LIPESALEMA 98

Binelang Morena sefela se secha,

hobane o entse limakatso,

o hlōtse ka letsoho la hae le letona,

letsoho la hae le halalelang.

₂Morena o bonahalitse

ho pholosa ha hae,

a bontša lichaba ho loka ha hae.

₃O hopotse mohau oa hae

le botšepehi ba hae

ho ba ntlo ea Iseraele.

Lipheletso tsohle tsa lefatše

li bone ho pholosa

ha Molimo oa rōna.

₄Lōna ba lefatše lohle

etsetsang Morena mehoo ea thabo,

le tsanyaole, le mo roke ka thabo.

₅Rokang Morena ka harepa,

ka harepa le ka pina e monate,

₆ka literompeta

le ka molumo oa lenaka;

etsetsang khosi, Morena, mehoo

le mo etsetse mehoo ea thabo.

₇Leoatle le ke le hoase

le tsohle tse ka ho lona,

lefatše le bohle ba ahileng ho lona.

₈Linōka li ke li ope liatla,

lithaba kaofela li etse litlatse

₉kapele ho Morena;

hobane o tlil'o ahlōla lefatše.

O tla ahlōla lefatše ka tōka,

le lichaba ka ho loka.