1 LIKETSAHALO 12

₁Bana ke bona ba ileng ba tla ho Davida ha a ntse a ipatile Sikelage, ka baka la ho tšaba Saule, mora oa Kishe. E ne e le ba bang ba bahale ba neng ba mo thusa ntoeng. ₂Ba ne ba hlometse ka liqha, 'me ha ba betsa majoe ka matjeketjane, kapa ba fula ka metsu, ba ne ba tseba ho sebelisa matsoho a matona kapa a matšehali ka ho tšoana. E ne e le ba morabe oa Benjamine, e le bang ka Saule.

₃Mookameli oa bona e ne e le Ahiesere, a hlahlangoa ke Jōoashe. Bobeli ba bona e ne e le bara ba Shemaa oa Gibea. Baokameli ba bang e ne e le Jesiele, le Pelete, bara ba Asemafete, le Beraka, le Jehu oa Anatote, ₄le Jisemaea oa Gibeone, eo e neng e le e mong oa bahale ba mashome a mararo, e bile e le molaoli oa bona, le Jeremia, le Jahasiele, le Johanane, le Josabada oa Gedera, ₅le Elosai, le Jerimote, le Bealeea, le Shemariea, le Shefatiea oa Harufe, ₆le Elekana, le Jeshia, le Asariele, le Jōesere, le Jashobame, e leng ba morabe oa Kora, ₇le Joela, le Sebadiea, e leng bara ba Jerohame oa motse oa Gedore.

₈Ba bang ba morabe oa Gade ba fetohela ka ho Davida ha a le qhobosheaneng e lehoatateng. E ne e le banna ba linatla, ba matšōlathèbè, ba tsebang ho loana ka thèbè le lerumo. Lifahleho tsa bona li ne li ka tsa litau, ba le lebelo joaloka likhama tsa thaba. ₉Oa pele e ne e le Esere, oa bobeli e le Obadiea, oa boraro e le Eliabe, ₁₀oa bone e le Mishemanna, oa bohlano e le Jeremia, ₁₁oa botšelela e le Atai, oa bosupa e le Eleele, ₁₂oa borobeli e le Johanane, oa borobong e le Elesabade, ₁₃oa leshome e le Jeremia, oa leshome le motso o mong e le Makabanai.

₁₄Bana e ne e le bara ba Gade, e le balaoli ba mabōtho. Molaoli ea ka sehloohong o ne a ka phalalisa lebōtho la bahlabani ba sekete, ea katlase-tlase a ka phalalisa lebōtho la ba lekholo. ₁₅Bana ke bona ba neng ba tšele nōka ea Jorodane, ka khoeli ea pele, ha nōka eo e ne e e-ja litlhokoa. Ba leleka bohle ba phelang ka khohlong, ba ka bochabela le ka bophirimela.

₁₆Ba bang ba morabe oa Benjamine le ba morabe oa Juda le bona ba ea ho Davida qhobosheaneng. ₁₇Davida a ea ba khahlanyetsa, a re ho bona: “Haeba le tlile ka khotso, ho tla nthusa, ke tla le khomarela, empa haeba le tlile ho tla nkèkèla lira tsa ka, leha ke se na molato, Molimo oa bo-ntat'a rōna o tla le bona, a le otle.”

₁₈Joale Moea oa Molimo oa theohela holim'a Amasai, molaoli oa ba mashome a mararo, 'me a re:

Eaba Davida oa ba amohela, 'me a ba etsa balaoli ba mabōthoana a hae.

₁₉Ba bang ba morabe oa Manase le bona ba fetohela ka ho Davida, mohla a neng a e-na le Bafilesita ha ba futuhetse Saule. Empa a se ke a thusa Bafilesita, hobane mahosana a bona a ne a ile a eletsoa hore a mo leleke, a re: “O tla fetohela ka ho mong'a hae Saule, ebe rea bolaoa.” ₂₀Eare ha Davida a e-ea Sikelage banna bana ba morabe oa Manase ba fetohela ka ho eena: Adenake, le Josabada, le Jediaele, le Mikaele, le Josabada, le Elehu, le Siletai. E mong le e mong oa bona e ne e le molaoli oa bahlabani ba sekete. ₂₁Ke bona ba ileng ba thusa Davida ho loantša mabōthoana a hlaselang, hobane kaofela ha bona e ne e le bahale, e bile e le balaoli ba mabōtho. ₂₂Ka tsatsi le leng le le leng banna ba 'na ba tla ho Davida, ho tla mo thusa, ho fihlela lebōtho la hae le e-ba leholo joalokaha eka ke lebōtho la Molimo.

₂₃Ena ke palo ea bahlabani ba mabōthoana a hlometseng, a ileng a tla ho Davida ha a le Heborone, ho ea 'mea hore e be khosi sebakeng sa Saule, ho ea ka polelo ea Morena.

₂₄Ba morabe oa Juda ba neng ba tšoara thèbè le lerumo, e ne e le banna ba likete tse tšeletseng le makholo a robeli.

₂₅Ba morabe oa Simeone e ne e le bahale ba likete tse supileng le lekholo.

₂₆Ba morabe oa Levi e ne e le likete tse 'ne le makholo a tšeletseng. ₂₇Jehoeada e ne e le moetapele oa lelapa la Arone, a e-na le banna ba likete tse tharo le makholo a supileng. ₂₈Sadoke, mohale oa mohlankana, o ne a e-na le balaoli ba mashome a mabeli a metso e 'meli, ba tsoang lapeng labo. ₂₉Ba morabe oa Benjamine, bao e neng e le bang ka Saule, ba ne ba le likete tse tharo. Ho fihlela ka nako eo, bongata ba bona bo ne bo ntse bo le ka lehlakoreng la Saule.

₃₀Ba morabe o Efraime e ne e le bahale ba likete tse mashome a mabeli le makholo a robeli, ba tumileng malapeng abo bona.

₃₁Ba karolo ea morabe oa Manase, ba neng ba thontsoe ka mabitso ho tla bea Davida hore e be khosi, ba ne ba le likete tse leshome le metso e robeli.

₃₂Ba morabe oa Isakare, ba neng ba tseba litaba tsa mehla eo, ba tseba le seo Iseraele e lokelang ho se etsa, e ne e le baetapele ba makholo a mabeli, e le bona ba laolang bang ka bona bohle.

₃₃Ba morabe oa Sebulone, ba neng ba futuha, ba koetliselitsoe ho loana ka mefuta eohle ea lihlomo, ba theile thekō ea ntoa, ba ne ba le likete tse mashome a mahlano, 'me ba tšepahala.

₃₄Ba morabe oa Nafthali e ne e le balaoli ba sekete, ba e-na le bahlabani ba likete tse mashome a mararo a metso e supileng, ba hlometseng ka lithèbè le marumo.

₃₅Ba morabe oa Dane, ba neng ba koetliselitsoe ntoa, ba ne ba le likete tse mashome a mabeli a metso e robeli, le makholo a tšeletseng.

₃₆Ba morabe oa Ashere, ba neng ba koetliselitsoe ntoa, e le malala-a-laotse, ba ne ba le likete tse mashome a mane.

₃₇Ba morabe oa Rubene, le ba morabe oa Gade, le karolo ea ba morabe oa Manase, ba neng ba le ka bochabela ho Jorodane, ba ne ba le likete tse lekholo le mashome a mabeli, ba hlometse ka mefuta eohle ea lihlomo.

₃₈Bahlabani bana bohle, ba neng ba ema thekōng ea ntoa, ba fihla Heborone ba ikemiselitse ho bea Davida hore e be khosi ea Iseraele. Le Baiseraele bohle ba ne ba le maikutlo a le mang a hore Davida a beoe, e be khosi.

₃₉Bana bohle ba qeta matsatsi a mararo ba e-na le Davida, ba ntse ba e-ja, ba e-noa tseo bana babo bona ba neng ba ba lokiselitse tsona. ₄₀Le ba neng ba le haufi le bona, e leng ba merabe ea Isakare, le Sebulone, le Nafthali, ba ba tlisetsa lijo ba li bofile litonking, le likameleng, le limmeileng, le lipeleseng: phofo, le liphaphatha tsa mangangajane a feiee, le liphaphatha tsa mangangajane a morara, le veine, le ole, le lipholo, le linku. Tsena ba li tlisa ka bongata, hobane Baiseraele ba ne ba thabile.