1 LIKETSAHALO 9

₁Baiseraele bohle ba baloa ho ea ka melōko ea bona, 'me ba ngoloa Bukeng ea Likhosi tsa Iseraele, le tsa Juda. Ka baka la litšito tsa bona, ba thōpuoa, ba isoa Babilona.

₂Ba pele ba ileng ba khutla ho ea aha naheng ea bona le metseng ea bona e bile Baiseraele, le baprista, le Balevi, le bahlanka ba sebeletsang ka Tempeleng.

₃Ba morabe oa Juda, le ba morabe oa Benjamine, le ba morabe oa Efraime, le ba morabe oa Manase ba ileng ba aha Jerusalema ke bana: ₄Utai, mora oa Amihude, setlōhōlō sa Omeri, setlōhōloana sa Imeri, setlōhō-tlōhōloana sa Bani ea tsoetsoeng ke Perese, mora oa Juda. ₅Ho bara ba Shilo ea e-ba letsibolo la hae Asaea le bara ba hae; ₆ho bara ba Sera ea e-ba Jeuele le bana babo, ba le makholo a tšeletseng le mashome a robong; ₇ho bara ba Benjamine ea e-ba Salō, mora oa Meshulame, setlōhōlō sa Hodafiea, setlōhōloana sa Hasenuoa, ₈le Jibeneea, mora oa Jerohame, le Ela, mora oa Usi, setlōhōlō sa Mikeri, le Meshulame, mora oa Shefatiea, setlōhōlō sa Reuele, setlōhōloana sa Jibeneea. ₉Bana babo bona, ho ea ka melōko ea bona, ba ne ba le makholo a robong le mashome a mahlano a metso e tšeletseng. Banna bana bohle e ne e le lihlooho tsa malapa abo bona.

₁₀Baprista ba neng ba ahile Jerusalema ke bana: Jedaea, le Jehoearibe, le Jakine, ₁₁le Asariea, mora oa Hilekiea, eo baholo-holo ba hae e neng e le bo-Meshulame, le Sadoke, le Meraote, le Ahitube, eo e neng e le mookameli oa Tempele ea Molimo, ₁₂le Adaea, mora oa Jerohame, eo baholo-holo ba hae e neng e le bo-Pashahure, le Malakiea, le Maasai, le Adiele, le Jahesera, le Meshulame, le Meshilemite, le Imere. ₁₃Bana babo bona bao e neng e le lihlooho tsa malapa abo bona, ba ne ba le sekete le makholo a supileng le mashome a tšeletseng. E ne e le banna ba tsebang ho sebeletsa ka Tempeleng ea Molimo.

₁₄Balevi ba neng ba ahile Jerusalema ke bana: Shemaea, mora oa Hashube, setlōhōlō sa Asarikama, setlōhōloana sa Hashabiea, e mong oa bara ba Merari, ₁₅le Bakabakare, le Hereshe, le Galale, le Mataneea, mora oa 'Mika, setlōhōlō sa Sikeri, setlōhōloana sa Asafo, ₁₆le Obadiea, mora oa Shemaea, setlōhōlō sa Galale, setlōhōloana sa Jedutune, le Berekiea, mora oa Asa, setlōhōlō sa Elekana ea neng a ahile metseng ea Banetofa.

₁₇Balebeli ba menyako ea Tempele e ne e le Shalōme, le Akube, le Talamone, le Ahimane, le bana babo bona. Mookameli oa bona e ne e le Shalōme. ₁₈Pele ho mona, ba ne ba lebela khoro ea khosi e ka bochabela, e le bona ba lebelang khoro ea liahelo tsa Balevi. ₁₉Shalōme, mora oa Kore, setlōhōlō sa Abiasafo, setlōhōloana sa Kora, le bana babo, ba lelapa la Kora, e ne e le baokameli ba mosebetsi oo, e le balebeli ba menyako ea Tente ea Morena, joalokaha bo-ntat'a bona ba ne ba okametse lebōtho le lebelang menyako ea Tente ea Morena. ₂₀Mehleng ea pele, Finease, mora oa Eleasare, e ne e le mookameli oa bona, 'me Morena a e-na le eena. ₂₁Sekariea, mora oa Meshelemiea, e ne e le molebeli oa monyako oa Tente ea Morena.

₂₂Bohle ba ileng ba khetheloa hore e be balebeli ba menyako ba ne ba le makholo a mabeli le leshome le metso e 'meli. Ba ne ba baliloe ho ea ka melōko ea bona, metseng ea habo bona. Bo-Davida le moporofeta Samuele ke bona ba neng ba hlomamise banna bana mosebetsing ona oa bona, o nang le boikarabelo. ₂₃Ka baka leo, banna bao le bara ba bona, ba ne ba lebela menyako ea Tempele ea Morena, e leng Tente ea Morena. ₂₄Balebeli ba menyako ba ne ba lebela mahlakore a mane, ke ho re ka bochabela, le ka bophirimela, le ka leboea, le ka boroa. ₂₅Bana babo bona, ba metseng ea bona, ba ne ba e-tla ka nako le nako, kamora' matsatsi a supileng, ho tla ba phomotsa. ₂₆Balebeli ba menyako ba bane, ba baholo, bao e neng e le Balevi, ba ne ba hlokomela likamore, le matlōle a Tempele ea Molimo. ₂₇Ba ne ba qeta bosiu ba pota-potile Tempele ea Molimo, hobane ba ne ba laetsoe ho e lebela, le ho e bula hoseng ho hong le ho hong.

₂₈Balevi ba bang ba ne ba hlokomela thepa e sebeletsang, ba e bale ha ba e tlisa ka Tempeleng, leha ba e khutlisetsa pōlōkelong. ₂₉Ba bang ba ne ba hlokomela lintho tsohle tsa Sehalalelo, le phofo e thumisehileng, le veine, le ole, le mokubetso, le linōko. ₃₀Ba bang ba bara ba baprista ba ne ba etsa litlolo ka linōko.

₃₁Matiteea, e mong oa Balevi, e leng letsibolo la Shalōme, oa morabe oa Kora, o ne a hlokomela tsohle tse phehoang ka lipane. ₃₂Bana babo bona ba bang, e leng bara ba Kohate, ba ne ba hlokomela bohobe bo halalelang, ba bo bea tafoleng ka letsatsi le leng le le leng la Sabatha.

₃₃Bao e neng e le libini le lihlooho tsa malapa a Balevi, ba ne ba lula ka likamoreng tsa Tempele, ba sa sebetse mesebetsi e meng, hobane bona ba ne ba sebetsa motšeare le bosiu.

₃₄Bana e ne e le lihlooho tsa malapa a Balevi, e le lihlooho tsa melōko eohle ea bona, 'me ba ahile Jerusalema.

₃₅Jeiele, mothei oa Gibeone, o ne a ahile Gibeone. Lebitso la mosali oa hae e ne e le Maaka. ₃₆Mora oa hae oa matsibolo e ne e le Abadone, a hlahlangoa ke Sure, le Kishe, le Baale, le Nere, le Nadabe, ₃₇le Gedore, le Ako, le Sekariea, le Mikelote. ₃₈Mikelote a tsoala Shimeame. Le bona ba ne ba ahile Jerusalema, haufi le bana babo bona.

₃₉Nere a tsoala Kishe, Kishe a tsoala Saule, Saule a tsoala Jonathane le Malekishuoa, le Abinadabe, le Eshebaale.

₄₀Mora oa Jonathane e ne e le Meriba-Baale: Meriba-Baale a tsoala 'Mika. ₄₁Bana ba 'Mika e ne e le Pitone, le Meleke, le Taherea, le Akase.

₄₂Akase a tsoala Jara, Jara a tsoala Alemete, le Asemafete, le Simeri, 'me Simeri a tsoala Mosa.

₄₃Mosa a tsoala Bina, Bina a tsoala Refaea, Refaea a tsoala Eleasa, Eleasa a tsoala Asele. ₄₄Asele o ne a e-na le bara ba tšeletseng. Mabitso a bona ke ana: Asarikama, le Bokeru, le Ishemaele, le Sheariea, le Obadiea, le Hanane. Bana e ne e le bara ba Asele.