Lipaki tse peli
1Joale ka neoa leqala le kang thupa e methang, 'me ha thoe ho 'na: “Ema, u methe tempele ea Molimo le aletare, 'me u bale ba mo khumamelang ka ho eona. 2Empa ha e le lebala le kantle ho tempele u le tlohele, u se ke ua le metha, hobane le tloheletsoe balichaba, ba tlang ho hatakela motse o halalelang ka likhoeli tse mashome a mane a metso e 'meli. 3Ke tla rōmela lipaki tsa ka tse peli, li apere liaparo tse mahoashe, 'me li tla porofeta ka matsatsi a sekete le makholo a mabeli le mashome a tšeletseng.”
4Lipaki tsena ke lifate tse peli tsa mohloaare, le liluloana tsa mabone tse peli, tse emeng kapele ho Morena oa lefatše. 5Haeba motho a ka rata ho li ntša kotsi, mollo o betsehang melomong ea tsona o timetsa lira tsa tsona. Haeba motho a ka rata ho li ntša kotsi, eka khona a bolaoe joalo. 6Lipaki tsena li na le matla a ho koala leholimo, e le hore pula e se ke ea na nakong ea ha li ntse li porofeta. Hape li na le matla a ho fetola metsi mali, le a ho otla lefatše ka kotlo efe kapa efe, neng kapa neng ha li rata.
7Etlare hoba li qete ho paka, sebatana se tsoang mohohlong o se nang pheletso se tla li loantša, se li hlōle, se li bolaee. 8Litōpō tsa tsona li tla rapalla lebaleng la motse o moholo, oo Morena oa tsona a ileng a thakhisetsoa ho oona, oo ka papiso o bitsoang Sodoma kapa Egepeta. 9Batho ba lichaba tsohle, le ba melōko eohle, le ba lipuo tsohle, le ba mefuta eohle, ba tla talima litōpō tsa tsona ka matsatsi a mararo le halofo, 'me ba ke ke ba lumela hore litōpō tseo li epeloe. 10Baahi ba lefatše ba tla li tlaka, ba thabe, ba rōmellane limpho, hobane baporofeta bao ba babeli ba ne ba ile ba ba tšoenya haholo.
11Hoba ho fete matsatsi a mararo le halofo, moea o phelisang, o tsoang ho Molimo, oa kena litōpōng tsa bona, 'me tsa ema. Ba neng ba li talimile ba tšoha haholo. 12Baporofeta bao ba utloa lentsoe le phahameng, le tsoang leholimong, le re ho bona: “Nyolohelang koano!” Eaba ba nyolohela leholimong ka leru, lira tsa bona li ntse li ba talimile.
13Ka eona nako eo ha e-ba le tšisinyeho e kholo ea lefatše: Karolo e le 'ngoe ho tse leshome ea motse ea heleha, 'me tšisinyo eo ea bolaea batho ba likete tse supileng. Ba setseng ba tšoha haholo, 'me ba tlotlisa Molimo oa leholimo.
14Bomalimabe ba bobeli bo fetile, empa bonang, bomalimabe ba boraro bo tla tla kapele.
Ho letsoa terompeta ea bosupa
15Joale lengeloi la bosupa la letsa terompeta, 'me leholimong ha utloahala mantsoe a phahameng, a reng:
“Puso ea lefatše
e se e le ea Morena a rōna,
le ea Mesia oa hae,
'me o tla busa kamehla le mehla.”
16Eaba baholo ba mashome a mabeli a metso e mene, ba lutseng literoneng tsa bona pel'a Molimo, ba itihela fatše ka lifahleho, ba khumamela Molimo, 17ba re:
“Rea u leboha,
uena Morena Molimo
ea matla 'ohle,
ea leng teng, ea bileng teng,
hobane u boetse u inketse
matla a hao a maholo,
'me u qalile ho busa.
18Balichaba ba ile ba halefa,
joale ha fihla khalefo ea hao,
le nako ea ho ahlōla bafu,
le ea ho putsa
bahlanka ba hao, baporofeta,
le bahalaleli,
le bohle ba u tšabang,
ba banyenyane le ba baholo;
le nako ea ho timetsa
ba timetsang lefatše.”
19Eaba ho buloa tempele ea Molimo e leholimong, 'me ha bonahala areka ea selekane ka ho eona. Ha e-ba teng mahalima, le melumo, le letōlō, le tšisinyeho ea lefatše, le sefako se linaka.
