LIPESALEMA 81

₂Tšèlang Molimo ka litlatse,

ke eena matla a rōna;

etsetsang Molimo oa Jakobo mehoo,

mo etsetseng mehoo ea thabo.

₃Phōkōlang pina, le tilinye meropa,

le letse harepa,

le letse le seletsa

se molumo o monate.

₄Letsang lenaka ha khoeli e thoasitse,

leha e tolokile,

mohl'a mokete oa rōna.

₅Ke molao oa Iseraele,

ke taelo ea Molimo oa Jakobo;

₆ke temoso eo a neng a e nee lelōko,

a e nea lelōko la Josefa,

mohla le tsoang naheng ea Egepeta.

Ka utloa lentsoe

ke sa le tsebe, le re:

₇“Ke tlositse mojaro

mahetleng a hao,

matsoho a hao a nyahlalitse serōtō;

₈ha u le matšoenyehong

ua ipiletsa ho 'na,

'me ka u lopolla.

Ka u araba

ke ipatile marung a lumang,

ka u nonya maikutlo

metsing a Meriba.

₉“Mamelang, ha ke le eletsa;

lōna sechaba sa ka,

Iseraele, hoja ua ka ua 'mamela!

₁₀Ho se be le molimo osele haeno,

u see khumamele molimo

oa balichaba.

₁₁Ke 'na Morena, Molimo oa hao,

ea neng a u ntše naheng ea Egepeta.

Ahlama, ke tle ke u fepe.

₁₂“Sechaba sa ka

ha sea ka sa mamela,

sa mamela lentsoe la ka,

Iseraele ha aa ka a 'natsa.

₁₃Ka baka leo, ke ba tlohetse

mangangeng a lipelo tsa bona,

ba tsamaee

ho latela merero ea bona.

₁₄“Hoja sechaba sa ka se ka 'mamela,

Iseraele a tsamaea ka litsela tsa ka,

₁₅nkabe ke kokobetsa lira tsa hae,

ke li kokobetsa hang-hang,

ke hlōla ba mo loantšang,

ke ba hlōla ka letsoho la ka.

₁₆Bohle ba hloileng Morena

ba tla tlameha ho mo hlompha,

kotlo ea bona

e tla ba ea mehla eohle.

₁₇Empa Iseraele eena

ke ne ke tla mo fepa,

ke mo fepe ka koro e ntle,

ke mo khōrise ka mahe a linotši,

mahe a tsoang lefikeng.”