba ntikanetseng ba se tsohe molota,

litšokelo tsa bona

li ke li ba oele holimo.

₁₁Morena a ba nesetse

mashala a tukang,

a ba lihele mohohlong

oo ba ke keng ba tsoa ho oona.

₁₂Moetseletsi a se hlole a e-ba teng,

a e-ba teng lefatšeng lena,

motho ea sehlōhō

a futuheloe ke bokhopo,

bo mo timetsang.

₁₃Kea tseba

hore Morena o tla emela,

a emele nyeoe ea mohlōphehi,

a ahlōlele le mofutsana.

₁₄Ruri ba lōkileng

ba tla boka lebitso la hao,

ba pelo li ntle

ba tla phela pontšeng ea hao.