1 BAKORINTHE 5

₁Ha e le 'nete, ho utloahala hore bohlola bo teng har'a lōna. Ke bohlola ba mofuta o ke keng oa e-ba teng le har'a bahedene, e leng ba motho ea kenelang mohats'a ntat'ae. ₂Empa lea ikhōhōmōsa, athe le ne le tšoanetse ho itšoabela, 'me ea entseng ketso ena ebe o tlositsoe har'a lōna. ₃Ha e le 'na, leha ke le sieo har'a lōna ka nama, ke teng ka moea. Joaloka hoja ke teng, ea entseng ketso e joalo ke se ke mo ahlōtse ₄ka lebitso la Morena Jesu. Mohla le phuthehang, 'me le 'na ke le teng ka moea, re e-na le matla a Morena oa rōna Jesu, ₅motho eo a neeloe Satane, ho timetsoe 'mele oa hae, e le hore moea oona o tle o pholosoe ka Letsatsi la ho tla ha Morena.

₆Boithoriso ba lona ha boa lōka. Na ha le tsebe hore tomoso e seng kae e lomosa hlama kaofela? ₇Lahlelang tomoso ea khale kantle, hore le tle le be hlama e ncha, kaha le le bohobe bo sa lomosoang ba Paseka; ebile le Kreste, Konyana ea rōna ea Paseka, o hlabiloe. ₈Ka hona a re etseng mokete ka bohobe bo sa lomosoang ba botšepehi le 'nete, e seng ka tomoso eane ea khale, tomoso ea bobe le bokhopo.

₉Lengolong la ka ke ile ka re le se ke la tloaelana le lihlola. ₁₀Ho hang ke ne ke sa bolele lihlola tsohle tsa lefatše lena, kapa litlofa, kapa linokoane, kapa basebeletsi ba melimo ea bohata, hobane hoo ho ka le tlama ho falla lefatšeng lena. ₁₁Empa seo ke neng ke se bolela ke hore le se ke la tloaelana le motho ea ipitsang molumeli, feela e le sehlola, kapa setlofa, kapa mosebeletsi oa melimo ea bohata, kapa motho ea litlhapa, kapa letahoa, kapa senokoane. Le se ke la ba la ja le oa mofuta oo.

₁₂Na ho ahlōla batho ba kantle e ka ba taba ea ka? Na bao lōna le ba ahlōlang, hase balumeli? ₁₃Ha e le ba kantle, ke Molimo ea tla ba ahlōla. “Tlosang ea khopo kahar'a lōna.”