TŠENOLO 6

₁Joale ka bona ha Konyana e khomarolla sebitielo sa pele sa libitielo tse supileng, 'me ka utloa se seng sa libōpuoa tse phelang, se bua ka lentsoe le kang molumo oa letōlō, se re: “Tloo!” ₂Ka talima, 'me ka bona pere e tšoeu, ea e palameng a tšoere seqha. Eaba o neoa mofapahlooho, 'me a tsamaea e le ea hlōtseng, ea tla 'ne a hlōle.

₃Eare ha Konyana e khomarolla sebitielo sa bobeli, ka utloa sebōpuoa sa bobeli se phelang, se re: “Tloo!” ₄Eaba ho tsoa pere e 'ngoe hape, e khunong. Ea e palameng a neoa matla a ho felisa khotso lefatšeng, e le hore batho ba tle ba bolaeane. A ba a neoa sabole e kholohali.

₅Eare ha Konyana e khomarolla sebitielo sa boraro, ka utloa sebōpuoa sa boraro se phelang, se re: “Tloo!” Ka talima, 'me ka bona pere e ntšo, ea e palameng a nkile sekala ka letsohong la hae. ₆Ka utloa ho kang lentsoe le tsoang har'a libōpuoa tse 'ne tse phelang, le re: “Serōtō sa koro se rekoa ka denare; lirōtō tse tharo tsa harese li rekoa ka denare, empa le se ke la senya ole le veine.”

₇Eare ha Konyana e khomarolla sebitielo sa bone, ka utloa lentsoe la sebōpuoa sa bone se phelang, le re: “Tloo!” ₈Ka talima, 'me ka bona pere e tšehla ba litau, lebitso la ea e palameng e le Lefu, 'me a setsoe morao ke Qalo ea Bafu. Eaba ba neoa matla holim'a karolo ea bone ea lefatše, hore ba bolaee ka sabole, ka tlala, ka lefu, le ka libatana tsa naha.

₉Eare ha Konyana e khomarolla sebitielo sa bohlano, katlas'a aletare ka bona meea ea ba ileng ba bolaoa ka baka la lentsoe la Molimo, le ka baka la bopaki boo ba neng ba e-na le bona. ₁₀Ba hōoeletsa ka mantsoe a phahameng, ba re: “Monghali ea halalelang, oa 'nete, ho sa setse nako e kae pele u re ahlōlela, 'me u lefeletsa mali a rōna ho baahi ba lefatše?” ₁₁Eaba e mong le e mong oa bona o neoa seaparo se sesoeu, 'me ba bolelloa hore ba ke ba bee butle ho se hokae, ho fihlela palo ea balekane ba bona ba bohlanka, le ea bana babo bona ba tla bolaoa joaloka bona, e phethahala.

₁₂Joale ka bona ha Konyana e khomarolla sebitielo sa botšelela; tšisinyeho e kholo ea lefatše ea e-ba teng, letsatsi la ntšofala joaloka lesela la bofifi, le entsoeng ka bolitse, khoeli eohle ea tlerefala joaloka mali, ₁₃'me linaleli tsa leholimo tsa oela fatše, joalokaha sefate sa feiee se hlōhlōra litholoana tsa sona tse e-s'o butsoe, ha se tsukutloa ke sefefo. ₁₄Leholimo la meneha joaloka buka ha e koaloa, 'me lithaba tsohle le lihlekehleke tsa suthisoa litulong tsa tsona.

₁₅Likhosi tsa lefatše, le mahosana, le balaoli ba mabōtho, le barui, le linatla, le bohle, e ka ba makhoba kapa balokolloa, ba ipata ka mahaheng le har'a mafika a lithaba. ₁₆Ba re ho lithaba le ho mafika: “Re oeleng holimo, le re pate, hore re se ke ra bonoa ke ea lutseng teroneng, le re phemise khalefo ea Konyana, ₁₇hobane letsatsi le leholo la khalefo ea eona le fihlile, 'me ke mang ea ka pholohang ho lōna?”