Davida o bala sechaba
1Satane a tsohela Baiseraele matla, 'me a hlohleletsa Davida hore a bale Baiseraele. 2Davida a re ho Joabe le ho balaoli ba mabōtho: “Tsamaeang, le e'o bala Baiseraele ho tloha Beeresheba, ho ea fihla Dane; le ntlisetse palo ea bona, ke tle ke e tsebe.”
3Joabe a re: “Morena a ke a atise palo ea sechaba sa hae halekholo! Feela, mong'a ka, khosi ea ka, ha ke re Baiseraele bohle ke bahlanka ba mong'a ka? Joale ke ka lebaka la'ng ha mong'a ka a lakatsa ho etsa ntho ee? Ke ka lebaka la'ng ha mong'a ka a etsa hore Baiseraele ba tle ba sitoe?”
4Leha ho le joalo, eaba le se le lumme; Joabe a tsamaea le naha eohle ea Iseraele, 'me qetellong a khutlela Jerusalema.
5Joabe a fihla a bolella khosi Davida palo ea sechaba. Baiseraele bohle, bao e neng e le matšōla-thèbè, ba ne ba le mileone le likete tse lekholo. Ba morabe oa Juda ba ne ba le likete tse makholo a mane le mashome a supileng. 6Empa Joabe o ne a sa ka a balella ba morabe oa Levi le ba morabe oa Benjamine, hobane o ne a hanyetsa taelo ea khosi.
7Ketso ena ea Davida ea se ke ea khahla Molimo, 'me ka baka leo, a otla Baiseraele.
8Eaba Davida o re ho Molimo: “Ke entse sebe se seholo ka ho etsa ntho ena. Empa joale kea u rapela: Ak'u hlakole bokhopo bona ba mohlanka oa hao, hobane ke sebelitse ka bothoto bo boholo.”
9Morena a bua ho Gade, senōhe sa Davida, a re ho eena: 10“E-ea ho Davida, u fihle u re ho eena: ‘Morena o bua tjena: Lintho ke tsena tse tharo: Ikhethele e le 'ngoe ea tsona, eo ke tla u otla ka eona.’ ”
11Eaba Gade o fihla ho Davida, o re ho eena: “Morena o bua tjena: ‘Ikhethele! 12Ho be le sekoboto ka lilemo tse tharo; kapa ka nako ea khoeli tse tharo u balehe lira tsa hao ha li ntse li u manakisa ka lisabole; kapa, ho seng joalo, ka matsatsi a mararo Morena a u futuhele ka sabole ea hae, e leng hore a lihele naha ee seoa, lengeloi la Morena le tsamaee hohle kahare ho naha ea Iseraele, le ntse le timetsa tsohle?’ Ka baka leo, inahanele karabo eo ke tla e isetsa ea nthōmileng.”
13Davida a re ho Gade: “Ke tlaletsoe haholo! Ho e-na le ho oela liatleng tsa motho, nka mpa ka oela liatleng tsa Morena, hobane mohau oa hae o moholo haholo.”
14Joale Morena a rōmela seoa naheng ea Iseraele, 'me ha e-shoa batho ba likete tse mashome a supileng. 15Molimo a rōmela lengeloi Jerusalema ho ea e timetsa, empa eare ha le ntse le e timetsa, Morena a bona, 'me a hauha ha a nahana koluoa eo, a re ho lengeloi le neng le ntse le timetsa batho: “Ho lekane! Khaotsa!” Lengeloi la Morena le ne le eme seotlong sa Orenane oa Mojebuse.
16Ha Davida a re mahlo tloha! a bona lengeloi la Morena le eme sepakapakeng, le tšoere sabole, le e kokoselitse holim'a Jerusalema. Bo-Davida le baholo ba sechaba, ba neng ba apere liaparo tse mahoashe, ba obamela fatše ka lifahleho.
17Davida a re ho Molimo: “Ha ke re ke 'na ea laetseng hore ho baloe sechaba? Ke 'na ea entseng sebe; ruri ke 'na ea entseng bokhopo. Joale linku tsee tsona li entse'ng? Oho, Morena Molimo oa ka, kea u rapela: Mpe u otle 'na le ba lelapa leso, u se ke ua otla sechaba sa hao.”
18Eaba lengeloi la Morena le laela Gade hore a bolelle Davida a nyolohe, a e'o hahela Morena aletare seotlong sa Orenane oa Mojebuse. 19Davida a nyoloha ho ea ka polelo eo Gade a ileng a e bolela ka lebitso la Morena.
20Orenane o ne a ntse a pōla koro. Ha a hetla, a bona lengeloi, empa bara ba hae ba bane bona ba ipata. 21Ha Davida a ntse a atamela ho Orenane, Orenane a 'mona, a tloha seotlong, a isa hlompho ho Davida ka ho obama.
22Davida a re ho eena: “'Nee seotlo sena ke tle ke hahele Morena aletare ho sona, e le hore seoa se tle se khaotse sechabeng. U nthekisetse sona ka theko ea sona.”
23Orenane a re ho Davida: “Se nke feela, mong'a ka, khosi ea ka, u etse ka sona kamoo u ratang kateng. Ke bile ke u fa le lipholo tsena hore u etse nyehelo ea secheso ka tsona; ke u fa le selei sena se pōlang hore u etse patsi ka sona, le koro hore u etse nyehelo ea lijo ka eona. Tsena tsohle ke u fa tsona.”
24Empa khosi Davida a re ho Orenane: “Che, ke tla li reka ka theko ea tsona, hobane nke ke ka nka lintho tsa hao ke li nkela Morena, empa ke sa li reka; leha e le nyehelo ea secheso nke ke ka e etsa ka tseo ke sa li rekang.”
25Eaba Davida o reka seotlo seo ka lichelete tsa khauta tse ka bang boima ba likilo tse supileng. 26Davida a hahela Morena aletare hona moo, a etsa nyehelo ea secheso, le nyehelo ea teboho. A rapela Morena, 'me Morena a mo arabela ka ho theola mollo o tsoang leholimong, a o theolela holim'a aletare ea nyehelo ea secheso.
27Joale Morena a laela lengeloi, 'me la busetsa sabole ea lona selateng sa eona.
28Ka eona nako eo, ha Davida a elelloa hore Morena o mo arabetse a le seotlong sa Orenane oa Mojebuse, eaba o se a ntse a etsetsa mahlabelo hona moo seotlong sa Orenane oa Mojebuse. 29Leaho la Morena, leo Moshe a neng a le etse ha a le nahathothe, le aletare ea nyehelo ea secheso, li ne li ntse li le sebakeng sa borapeli se Gibeone. 30Empa Davida o ne a ke ke a ea teng ho ea botsa Morena, hobane o ne a tšaba sabole ea lengeloi la Morena.
