Balaoli ba mabōtho
1Lena ke lenane la bana ba Iseraele, ho ea ka palo ea bona, e leng lihlooho tsa malapa a bona, le balaoli ba bahlabani ba likete, le ba bahlabani ba makholo, le bahlanka ba sebeletsang khosi litabeng tsohle tse amanang le mabōtho. Ba ne ba sebetsa ka lihlopha tse suthelanang ka khoeli le khoeli, selemo sohle. Lebōtho ka leng le ne le e-na le bahlabani ba likete tse mashome a mabeli a metso e mene.
2Jeshobame, mora oa Sabediele, o ne a laola lebōtho le kenang mosebetsing ka khoeli ea pele. Le ne le e-na le bahlabani ba likete tse mashome a mabeli a metso e mene. 3E ne e le oa lelōko la Perese, e le hlooho ea balaoli bohle ba mabōtho a sebetsang ka khoeli ea pele.
4Dodai, oa morabe oa Ahohi, o ne a laola lebōtho le kenang mosebetsing ka khoeli ea bobeli, motlatsi oa hae e ne e le Mikelote. Le eena lebōtho la hae le ne le e-na le bahlabani ba likete tse mashome a mabeli a metso e mene.
5Benaea, mora oa Moprista e Moholo Jehoeada, e ne e le molaoli oa lebōtho le kenang mosebetsing ka khoeli ea boraro. Lebōtho la hae le ne le e-na le bahlabani ba likete tse mashome a mabeli a metso e mene. 6Ke eena Benaea eane eo e neng e le e mong oa bahale ba mashome a mararo, e bile e le mookameli oa bona. Amisabade, mora oa hae, e ne e le eena ea laolang lebōtho lena.
7Asaele, ngoan'abo Joabe, e ne e le molaoli oa lebōtho le kenang mosebetsing ka khoeli ea bone. Sebadiea, mora oa hae, o ne a mo hlahlama. Lebōtho la hae le ne le e-na le bahlabani ba likete tse mashome a mabeli a metso e mene.
8Shameute, oa morabe oa Isera, e ne e le molaoli oa lebōtho le kenang mosebetsing ka khoeli ea bohlano. Lebōtho la hae le ne le e-na le bahlabani ba likete tse mashome a mabeli a metso e mene.
9Ira, mora oa Ikeshe oa Tekōoa, e ne e le molaoli oa lebōtho le kenang mosebetsing ka khoeli ea botšelela. Lebōtho la ha le ne le e-na le bahlabani ba likete tse mashome a mabeli a metso e mene.
10Helese oa Mopelone, oa morabe oa Efraime, e ne e le molaoli oa lebōtho le kenang mosebetsing ka khoeli ea bosupa. Lebōtho la hae le ne le e-na le bahlabani ba likete tse mashome a mabeli a metso e mene.
11Sibekai oa Mohusha, oa morabe oa Sera, e ne e le molaoli oa lebōtho le kenang mosebetsing ka khoeli ea borobeli. Lebotho la hae le ne le e-na le bahlabani ba likete tse mashome a mabeli a metso e mene.
12Abiesere oa Moanatote, oa morabe oa Benjamine, e ne e le molaoli oa lebōtho le kenang mosebetsing ka khoeli ea borobong. Lebōtho la hae le ne le e-na le bahlabani ba likete tse mashome a mabeli a metso e mene.
13Maharai oa Monetofa, oa morabe oa Sera, e ne e le molaoli oa lebōtho le kenang mosebetsing ka khoeli ea leshome. Lebōtho la hae le ne le e-na le bahlabani ba likete tse mashome a mabeli a metso e mene.
14Benaea oa Mopiratone, oa morabe oa Efraime, e ne e le molaoli oa lebōtho le kenang mosebetsing ka khoeli ea leshome le motso o mong. Lebōtho la hae le ne le e-na le bahlabani ba likete tse mashome a mabeli a metso e mene.
15Heledai oa Monetofa, oa morabe oa Oteniele, e ne e le molaoli oa lebōtho le kenang mosebetsing ka khoeli ea leshome le metso e 'meli. Lebōtho la hae le ne le e-na le bahlabani ba likete tse mashome a mabeli a metso e mene.
Lihlooho tsa merabe ea Iseraele
16Lihlooho tsa merabe ea Iseraele e ne e le tsena: Hlooho ea ba morabe oa Rubene e ne le Eleesere, mora oa Sikeri; ea ba morabe oa Simeone e le Shefatiea, mora oa Maaka. 17Ho ba morabe oa Levi, hlooho e ne e le Hashabiea, mora oa Kemuele; ho ba morabe oa Arone e le Sadoke. 18Ho ba morabe oa Juda hlooho e ne e le Elehu, e mong oa bana babo Davida; ho ba morabe oa Isakare e le Omeri, mora oa Mikaele. 19Ho ba morabe oa Sebulone hlooho e ne e le Jishemaea, mora oa Obadiea; ho ba morabe oa Nafthali e le Jeremote, mora oa Aseriele. 20Ho ba morabe oa Efraime hlooho e ne e le Hoshea, mora oa Asasiea; ho ba karolo e 'ngoe ea ba morabe oa Manase e le Joele, mora oa Pedaea. 21Ho ba karolo e 'ngoe ea ba morabe oa Manase e Gileade, hlooho e ne e le Ido, mora oa Sekariea; ho ba morabe oa Benjamine e le Jaasiele, mora oa Abinere. 22Ho ba morabe oa Dane hlooho e ne e le Asariele, mora oa Jerohame.
Bana e ne e le mahosana a merabe ea Iseraele.
23Empa Davida ha aa ka a bala ba lilemo tse mashome mabeli ho ea tlase, hobane Morena o ne a itse o tla ngatafatsa Baiseraele, ba be kaalo ka linaleli tsa leholimo. 24Joabe, mora oa Seruea, o ne a ile a qala ho bala batho, empa a se ke a qeta. Ho bala sechaba hoo ha tlisetsa Baiseraele kotlo; ka baka leo, palo eo ha ea ka ea ngoloa Bukeng ea Liketsahalo tsa khosi Davida.
Balisa ba maruo a khosi
25Matlotlo a khosi a ne a hlokomeloa ke Asemafete, mora oa Adiele; athe lisiu tse ka mathoko, le tse metseng, le tse metsaneng, le tse liqhobosheaneng, li ne li hlokomeloa ke Jehonathane, mora oa Usiea. 26Eseri, mora oa Kelōbe, o ne a hlokomela balemi. 27Shimei, ea neng a ahile Rama, o ne a hlokomela masimo a morara; Sabedi, ea neng a ahile Shifame, o ne a hlokomela morara o eang litlhōtlelong. 28Baale-Hanane oa Mogedere, o ne a hlokomela lifate tsa mohloaare le tsa monōkōtšoai tse maralleng a ka bophirimela; Jōoashe o ne a hlokomela matlo ao ho bōlōkang ole ka ho 'ona.
29Shiterai oa Mosharone o ne a hlokomela likhomo tse neng li le metebong e Sharone; Shafate, mora oa Adelai, o ne a hlokomela likhomo tse neng li le ka likhohlong. 30Obile oa Moishemaele o ne a hlokomela likamele; Jehedeea, ea neng a ahile Meronote, o ne a hlokomela litonki. 31Jasise oa Mohagare o ne a hlokomela likhutšoane. Bana bohle e ne e le balisa ba maruo 'ohle a khosi Davida.
Baeletsi ba Davida
32Jonathane, rangoan'a Davida, e ne e le moeletsi ea bohlale, e bile e le mongoli, 'me Jehiele, mora oa Hakemoni, o ne a hlokomela bara ba khosi. 33Ahitofele e ne e le moeletsi oa khosi; Hushai oa Moarake e le motsoalle oa khosi. 34Ahitofele a hlahlangoa ke Jehoeada, mora oa Benaea, le Abiatare.
Molaoli oa mabōtho a khosi e ne e le Joabe.
