LIPESALEMA 56

₂Oho, Molimo, ak'u nkhauhele,

hobane batho baa nkhatakela,

ba ntoantšang

ba mpatisitse kamehla.

₃Ba ntaletseng ba nkhatakela kamehla,

ba bangata ba ntoantšang.

₄Uena Ea Holimo-limo,

mohla ke tšohileng,

ke tla tšepa uena.

₅Ke rorisa Molimo

hobane kea mo tšepa,

ke tšepa Molimo,

nke ke ka tšaba letho;

motho eena a ka nketsa'ng?

₆Ba sotha lipuo tsa ka kamehla,

merero eohle ea bona

e ntsoalla bobe.

₇Baa bōkana, ba ipatele 'na,

ba lalle metsamao ea ka,

ba ntse ba tsoma bophelo ba ka.

₈Na ba ka phonyoha

ka baka la bokhopo ba bona?

Oho, Molimo,

ak'u lihe balichaba,

u ba lihe ka khalefo ea hao.

₉U tseba ho lelera ha ka,

u khakelelitse meokho ea ka,

u e khakelelitse ka lefisoana;

na tsee ha lia ngoloa

bukeng ea hao?

₁₀Ha ke ipiletsa ho uena,

lira tsa ka li tla checha.

Kea tseba

hore Molimo o na le 'na.

₁₁Ke rorisa Molimo

hobane kea mo tšepa,

ke rorisa Morena

hobane kea mo tšepa.

₁₂Ke tšepile Molimo,

nke ke ka tšaba letho;

motho eena a ka nketsa'ng?

₁₃Molimo, likano tsa ka ho uena

li ntlamile;

ke tla u nyehella

ka mahlabelo a teboho,

₁₄hobane u mpholositse lefung,

u phemisitse maoto a ka,

ua u phemisa ho khoptjoa,

ke tle ke tsamaee

pontšeng ea Molimo,

seling la ba phelang.