Lithoko tsa Simone
1Selemong sa lekholo le mashome a supileng a metso e 'meli, khosi Demeteriose a bokella mabotho 'ohle a hae, a leba Media ho ea kopa thuso teng, a tle a loantše Terifone. 2Eare hoba Aresakese, khosi ea Peresiea le Media, a utloe hore Demeteriose o kene naheng ea hae, a romela e mong oa balaoli ba hae hore a mo tšoare, a be a tle le eena a ntse a phela. 3Eo a ea, a hlola mabotho a Demeteriose; a mo tšoara, 'me a neelana ka eena ho Aresakese, ea ileng a mo koalla chankaneng.
4Naha ea Juda ea phela khotsong tlas'a puso ea Simone. A batlela sechaba sa habo tse molemo; ba habo ba khahloa ke puso ea hae, le ke tlotla ea hae bophelong bohle ba hae. 5A eketsa tlotla eo ea hae ka ho hapa Jopo, a e etsa kou ea likepe tsa hae, a tle a tsebe ho namela lihleke-hlekeng tse leoatleng. 6A eketsa meeli ea sechaba sa habo, naha eohle ea e-ba tlas'a tsamaiso ea hae. 7A ea ntša batho ba bangata kholehong. A hapa Gasara le Bete-Sure le Qhobosheane, 'me a tlosa melimo ea bohata libakeng tseo. Ha se ke ha e-ba le motho ea mo emang ka pele.
8Batho ba lema masimo a bona ka khotso; lefatše la ba hlahisetsa lijo, le lifate tsa thoteng, litholoana. 9Maqheku a lula mapatlelong a metse, a qoqa ka tse ntle feela tse ntseng li etsahala; bacha ba khaba ka meaparo le ka lihlomo. 10Simone a fepela metse ka lijo, a e hlahlella ka libetsa tsa ho itšireletsa, ho fihlela setumo sa hae se fihla lipheletsong tsa lefatše. 11A hlahisa khotso naheng, 'me Iseraele ea phela har'a thabo e kholo.
12Motho ka mong a lula tlas'a sefate sa hae sa morara le sa feiga, ho se ea ka mo tšosang. 13Ho ne ho se motho ea setseng naheng eohle ho ba loantša, kaha matsatsing ao likhosi tsohle li ne li ripitliloe. 14Simone a thusa mafutsana 'ohle a sechaba sa habo; 'me tataisong ea Molao oa Moshe, a hleka bohle ba khopo le ba bolotsana. 15A ntlafatsa Sehalalelo, a ba a eketsa le thepa ea Tempele.
16Pehi ea lefu la Jonathane e ne e se e ile ea fihla Roma le Separeta, 'me libakeng tseo batho ba e-ba mosarelong o moholo. 17Joale ha ba utloa hore Simone, ngoan'abo Jonathane, o entsoe moprista e moholo litulong tsa hae, 'me le hore ke eena ea busang naha le metse eohle, 18ba mo ngolla matlapeng a lethose ho nchafatsa setsoalle le selekane sa khale sa bona le Judase le Jonathane, bana babo. 19Lengolo lena la balloa phutheho, Jerusalema. 20Kopi ea lengolo leo Basepareta ba neng ba le ngotse ke ena:
“Babusi le baahi ba motse oa Separeta ba lumelisa Simone, moprista e moholo, le baholo le baprista le sechaba sohle sa Bajuda, bana babo bona. 21Baromuoa bao le ba rometseng ho sechaba sa habo rona ba re boleletse tsa kamoo le tlotlisehileng, le bileng le fumaneng tlhompho kateng, 'me re ile ra thabela boteng ba bona haholo. 22Tseo ba li buileng re li ngotse fatše mangolong a rona a molao, ka tsela ena: ‘Numeniose, mora oa Antiokose, le Antipatere, mora oa Jasone, baromuoa ba Bajuda, ba fihlile ho rona ho tla nchafatsa setsoalle sa rona le bona. 23Sechaba sa habo rona se ba thabetse, 'me se ba amohetse ka tlhompho; le kopi ea lipuo tsa bona e beiloe polokelong ea mangolo a bosechaba, e le hore sechaba sa Separeta se tle se se ke sa lebala taba ena; hape kopi ea litaba tsena e etselitsoe Simone, moprista e moholo.’ ”
24Ka morao ho moo Simone a romela Numeniose Roma, a mo neeletsa thebe ea khauta, e theko ea limina tse sekete, ho ea tiisa selekane le Baroma.
25Ha sechaba sa Bajuda se utloa tsohle tse etsahetseng, sa re: “Re tla leboha Simone le bara ba hae ka'ng? 26Hobane ke mona eena le bana babo le ntlo eohle ea ntat'a bona, ba lutse ba tiisitse ho re loanela ho lira tsa rona; ba hlotse, ba ba ba qhala lira tsa Iseraele, ba fumanela sechaba tokoloho.” 27Ba ngola litaba tsena matlapeng a lethose, ao ba ileng ba a manamisa litšieng thabeng ea Sione. Ena ke kopi ea tse ngotsoeng matlapeng ao:
“Letsatsing la leshome le metso e robeli la khoeli ea Elule, selemo e le sa lekholo le mashome a supileng a metso e 'meli, e le selemo sa boraro Simone e le moprista e moholo ea tumileng, Asaramele, 28lekhotleng le leholo la baprista, la sechaba, la babusi ba sechaba le baholo ba naha, ho ile ha phatlalatsoa litaba tsena: 29Ere kaha lintoa li 'nile tsa e-ba teng naheng ea rona, Simone mora oa Matathiase, moprista oa leloko la Joaribe, le bana babo, ba ile ba ipea kotsing 'me ba thibela lira tsa sechaba sa habo bona, e le hore Sehalalelo le Molao oa Moshe li sireletsehe; ba ba ba fumantša sechaba sa habo bona tlotla e kholo. 30Jonathane o ile a phutha sechaba, a etsoa moprista e moholo oa sona; eaba o orohela ho bang ka eena. 31Eitse ha lira li rera ho hlasela naha le ho senya Sehalalelo, 32ha hlaha Simone ho li thibela 'me a loanela sechaba sa habo. A senyeheloa ke lichelete tse ngata, tse tsoang mokotleng oa hae; a hlomella bahlabani ba bangata, a ba fa meputso ea bona. 33A sireletsa metse eohle ea Judea, le Bete-Sure, motse o meeling ea Juda, oo lira li neng li boloka lihlomo tsa tsona ho oona; a bea lebotho la bahlabani ba Bajuda moo. 34O boetse a sireletsa Jopo e lebopong la leoatle, le Gasara e sikang le meeli ea Ashedode, moo lira li neng li ahile teng; a bea Bajuda moo. Metseng eo a bolokela tsohle tseo batho ba li hlokang ho phela. 35Batho ba hlokomela botšepehi ba Simone le setumo seo a neng a rerile ho se tlisetsa sechaba. Ba mo bea moetapele le moprista e moholo oa bona, hobane o ne a phethile tsena tsohle, a bile a li entse kamehla ka toka le ka botšepehi ho sechaba sa habo, 'me a lekile ka litsela tsohle ho se phahamisa.
36“Mehleng ea hae, lintho tsohle li ile tsa atleha ka thuso ea hae; balichaba ba lelekoa naheng, esita le ba neng ba le motseng oa Davida, Jerusalema, moo ba neng ba ikhahetse Qhobosheane teng, eo ba neng ba tloha ho eona ho ea silafatsa libaka tse pota-potileng Sehalalelo le ho senya bohloeki ba sona. 37O ile a bea bahlabani ba Bajuda moo, a ba a tiisa Qhobosheane, ho sireletsa naha le motse-moholo; a ba a phahamisa le marako a Jerusalema. 38Ka mabaka ana, khosi Demeteriose o ile a mo hlomamisa setulong sa boprista bo boholo, 39a mo etsa e mong oa metsoalle ea hae, 'me a mo phaella ka lihlompho tse kholo. 40Demeteriose o ne a bile a utloa hore Bajuda ba reiloe lebitso la metsoalle, balekane le babo bona ke Baroma, ba ileng ba amohela maqosa a Simone ka tlhompho.
41“Joale Bajuda 'moho le baprista ba bona ba khahliloe ke hore Simone e be moetapele le moprista e moholo oa bona ho ea ho ile, ho fihlela ho ka hlaha moporofeta ea tšepahalang. 42E be 'musi oa bona; a be le boikarabelo holim'a Sehalalelo, a khethe baokameli ba mesebetsi e etsoang ho sona, le baokameli ba naha le baokameli ba libetsa le ba liqhobosheane. 43A mameloe ke bohle; 'me litumellano tsohle tseo 'muso o li etsang li ngoloe tlas'a lebitso la hae, 'me eena a apare tse perese le tse khabisitsoeng ka khauta.
44“Ho se be motho ofe kapa ofe, leha e le moprista, ea ka robang o mong oa melao ena, kapa a hanyetsa litaelo tsa hae, kapa leha e le ho epa seboka naheng ena ntle ho tumello ea hae, leha e le ho apara boperese kapa ho roala sepele sa khauta. 45Mang kapa mang ea ka hanang ho mamela melao ena, kapa a roba o mong oa eona, o tla lokeloa ke kahlolo.
46“Ho ile ha khahla sechaba sohle ho kopa Simone hore a etse tsohle ho latela merero e boletsoeng. 47Simone a amohela, a ba a lumela ho ba moprista e moholo, molaoli oa mabotho le 'musi oa sechaba sa Bajuda le oa baprista le ho ba mookameli oa bohle.”
48Joale lekhotla la laela hore litaba tsena li ngoloe matlapeng a lethose, hore 'ona a beoe sebakeng se pontšeng ea batho, lebaleng la Tempele; 49le hore likopi tsa litaba tsena li beoe polokelong, moo Simone le bara ba hae ba ka li fumanang teng.
