Molimo a qhale lira tsa hae le tsa Iseraele
1Pesalema ea Asafo. Sefela.
2Oho, Molimo,
u se ke ua ipha tšoea;
se khutse, Molimo,
se khobe matšoafo.
3Bona, lira tsa hao lia rora,
ba u hloileng ba tsosa mohlahla.
4Ba lōhela sechaba sa hao mano,
ba kunuta bao u ba sirelelitseng.
5Ba re: “Tloong, re ba felise,
e se hlole e e-ba sechaba,
bitso la Iseraele
le se hlole le hopoloa.”
6Ba rerisana ba le pelonngoe,
ba entse selekane ho u loantša:
7Baahi ba Edomo le Baishemaele,
Bamoabe le Bahagare,
8Bagebale le Baamone le Baamaleke,
Bafilesita le baahi ba Tire,
9le ba Asiria ba ikopantse le bona;
ba thusana le bana ba Lota.
10Ak'u ba etse joaloka ba Midiane,
u ba etse joaloka Sisera,
le Jabine nōkaneng ea Kishone,
11ba neng ba timele Ene-Dore,
ba fetoha moiteli mobung.
12Etsa hore marena a bona
a tšoane le Orebe le Sèèbè,
mahosana 'ohle a bona
a tšoane le Seba le Salemuna,
13ba neng ba ile ba re:
“A re ikhapeleng
naha ea Molimo, e be ea rōna.”
14Oho, Molimo oa ka,
ak'u etse hore ba tšoane
le litlhokoa setsokotsaneng,
ba tšoane le 'mōkō moeeng.
15Joalokaha mollo o chesa moru,
le hlaha e hotetsa lithaba,
16ba lelekise ka sefefo sa hao joalo,
u ba tšose ka sefefo sa khanyapa.
17Etsa hore lifahleho tsa bona
li apareloe ke lihlong,
e le hore ba u batle, uena Morena.
18Ba ke ba hlajoe ke lihlong,
ba tšohele ruri,
ba tlontlolohe, 'me ba timele.
19Ba tsebe hore ke uena feela Morena,
Morena, Ea Holimo-limo
ea okametseng lefatše lohle.
