Bokhopo ba batho le mohau oa Molimo
1Pesalema ea Davida, mohlanka oa Morena, e qapetsoeng motsamaisi oa libini.
2Ea khopo o laoloa ke sebe,
sebe se botebong ba pelo ea hae;
ho tšaba Molimo
ha ho eo ho eena.
3Mehopolong ea hae oa ithetsa
hoo a sa boneng sebe sa hae,
hoo a sa se hloeeng.
4Mantsoe a tsoang
molomong oa hae,
ke mantsoe a mabe, a thetsang;
o tlohetse bohlale leha e le botle.
5O rera bokhopo
a ntse a le phateng tsa hae,
o tsamaea tseleng e sa lokang,
ha a khese bobe.
6Morena, mohau oa hao
o fihla maholimong,
botšepehi ba hao
bo fihla marung,
7ho loka ha hao
ho joaloka thaba tse telele,
likahlōlo tsa hao li joaloka boliba,
boliba bo tebileng:
Morena, u pholosa motho
le eona phoofolo.
8Molimo, mohau oa hao
ke oa bohlokoa hakaakang!
Bana ba batho ba tšabela moriting,
moriting oa mapheo a hao.
9Ba khora manoni a ntlo ea hao;
u ba noesa nōkaneng
ea menate ea hao.
10Seliba sa bophelo se ho uena,
'me ka seli la hao re bona leseli.
11U 'ne u be mohau ho ba u tsebang,
u 'ne u sitse ba pelo li ntle
ka ho loka ha hao.
12Moikhōhōmōsi
a se bee leoto pel'a ka,
letsoho la ea khopo le se nteleke.
13Ba etsang bokhopo ke bao, ba oele!
Ba lihetsoe fatše,
ba ke ke ba hlola ba tsoha.
