1Johanne a nyoloha motseng oa Gasara, a ea tlalehela Simone ntat'ae ka tseo Kendebeose a li entseng. 2Joale Simone a bitsa bara ba hae ba babeli ba baholo, Johanne le Judase, a re ho bona: “'Na le bana beso le lelapa la ntate, re loanne le lira tsa Iseraele ho tloha re sa le banyenyane ho fihlela kajeno; re bile ra atleha, 'me ka thuso ea rona Baiseraele ba pholosoa ka makhetlo a mangata. 3Empa joale ke tsofetse, 'me lona, ka mohau oa Molimo, le fihlile lilemong. Nkang sebaka sa ka le sa ngoan'eso, le tsoe, le e'o loanela sechaba sa habo rona; 'me thuso e hlahang leholimong e ke e be le lona.”
4Eaba o khetha naheng eohle bahlabani ba likete tse mashome a mabeli ba litaaso le bapalami ho ea hlasela Kendebeose. Ba ea robaletsa Modine. 5Ba tsoha ka meso, ba tsoela lehoatateng; joale ba bona mphihali ea litaaso le bapalami e ba tobile; empa noka e ne e ba arotse le sera. 6Johanne le mabotho a hae ba itokisetsa ntoa ba le malebana le sona. Eare ha Johanne a bona hore mabotho a hae a tšaba ho tšela noka, a hla a tšela pele. Bahlabani ba hae ha ba bona hore oa tšela, ba mo sala morao. 7Joale a laola mara a hae, a bea bapalami hare, hobane bapalami ba sera bona ba ne ba le bangata haholo. 8Literompeta tsa lla, eaba Kendebeose le mabotho a hae baa shamoha; 'me bongata ba bona ba e-ba mahlatsipa 'me ba shoa; ba setseng ba balehela qhobosheaneng. 9Ka nako eona eo, Judase, ngoan'abo Johanne, a ntšoa kotsi. Eaba Johanne eena o tebelisa Kendebeose ho ea fihla motseng oa Kederone oo a neng a sa tsoa o tsosa. 10Lira tsa balehela le litoreng tse masimong a Ashedode; 'me Johanne a chesa motse oo. Ho ne ho bolailoe ba ka etsang likete tse peli ba lireng. Johanne a ipoella Judea ka khotso.
Polao ea Simone le bara ba hae ba babeli
11Potolemea, mora oa Abubose, o ne a beiloe molaoli lehoatateng lohle la Jeriko; a bile a e-na le silefera le khauta e ngata, 12hobane e ne e le mokhoenyana oa Simone, moprista e moholo. 13A ikhohomosa, 'me a lakatsa ho ikhapela matla naheng eohle, a ba a lohela Simone le bara ba hae mano ho ba timetsa. 14Joale Simone o ne a ntse a potoloha le metse, ho ea bona se hlokoang teng. A ba a theohela Jeriko a e-na le Matathiase le Judase, bara ba hae, e le selemong sa lekholo le mashome a supileng a metso e supileng, khoeling ea leshome le motso o le mong, e leng khoeli ea Shebate. 15Mora oa Abubose a ba amohela ka bolotsana qhobosheaneng e 'nyane e bitsoang Doke, e neng e hahiloe ke eena. A ba etsetsa mokete oa motonana; athe o patile banna ka moo. 16Eare hoba Simone le bara ba hae ba noe ba tahoe, Potolemea le banna ba hae ba ropoha ba se ba le lisabole, ba oela Simone le bara ba hae le ba bang ba bahlanka ba hae holimo, ba ba bolaela ka tlung ea mokete. 17Ka ketso ena ea bohlabaphio bo tšabehang, eaba Potolemea o busetsa botle ka bobe.
18Potolemea a ngolla khosi ho e tlalehela se etsahetseng, a bile a e kopa ho hlahlelloa ka bahlabani ho tla mo thusa, le hore metse eohle le naha eohle li beoe matleng a hae. 19A romela banna ba bang Gasara, hore ba e'o bolaea Johanne. A romela melaetsa ho balaoli ba mabotho hore ba tle, a tle a ba putse ka silefera le khauta le limpho tse ling. 20A romela ba bang hape ho ea hapa Jerusalema le thaba ea Tempele. 21Empa oa nteka-tekane a phallela Gasara ho ea loma Johanne tsebe hore ntat'ae le bana babo ba se ba timetse; le hore ho se ho rometsoe ba bang ho tla mo bolaea le eena. 22Johanne ha a utloa litaba tsena, a tšoha haholo. A tšoara banna ba neng ba tlile ho 'molaea, a ba bolaea, hobane o ne a se a utloetse hore ba batla ho mo felisa.
23Litaba tse ling tsa Johanne le lintoa tsa hae le liketso tsa bonatla tseo a li entseng, le tsa marako a metse ao a a hahileng, liketso tsohle tsa hae, 24kaofela ha tsona li ngoliloe Bukeng ea Liketsahalo tsa nako ea boprista bo boholo ba hae, ho tloha ha a qala ho ba moprista e moholo ho hlahlama ntat'ae.
