BAROMA 13

₁Motho ka mong a ikokobeletse borena bo mo okametseng, hobane ha ho borena haese bo tsoang ho Molimo, 'me bo leng teng bo beiloe ke Molimo. ₂Ka hona ea hanyetsang borena, o hanyetsa se beiloeng ke Molimo, 'me ba se hanyetsang ba tla ahlōloa. ₃Babusi ba ke ke ba tšajoa ke ba etsang tse ntle, empa ba tšajoa ke ba etsang tse mpe. Ha u sa rate ho tšaba ea busang, etsa tse ntle, 'me o tla u rorisa, ₄hobane ke mohlanka oa Molimo, ea u isang botleng. Empa ha u etsa tse mpe, u tšabe, hobane sabole ha a e tšoarele bosaoana. Ke mohlanka oa Molimo, ea bonahatsang khalefo ea Molimo ka ho otla ba etsang tse mpe. ₅Ka baka leo, ke tšoanelo hore le ikokobetse, e seng feela ka baka la ho tšaba khalefo, empa le ka baka la letsoalo.

₆Ebile ke kahoo le ntšang lekhetho, hobane babusi ke bahlanka ba Molimo ba phethang mosebetsi oona oo ka hloko. ₇Neang bohle tse ba lokelang: molekhetho, lekhetho; mokhafisi, khafa; ea lokeloang ke tšabo, tšabo; ea lokeloang ke hlompho, hlompho.

₈Le se ke la ba le molato oa letho ho motho, haese oa ho ratana, hobane ea ratang oa habo o phethile Molao ka ho tlala. ₉Efela litaelo tse reng: “U se ke ua feba, u se ke ua bolaea, u se ke ua utsoa, u se ke ua lakatsa,” leha e le taelo e 'ngoe e ka bang teng, tsohle li akarelitsoe ka taelo ena e reng: “Rata oa heno joalokaha u ithata.” ₁₀Ea ratang oa habo ha a mo etse hampe; kahoo ho ba le lerato ke ho phetha Molao ka ho tlala.

₁₁Etsang joalo, ka ho tseba hore nako e fihlile. E se e le nako ea hore le tsohe borokong, hobane kajeno ho pholosoa ho haufi le rōna ho feta mohla re qalang ho lumela. ₁₂Bosiu bo se bo tla sa, letsatsi le haufi le ho chaba. Ka hona a re lahleng mesebetsi ea lefifi, re apare lihlomo tsa leseli. ₁₃A re pheleng ka mokhoa o tšoanelang, joalokaha eka ke motšeare, e seng ka bonyollo le ka botahoa, e seng ka bohlola le ka liketso tse manyala, e seng ka likhang le ka mohōnō. ₁₄Empa le apare tsa Morena Jesu Kreste, 'me le khaotse ho khotsofatsa litakatso tsa botho.