1Joale lengeloi la bohlano la letsa terompeta, 'me ka bona naleli e 'ngoe e oeleng leholimong, e oetse lefatšeng. Naleli eo ea neoa senotlolo sa mohohlo o se nang pheletso. 2Eaba e bula mohohlo o se nang pheletso, 'me ka ho oona ha fōqōha mosi o kang oa sebōpi se seholo. Letsatsi le sebaka se holimo tsa fifatsoa ke mosi o tsoang ka mohohlong. 3Litsie tsa letheha mosing oo, 'me tsa neoa matla a tšoanang le a liphepheng. 4Feela tsa laeloa hore li se ke tsa senya joang, kapa litlama life kapa life, kapa lifate life kapa life; li mpe li senyetse batho feela ba sa tšoauoang ka letšoao la Molimo liphatleng tsa bona. 5Tsa neoa matla, e seng a ho ba bolaea, empa a ho ba hlōkōfatsa ka likhoeli tse hlano. Ho hlōkōfatsa ha tsona ho tšoana le mahlōkō a phepheng ha e lōma motho. 6Matsatsing ao batho ba tla ipatlela lefu, empa ba ke ke ba le fumana; ba tla lakatsa ho shoa, empa lefu le tla ba baleha.
7Litsie tsena li ne li talimeha joaloka lipere tse lokiselitsoeng ntoa, lihloohong e ne e ka li roetse mefapahlooho ea khauta, lifahleho tsa tsona li le joaloka tsa batho. 8Li ne li e-na le meetse e kang moriri oa basali, 'me meno a tsona a ne a le joaloka meno a litau. 9Li ne li e-na le ho kang tšepe e li sireletsang lifuba, 'me lerata la mapheo a tsona le ne le ka lerata la likariki tse huloang ke lipere tse ngata, tse mathelang ntoeng. 10Li ne li e-na le mehatla e tšoanang le ea liphepheng, e nang le metsu, 'me li e-na le matla a ho senyetsa batho ka mehatla ea tsona, ka likhoeli tseo tse hlano. 11Li ne li busoa ke khosi eo e leng lengeloi la mohohlo o se nang pheletso, le bitsoang Abadone ka Seheberu, athe ka Segerike lebitso la lona ke Apoleone.
12Bomalimabe ba pele bo fetile. Bonang, kamorao ho mona bomalimabe bo sa tla tla habeli hape.
13Joale lengeloi la botšelela la letsa terompeta, 'me ka utloa lentsoe le tsoang manakeng a mane a aletare ea khauta, e kapele ho Molimo. 14La bolella lengeloi la botšelela le tšoereng terompeta, la re: “Lokolla mangeloi a mane a hōlehiloeng nōkeng e kholo ea Euferatese.” 15Eaba ho lokolloa mangeloi ao a mane, a neng a se a itokiselitse hora, le letsatsi, le khoeli, le selemo, e leng nako eo a tla bolaea karolo ea boraro ea batho ka eona. 16Palo ea limphi tsa bapalami e ne e le makholo a mabeli a likete tsa likete; ka utloa ha ho boleloa palo ea bona.
17Ponong eo lipere le bapalami ba tsona ba ne ba talimeha tjena: Ba ne ba itširelelitse lifuba ka lintho tse tšoanang le mollo, le lehakoe la safire, le sebabole ka 'mala, 'me lihlooho tsa lipere li ne li le joaloka lihlooho tsa litau, melomong ea tsona ho betseha mollo, le mosi, le sebabole. 18Karolo ea boraro ea batho ea bolaoa ka likotlo tsena tse tharo, e leng mollo, le mosi, le sebabole, tse betsehang melomong ea tsona. 19Matla a lipere tseo a melomong le mehatleng ea tsona. Mehatla ea tsona e tšoana le linōha, e na le lihlooho tseo e senyang ka tsona.
20Ha e le batho ba sa kang ba bolaoa ka likotlo tsena, ha baa ka ba bakela mesebetsi ea bona; ba 'nile ba tsoela pele ho khumamela bademona, litšoantšo tsa melimo ea bohata, tsa khauta, le tsa silefera, le tsa lethose, le tsa lejoe, le tsa lehong, tse ke keng tsa bona, kapa tsa utloa, kapa tsa tsamaea. 21Ha baa ka ba bakela lipolao tsa bona, kapa boloi ba bona, kapa bohlola ba bona, kapa bosholu ba bona.
