Morena o tla tsosa Jerusalema
1Morena oa mabōtho a boela a bua ho 'na, a re: 2“Morena oa mabōtho o bua tjena: Ke boulela Sione haholo; ke e boulela ke halefile haholo.”
3Morena o bua tjena: “Ke khutlela Sione, 'me ke tla aha Jerusalema. Kahoo Jerusalema e tla bitsoa Motse oa 'Nete, le thaba ea Morena oa mabōtho e bitsoe Thaba e Halalelang.”
4Morena oa mabōtho o bua tjena: “Maqheku le maqhekoana a tla boela a lula literateng tsa Jerusalema, e mong le e mong a ikokotlèla ka lere ka baka la boqheku. 5Bashanyana le banana ba tla tlala-tlala literateng tsa motse, ba bapalle hona teng.”
6Morena oa mabōtho o bua tjena: “Leha ka nako eo masalla a sechaba sena a ka bona e ka hona ke mohlolo, empa ho 'na hase mohlolo,” ho rialo Morena oa mabōtho.
7Morena oa mabōtho o bua tjena: “Bonang! Ke tla lopolla sechaba sa ka linaheng tse ka bochabela le tse ka bophirimela. 8Ke tla se khutlisetsa Jerusalema, se tl'o aha teng. E tla ba sechaba sa ka, 'me 'na ke tla ba Molimo oa sona ea tšepahalang, ea lokileng.”
9Morena oa mabōtho o bua tjena: “Joale lōna ba utloang se builoeng ke baporofeta ba neng ba le teng mohla ho beoang mothèo oa Tempele ea Morena oa mabōtho, tsohang molōta, le hahe Tempele ena. 10Pele ho nako eo, ho ne ho sa hiroe motho kapa pelesa. Ho ne ho se ea phethang mosebetsi oa hae ka bolokolohi ka baka la ho tšaba lira tsa hae, hobane 'na ke ne ke qabantse motho le ngoan'abo. 11Empa joale masalla a sechaba sena ha ke sa tla a etsa seo ke neng ke se etse ho sechaba sena mehleng e fetileng,” ho rialo Morena oa mabōtho.
12“Chai e tla ba kholo, morara o behe haholo, mobu o atlehise lijalo, maholimo a nese pula e ngata. Ke tla sitsa masalla a sechaba sena ka lintho tsena tsohle. 13Lōna ba ntlo ea Juda le ba ntlo ea Iseraele, le bile sesupo sa thōhako ho lichaba tsohle; joale ke tla le pholosa, le tle le be sesupo sa tlhohonolofatso. Betang lipelo! Se tšabeng letho!”
14Morena oa mabōtho o bua tjena: “Joalokaha ke ile ka rera ho le lihela koluoa, 'me ka hloka mohau ha bo-ntat'a lōna ba ne ba nkhalefisitse,” ho rialo Morena oa mabōtho, 15“kajeno ke rerile ho etsetsa Jerusalema le Juda molemo. Se tšabeng letho! 16Tsena ke tseo le tšoanelang ho li etsa: Le bolellane 'nete, le ahlōlelane ka ho loka le ka 'nete makhotleng a lōna, hore khotso e tle e be teng. 17Le se ke la rèrèlana bora, le se ke la hlapanya ka leshano. Tsena tsohle ke li hloile,” ho rialo Morena.
18Morena oa mabōtho a boela a bua ho 'na, a re: 19“Morena oa mabōtho o bua tjena: Ha ho itingoa lijo ka khoeli ea bone, le ka khoeli ea bohlano, le ka ea bosupa, le ka ea leshome, e tla ba matsatsi a thabo le a nyakallo, e be mekete e monate ho ba ntlo ea Juda. Kahoo ratang 'nete le khotso.”
20Morena oa mabōtho o bua tjena: “Ba lichaba tse ngata le ba metse e mengata ke hona ba tla tla. 21Baahi ba motse o mong ba tla ea ho ba motse o mong, ba re: ‘A re eeng kapele-pele ho ea rapela Morena, 'me re ipiletse ho Morena oa mabōtho. Le rōna re tla ea.’ 22Kahoo lichaba tse ngata, tse matla, li tla tla Jerusalema ho tla rapela Morena oa mabōtho le ho ipiletsa ho eena.”
23Morena oa mabōtho o bua tjena: “Mohlang oo banna ba leshome ba lipuo tsohle le ba lichaba tsohle ba tla tšoara Mojuda a le mong ka qola ea kobo ea hae, ba re: ‘Ak'u re re ee le lōna, hobane re utloile hore Molimo o na le lōna.’ ”
